ଅର୍ଦ୍ଧାହାରରେ ବୃଦ୍ଧଙ୍କ ଜୀବନ ଗଲା

କଂଟାବାଂଜି : କଂଟାବାଞ୍ଜି ସରକାରୀ ଡାକ୍ତର ପରିସରର ମାର୍କେଟ କମ୍ଲେକ୍ସ ପିଣ୍ଢାରେ ଜଣେ ଅଜଣା ପ୍ରାୟ ୭୦ ବର୍ଷରୁ ଉର୍ଦ୍ଧ୍ବ ବୃଦ୍ଧଙ୍କର ଜୀବନ ଯାଇଛି । ପରେ ମଧ୍ୟାହ୍ନରେ ସ୍ଥାନୀୟ ପୁଲିସ ଖବର ପାଇ ପଞ୍ଚନାମା କରିବା ପରେ ଡାକ୍ତର ଖାନାରେ ମେଡିକାଲ କର୍ତ୍ତୃପକ୍ଷ, ଡାକ୍ତର ଏସ.ପି.ଡି. ପଣ୍ଡା ଶବ ବ୍ୟବଚ୍ଛେଦ କରିବା ପରେ ବୃଦ୍ଧଙ୍କ କୌଣସି ପରିଚୟ ଜଣାପଡୁନଥିବାରୁ, ସରକାରୀ ନିୟମ ଅନୁଯାୟୀ ଶୀତତାପ କଫିନରେ ରଖାଯିବ ବୋଲି ଡାକ୍ତରଙ୍କ ଜଣାପଡିଛି। ପ୍ରାପ୍ତ ସୂଚନା ମୁତାବକ ଏହି ବୃଦ୍ଧ ଜଣକ ଦୀର୍ଘ ବର୍ଷାଧିକାଳ ଡାକ୍ତରଖାନା ପରିସରରେ ଭିକ୍ଷାବୃତ୍ତି କରି ଖାଇବା ସହ ଡାକ୍ତରଖାନା ପରିସରରେ ଥିବା ଗଛ ତଳେ ଚଟାଣରେ ଶୋଉଥିବାବେଳେ ଦିନରେ ଏଣେତେଣେ ବୁଲାବୁଲି କରିବା ଦେଖାଯାଉଥିଲା । ଚଳିତ ବର୍ଷ ବଷା ଦିନ ମାର୍କେଟ କମ୍ଲେକ ତଳେ ଆଶ୍ରୟ ନେବା ସହ ବର୍ଷା ପାଣିରେ ଭିଜିବା ସହ ଦେହ ଖରାପ ହୋଇ ଶଯ୍ୟାସାୟୀ ଥିବାବେଳେ ଡାକ୍ତରଖାନାରେ କିଛି ଲୋକେ ବୃଦ୍ଧଙ୍କୁ  ଏକ ଷ୍ଟ୍ରେଚରରେ ଆଣି ମାର୍କେଟ କମ୍ଲେକ୍ସ ପିଣ୍ଢାରେ ଶୋଇ ଦେଇଥିଲେ। ସହି ଦିନରୁ ବୃଦ୍ଧ ଜଣକ ସେଠାରେ ପଡି ରହିଥିଲା। ଘୋସାରି ହୋଇ ଆଖପାଖ ଚା ଦୋକାନରୁ ଚା ବିସ୍କୁଟ ଖାଇ ଦୁର୍ବିସହ ଜୀବନ ବିତାଉଥିଲା । ଯଦି ବୃଦ୍ଧଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଇଥାନ୍ତା ତେବେ ହୁଏତ ସେ ବଂଚି ଯାଇଥାନ୍ତେ। ବୃଦ୍ଧଙ୍କର ବସ୍ତ୍ର ନ ଥିବାରୁ  ଶୀତ କାକରରେ  ପଡି ଜୀବନ ବିତାଉଥିଲା । ରାଜ୍ୟ ସରକାରଙ୍କ ଘୋଷଣା ଅନୁଯାୟୀ ରାଜ୍ୟରେ କେହି ଭୋକିଲା ରହିବେ ନାହିଁ । ତେଣୁ ପ୍ରତ୍ୟେକ ବ୍ଲକ , ମୁନିସିପାଲିଟି ଓ ଆଇ.ସି.ଡି.ଏସ. ଜରିଆରେ ସମସ୍ତ ବ୍ୟବସ୍ଥା କରାଯାଇଥିବା ବେଳେ ଏହି ବୃଦ୍ଧଙ୍କ ପ୍ରତି କାହାର ଦୃଷ୍ଟି ଗୋଚର  ନ ହେବା ତଥା ସବୁ ଜାଣି ଅଜଣା ରହି ପରିତାପର ବିଷୟ ବୋଲି ବୁଦ୍ଧିଜୀବୀ ମହଲରେ କ୍ଷୋଭ ପ୍ରକାଶ ପାଇଛି । ଯଥାଶିଘ୍ର ଜିଲ୍ଲାପାଳ ଏହାର ତଦନ୍ତ କରିବା ପାଇଁ  ଜନ ସାଧାରଣରେ ମତପ୍ରକାଶ  ପାଇଛି ।

Comments
Loading...