ଜବର ଦଖଲ ଉଚ୍ଛେଦ ନେଇ ରାସ୍ତାକାମ ବନ୍ଦ କଲେ ଗ୍ରାମବାସୀ

ରେଙ୍ଗାଲିକ୍ୟାମ୍ପ: ଅତାବିରା ବ୍ଲକ ଭୂର୍ଶିପାଲି ମୁଖ୍ୟ କେନାଲରୁ ବାହାରିଥିବା ଭାଲୁପାଲି ଡିଷ୍ଟ୍ରିବ୍ୟୁଟାରିଠାରୁ ରେଲୱେ ଷ୍ଟେସନ ପର୍ଯ୍ୟନ୍ତ ରାସ୍ତା ପାଇଁ ଅଞ୍ଚଳବାସୀ ଅନେକ ଦିନରୁ ସପ୍ନ ଦେଖିଆସିଥିଲେ । ବହୁ ଦିନର ପ୍ରତୀକ୍ଷା ପରେ ଏବେ ଆର୍ ଡି ବିଭାଗ ଦ୍ଵାରା ଏହି ରାସ୍ତାର କଂକ୍ରିଟକରଣ କାମ ଆରମ୍ଭ ହୋଇଛି । କିନ୍ତୁ ଏହି ରାସ୍ତାରେ ଗଜଲକ୍ଷ୍ମୀ ରାଇସ ମିଲ୍ ସମ୍ମୁଖରେ ଥିବା ସରକାରୀ ଜମି ଉପରେ ଜବର ଦଖଲ କରି କିଶାନ ରାଉତ ଓ ପତ୍ନୀ ସୀତା ରାଉତ ବାହାରୁ ଆସି ଘର ତିଆରି କରିଛନ୍ତି । ଏପରିକି ରାସ୍ତା ଉପରେ ମଧ୍ୟ ଘରକୁ ବଢାଇ ତିଆରି କରୁଛନ୍ତି। ଏହି ଜବର ଦଖଲ ଉଚ୍ଛେଦ ଦାବିରେ ଗ୍ରାମବାସୀ ତଥା ସ୍ଥାନୀୟ ପଡ଼ାବାସୀ ରାସ୍ତା କାମ ବନ୍ଦ କରିଛନ୍ତି।

ସେମାନେ ତାଙ୍କୁ ବାରମ୍ବାର ବୁଝାଇଥିଲେ ରାସ୍ତା ଉପରୁ ଘର ହଟାଇବାକୁ । କାରଣ ରାସ୍ତାଟି ସେଠାରେ ସଂକୀର୍ଣ୍ଣ ହେବା ସହ ଲୋକଙ୍କ ଗମନା ଗମନ ଓ ଯାନ ବାହନ ଯିବା ଆସିବାରେ ମଧ୍ୟ ଅସୁବିଧା ହେବ । ଏହା ବ୍ୟତୀତ ରାସ୍ତା ଉପରେ ଘର କରି ନିୟମର ବିରୁଦ୍ଧାଚରଣ କରୁଛନ୍ତି । କିନ୍ତୁ ଉକ୍ତ ବ୍ୟକ୍ତି ଜଣକ କିଛି ନ ଶୁଣି ଓଲଟା ସମସ୍ତଙ୍କୁ ଗାଳି ଗୁଲଜ କରିଥିଲେ । ତେଣୁ ଗ୍ରାମବାସୀ ବାଧ୍ୟ ହୋଇ ଗତ ତା ୧୨/ ୧୨/୨୨ ରିଖ ଦିନ ଅତାବିରା ଥାନାରେ ଲିଖିତ ଅଭିଯୋଗ କରିବା ସହିତ ତହସିଲଦାରଙ୍କୁ ମଧ୍ୟ ଲିଖିତ ଭାବରେ ଜଣାଇ ଥିଲେ । ଏହାପରେ ଟୋପର ରାଜସ୍ବ ନିରୀକ୍ଷକ ଉକ୍ତ ସ୍ଥାନକୁ ଯାଇ ପଚରା ଉଚରା କରି ଘଟଣାର ସତ୍ୟାସତ୍ୟ ବୁଝିଥିଲେ । କିନ୍ତୁ ଦୀର୍ଘ ଦୁଇ ମାସ ପରେ ମଧ୍ୟ ଆଜି ସୁଦ୍ଧା କିଛି ରିପୋର୍ଟ ତହସିଲଦାରଙ୍କ ପାଖରୁ ଆସିନଥିବା ଜଣା ପଡିଛି। ତେଣୁ ଗ୍ରାମବାସୀ ଓ ପଡ଼ାବାସୀ ଏହି ରାସ୍ତା କାମକୁ ସଂପୂର୍ଣ୍ଣ ବନ୍ଦ କରିଥିଲେ । ଖବର ପାଇ ବୁଧବାର ସନ୍ଧ୍ୟାରେ ତହସିଲଦାର ଶ୍ୱେତପଦ୍ମା ଯୋଶୀ, ଅତିରିକ୍ତ ତହସିଲଦାର ରଞ୍ଜନ ଦାଶ ଓ ରାଜସ୍ବ ନୀରିକ୍ଷକ ସୁମିତ କୁମାର ରେବେନ୍ ଘଟଣା ସ୍ଥଳରେ ପହଞ୍ଚିଥିଲେ । ତହସିଲଦାରଙ୍କ ଉପସ୍ଥିତିରେ ଉକ୍ତ ଜବରଦଖଲକାରୀ ଓ ଗ୍ରାମବାସୀଙ୍କ ମଧ୍ୟରେ ଆପୋଷ ବୁଝାମଣା ହୋଇଥିଲା । ରାସ୍ତାକୁ ପୁଣି ଥରେ ମାପ ଜୁଖ କରାଯାଇଥିଲା । ଶେଷରେ ଉକ୍ତ ବ୍ୟକ୍ତି ଜଣକ ରାସ୍ତାରୁ ଘର ହଟାଇବାକୁ ରାଜି ହୋଇ ଦୁଇ ଦିନର ସମୟ ଅବଧି ମାଗିଛନ୍ତି। ଦୁଇ ଦିନ ଭିତରେ ତାଙ୍କ ଘରକୁ ରାସ୍ତା ଉପରୁ ହଟାଇବେ ବୋଲି ପ୍ରତିଶ୍ରୁତି ଦେଇଛନ୍ତି । କିନ୍ତୁ ଘର ନ ହଟିବା ଯାଏଁ ରାସ୍ତାକାମ ବନ୍ଦ ରହିବ ବୋଲି ଗ୍ରାମବାସୀ ଅଡି ବସିଛନ୍ତି । ଏବେ ବି ରାସ୍ତା କାମ ବନ୍ଦ ରହିଛି ।

Comments are closed.