ଆରବ ସାଗରରେ ଘୂର୍ଣ୍ଣିବାତ୍ୟା ‘ମହା’ : ତାମିଲନାଡୁ, କେରଳ, ଲାକ୍ଷାଦ୍ୱୀପ, କର୍ଣ୍ଣାଟକ ଉପକୂଳରେ ପ୍ରବଳ ବର୍ଷା ସମ୍ଭାବନା

ଚେନ୍ନଇ : ଲାକ୍ଷାଦୀପ ଓ ଦକ୍ଷିଣ-ପୂର୍ବ ଆରବ ସାଗରରେ ସୃଷ୍ଟି ହୋଇଥିବା ଲଘୁଚାପ ଆହୁରି ଅଧିକ ଘନୀଭୂତ ହୋଇ ଏକ ଘୂର୍ଣ୍ଣିବାତ୍ୟାର ରୂପ ନେଇଛି। ପାଣିପାଗ ବିଭାଗ ଦ୍ୱାରା ଏହାର ନାମ ‘ମହା’ ରଖାଯାଇଛି। ଭାରତୀୟ ପାଣିପାଗ ବିଭାଗ ଜାରି କରିଥିବା ଏହାର ବୁଲେଟିନରେ କହିଛି ଏହି ଘୂର୍ଣ୍ଣିବାତ୍ୟା ଉତ୍ତର-ପଶ୍ଚିମ ଦିଗକୁ ଗତି କରୁଛି ଓ ଘଣ୍ଟାପ୍ରତି ଏହାର ବେଗ ୨୬ କିଲୋମିଟର ରହିଛି। ବର୍ତ୍ତମାନ ଏହା ଲାକ୍ଷାଦ୍ୱୀପର କବାରାଟ୍ଟିଠାରୁ ପୂର୍ବ-ଦକ୍ଷିଣ-ପୂର୍ବକୁ ୮୦ କିଲୋମିଟର ଓ ତିରୁବନନ୍ତପୁରମ୍‍ଠାରୁ ପଶ୍ଚିମଉତ୍ତର-ପଶ୍ଚିମକୁ ୪୪୦ କିଲୋମିଟର ଦୂରରେ ଅବସ୍ଥାନ କରୁଛି।
ଚେନ୍ନାଇସ୍ଥିତ ପାଣିପାଗ ବିଭାଗ କର୍ମଚାରୀମାନଙ୍କ କହିବା ଅନୁସାରେ ‘ମହା’ଘୂର୍ଣ୍ଣିବାତ୍ୟା ଆହୁରି ଅଧିକ ଭୟଙ୍କର ହୋଇ ଆଜିସୁଦ୍ଧା ଏକ ମହାବାତ୍ୟାରେ ପରିଣତ ହେବ। ଏହାର ପ୍ରଭାବରେ ଦକ୍ଷିଣ-ତାମିଲନାଡୁ, କେରଳ, ଲାକ୍ଷାଦ୍ୱୀପ, କର୍ଣ୍ଣାଟକ ଉପକୂଳରେ ଆସନ୍ତା ୨ ଦିନ ପର୍ଯ୍ୟନ୍ତ ପ୍ରବଳ ବର୍ଷା ହେବ। ପାଣିପାଗ ବିଭାଗ କହିଛି ଲାକ୍ଷାଦ୍ୱୀପର ଅନେକ ସ୍ଥାନରେ ପ୍ରବଳ ବର୍ଷା ହେବାର ଅନୁମାନ କରାଯାଉଥିବାବେଳେ କେରଳର କିଛିଭାଗରେ ଅତିପ୍ରବଳ ବର୍ଷା ହେବାର ସମ୍ଭାବନା ଅଛି। ରାଜ୍ୟର ଆହୁରି ଅନେକ ସ୍ଥାନରେ ମଧ୍ୟ ପ୍ରବଳ ବର୍ଷା ହେବାର ସମ୍ଭାବନା ଅଛି। ତାମିଲନାଡୁର ଅନେକ ଦକ୍ଷିଣବର୍ତ୍ତୀ ଜିଲ୍ଲାରେ ଗତକାଲିଠାରୁ ଅଳ୍ପରୁ ମଧ୍ୟମ ବର୍ଷା ଲାଗି ରହିଛି।

ରାମନାଥପୁରମ, ପୁଡୁଚେରୀ, କରାଇକଲ ଓ ନୀଳଗିରି ଜିଲ୍ଲାର ଅନ୍ୟ ୪ଟି ତାଲୁକରେ ସ୍କୁଲ ଗୁଡ଼ିକରେ ଛୁଟି ଘୋଷଣା କରାଯାଇଛି। ଡିଣ୍ଡିଗୁଲର କୋଡାଇକର୍ଣ୍ଣାଲ ତାଲୁକ୍‍ରେ ମଧ୍ୟ ସ୍କୁଲରେ ଛୁଟି ଘୋଷଣା କରାଯାଇଛି।