ବିବିସି ପୁରସ୍କାର ଦୌଡ଼ରେ ଦୂତି

ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀଙ୍କ ଶୁଭେଚ୍ଛା

କଟକ: ଓଡ଼ିଆ ଧାବିକା ଅଲିମ୍ପିଆନ ଦୂତି ଚାନ୍ଦ ଆଉ ଏକ ସମ୍ମାନଜନକ ପୁରସ୍କାର ଦୌଡ଼ରେ ସାମିଲ ହୋଇଛନ୍ତି। ୨୦୨୧ ବର୍ଷ ପାଇଁ ବିବିସି ଶ୍ରେଷ୍ଠ ମହିଳା ଭାରତୀୟ କ୍ରୀଡ଼ାବିତ୍‌ ପୁରସ୍କାର ଦୌଡ଼ରେ ଦୂତି ସାମିଲ ହୋଇଛନ୍ତି। ଉକ୍ତ ପୁରସ୍କାର ଲାଗି ଦୂତିଙ୍କ ସମେତ ୫ଜଣ ଖେଳାଳି- ଭାରତୀୟ ମହିଳା ହକି ଦଳର ଅଧିନାୟିକ​ା ରାଣୀ ରାମପାଲ, ସୁଟର ମନୁ ଭାକର, ଚେସ୍ ଖେଳାଳି କୋନେରୁ ହମ୍ପି ଓ ଟୋକିଓ ଅଲିମ୍ପିକ୍‌ସ ଯୋଗ୍ୟତା ହାସଲ କରିଥିବା ମଲ୍ଲଯୋଦ୍ଧା ବିନେଶ ଫୋଗତ ପ୍ରମୁଖଙ୍କ ନାମ ସୁପାରିସ କରାଯାଇଛି। ୪୦ ଜଣିଆ ବିଚାରକ କମିଟି ଖେଳାଳିଙ୍କ ନାମ ସୁପାରିଶ କରିଛନ୍ତି। କ୍ରୀଡ଼ାପ୍ରେମୀ ଜନତାଙ୍କ ଭୋଟରେ ମାର୍ଚ୍ଚ ୮ରେ ବିଜେତାଙ୍କ ନାମ ଘୋଷଣା କରାଯିବ। ଫେବୃଆରୀ ୨୪ ପର୍ଯ୍ୟନ୍ତ ପ୍ରଶଂସକମାନେ ସେମାନଙ୍କର ପ୍ରିୟ ଖେଳାଳିଙ୍କ ସପକ୍ଷରେ ଭୋଟ ଦେଇପାରିବେ। ବିବିସି ଶ୍ରେଷ୍ଠ ମହିଳା ଭାରତୀୟ କ୍ରୀଡ଼ାବିତ୍‌ ପୁରସ୍କାର ଗତବର୍ଷଠାରୁ ପ୍ରଦାନ କରାଯାଉଛି। ଏହି ପୁରସ୍କାର ଦୌଡ଼ରେ ସାମିଲ ହୋଇଥିବାରୁ ଦୂତିଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ବିଟ୍‌ କରି ଶୁଭେଚ୍ଛା ଜଣାଇବା ସହିତ ତୁମର ସଫଳତା ଅନ୍ୟମାନଙ୍କ ପାଇଁ ପ୍ରେରଣା ଯୋଗାଇବ ବୋଲି କହିଛନ୍ତି। ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ବିଟର ଜରିଆରେ ଲେଖିଛନ୍ତି- ସମ୍ମାନଜନକ ବିବିସି ଭାରତୀୟ ଶ୍ରେଷ୍ଠ ମହିଳା କ୍ରୀଡ଼ାବିତ୍ ପୁରସ୍କାର ଦୌଡ଼ରେ ଓଡ଼ିଶାର ପ୍ରମୁଖ ଧାବିକା ଦୂତି ଚାନ୍ଦ ସାମିଲ ହୋଇଥିବାରୁ ତାଙ୍କୁ ଅଭିନନ୍ଦନ ଜଣାଇବା ସହ ଶୁଭେଚ୍ଛା ଜଣାଉଛି। ଏଥିସହ ଏହି ପୁରସ୍କାର ଦୌଡ଼ରେ ଅନ୍ୟ ୪ କ୍ରୀଡ଼ାବିତ୍‌ଙ୍କୁ ମଧ୍ୟ ମୋର ଶୁଭେଚ୍ଛା।

Comments
Loading...