୩୦ ମିନିଟରେ କରୋନା ରୋଗୀଙ୍କ ବିଲ୍‌ ମଞ୍ଜୁର କରିବାକୁ ବୀମା କମ୍ପାନୀଙ୍କୁ ହାଇକୋର୍ଟଙ୍କ ନିର୍ଦେଶ

ନୂଆଦିଲ୍ଲୀ: କରୋନା ରୋଗୀ ଡାକ୍ତରଖାନାରୁ ଡିସଚାର୍ଜ ହେବାରେ ବିଳମ୍ବ ହେଉଛି। ଏହାର କାରଣ ହେଉଛି ବୀମା କମ୍ପାନୀଗୁଡ଼ିକ ସେମାନଙ୍କ ବିଲ୍‌ ମଞ୍ଜୁର କରିବାରେ ବିଳମ୍ବ କରୁଛନ୍ତି। ଫଳରେ ଅନ୍ୟ ରୋଗୀଙ୍କୁ ଶଯ୍ୟା ପାଇଁ ଅନେକ ସମୟ ଧରି ଅପେକ୍ଷା କରିବାକୁ ପଡ଼ୁଛି। ତେବେ ଏହି ସମସ୍ୟାର ସମାଧାନ ଲାଗି ଦିଲ୍ଲୀ ହାଇକୋର୍ଟ ଗୁରୁବାର ବୀମା କମ୍ପାନୀଗୁଡ଼ିକୁ ୩୦ ମିନିଟରୁ ୧ ଘଣ୍ଟା ମଧ୍ୟରେ କରୋନା ରୋଗୀଙ୍କ ବିଲ୍‌ ମଞ୍ଜୁର କରିବାକୁ ନିର୍ଦେଶ ଦେଇଛନ୍ତି। ଯାହା ଫଳରେ ରୋଗୀ ଶୀଘ୍ର ଡିସଚାର୍ଜ ହେବେ ଏବଂ ଅନ୍ୟ ରୋଗୀଙ୍କୁ ତୁରନ୍ତ ଶଯ୍ୟା ମିଳିପାରିବ।

ବିଚାରପତି ପ୍ରତିଭା ଏମ. ସିଂହ ଏକ ମାମଲାର ଶୁଣାଣି କରିବା ସମୟରେ ବୀମା କମ୍ପାନୀଗୁ୍‌ଡ଼ିକୁ ଚେତାବନୀ ଦେଇ କହିଛନ୍ତି, ଯଦି କୋର୍ଟଙ୍କୁ କୌଣସି ବୀମା କମ୍ପାନୀ ଅଥବା ତୃତୀୟ ପକ୍ଷ ପ୍ରଶାସକ (ଟିପିଏ) ପ୍ରୋସେସିଂ ବୀମା ବିଲ୍‌ ମଞ୍ଜୁର କରିବା ଲାଗି ୬/୭ ଘଣ୍ଟାର ସମୟ ନେଉଥିବା ସୂଚନା ମିଳେ, ତେବେ ସେମାନଙ୍କ ବିରୋଧରେ ଅଦାଲତ ଅବମାନନା ନେଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବୀମା କମ୍ପାନୀଗୁଡ଼ିକ ବା ଟିପିଏକୁ ଡାକ୍ତରଖାନାରୁ ଅନୁରୋଧପତ୍ର ପ୍ରାପ୍ତ ହେବା ପରେ ବିଲ୍‌ଗୁଡ଼ିକୁ ମଞ୍ଜୁରୀ ଦେବାରେ ୩୦ କିମ୍ବା ୬୦ ମିନିଟରୁ ଅଧିକ ସମୟ ନେବା ଉଚିତ ନୁହେଁ। କୋର୍ଟ ବୀମା ନିୟାମକ ଆଇଆରଡିଏଆଇକୁ ଏ ସମ୍ବନ୍ଧରେ ନିର୍ଦେଶ ଜାରି କରିବାକୁ ଆଦେଶ ଦେଇଛନ୍ତି।

ଏହାବ୍ୟତୀତ ଅଦାଲତଙ୍କ ପକ୍ଷରୁ ଡାକ୍ତରଖାନା ପରିଚାଳକଙ୍କୁ ବି ନିର୍ଦେଶ ଦେଇ କହିଛନ୍ତି, ରୋଗୀଙ୍କ ଡିସଚାର୍ଜ ହେବା ପର୍ଯ୍ୟନ୍ତ ଅପେକ୍ଷା ନ କରି ନୂଆ ରୋଗୀଙ୍କୁ ଭର୍ତ୍ତି କରିବା ପ୍ରକ୍ରିୟା ଜାରି ରଖନ୍ତୁ। ଫଳରେ ରୋଗୀଙ୍କ ଶଯ୍ୟା ଖାଲି କରିବା କ୍ଷଣି ବିନା ବିଳମ୍ବରେ ଅନ୍ୟ ରୋଗୀଙ୍କୁ ଶଯ୍ୟା ମିଳିପାରିବ।

Comments are closed.