ଚଳନ୍ତା ଟ୍ରାକ୍ଟରରୁ ଖସି ଶ୍ରମିକଙ୍କ ମୃତ୍ୟୁ

ହରଭଙ୍ଗା : ହରଭଙ୍ଗା ବ୍ଲକ ପୁରୁଣାକଟକ ଥାନା ଅର୍ନ୍ତଗତ ବୁରୁବୁଡା ନିକଟରେ ସୋମବାର ସଂନ୍ଧ୍ୟା ସମୟରେ ଚଳନ୍ତା ଟ୍ରାକ୍ଟରରୁ ଖସିପଡି ଜଣେ ଶ୍ରମିକଙ୍କ ମୃତ୍ୟୂ ଘଟିଥିବା ଜଣାପଡିଛି। ମୃତ ଶ୍ରମିକ ଜଣଙ୍କ ରାମଗଡ ପଂଚାୟତ କୋଇଲିସୂତା ଗ୍ରାମର ଅନନ୍ତ କର୍ଣ୍ଣ (୩୨) ବୋଲି ସୂଚନା ମିଳିଛି। ମିଳିଥିବା ସୂଚନା ଅନୁସାରେ ଆଜି ସଂନ୍ଧ୍ୟାରେ ପୁରୁଣାକଟକରୁ କୋଇଲା ବୋଝେଇ କରି ଟ୍ରାକ୍ଟରଟି କୋଇଲିସୂତା ଫେରୁଥିଲା। ଏହି ସମୟରେ କୋଇଲା ବୋଝେଇ ଟ୍ରାକ୍ଟର ଡାଲା ଉପରେ ବସିଥିବା ଅନନ୍ତ କର୍ଣ୍ଣ ନାମକ ଜଣେ ଶ୍ରମିକ ବୁରୁବୁଡା ନିକଟରେ ଗାଡିରୁ ଖସିପଡିବାରୁ ତାଙ୍କ ଉପରେ ଟ୍ରାକ୍ଟର ଚକା ଚଢିଯାଇଥିଲା। ତାଙ୍କୁ ମୁର୍ମୂଷୂ ଅବସ୍ଥାରେ ପୁରୁଣାକଟକ ମେଡିକାଲ ଚିକିତ୍ସା ପାଇଁ ପଂହଚାଯାଇଥିଲା। ମାତ୍ର ସେଠାରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି। ମୃତ ଅନନ୍ତଙ୍କ ଗୋଟିଏ ପୁଅ, ଗୋଟିଏ ଝିଅ, ପତ୍ନୀ ଥିବା ଜଣାପଡିଛି। ମୃତ ଶ୍ରମିକଙ୍କ ପରିବାରକୁ ଆର୍ଥିକ ସହାୟତା ଯୋଗାଇଦେବାକୁ ଦାବି ହେଉଛି। ପୁଲିସ ଘଟଣାର ତଦନ୍ତ ଚଳାଇଛି।

Comments
Loading...