କ୍ରାଇମବ୍ରାଞ୍ଚ ଏସଟିଏଫର ଚଢାଉ, କୋଟିଏ ଟଙ୍କାର ହାଡ୍‌କୋକ୍‌ ଜବତ

୯ଟି ହାଡ୍‌କୋକ୍‌ ବୋଝେଇ ଟ୍ରକ, ଗୋଟିଏ ଜେସିବି ଅଟକ

ଗୁରୁଡିଝାଟିଆ: ରାଜ୍ୟ କ୍ରାଇମବ୍ରାଞ୍ଚର ଏସଟିଏଫ ଟିମ ଆଜି ଗୁରୁଡିଝାଟିଆ ଥାନା ଅନ୍ତର୍ଗତ ବଉଳ ଓ ଚୌଦ୍ୱାର ଥାନା ଅନ୍ତର୍ଗତ ନୂଆପାଟଣା ଠାରେ ଚଢାଉ କର ପ୍ରାୟ ୧କୋଟି ଟଙ୍କାର ହାଡ୍‌କୋକ୍‌ ଜବତ କରିଛନ୍ତି। ଏହି ଚୋରା କାରବାରର ମାଷ୍ଟରମାଇଣ୍ଡ ଥିବା ଜୈନିକ ଯୁବକକୁ ଅଟକ ରଖି ଅଧିକ ତଥ୍ୟ ହାସଲ କରିବା ପାଇଁ ପଚରାଉଚରା ଚାଲିଛି। ଆଜି ଅପରାହ୍ନ ପ୍ରାୟ ୧୨ଟା ବେଳେ ବିଶ୍ୱସ୍ତ ସୁତ୍ରରୁ ଖବର ପାଇ ଅତିରିକ୍ତ ଏସପି ତେଜରାଜ ପଟେଲଙ୍କ ନେତୃତ୍ୱରେ ଡିଏସପି ପ୍ରବୀଣ ତ୍ରିପାଠୀ, ଇନ୍ସପେକ୍ଟର ଅଶୋକ କୁମାର ଗିରି, ସବଇନ୍ସପେକ୍ଟର ନଳୀନିକାନ୍ତ ଦାସ ପ୍ରମୁଖ ଚଢାଉରେ ଅଂଶଗ୍ରହଣ କରି ୯ଟି ହାଡକୋକ ବୋଝେଇ ଟ୍ରକ ଓ ଗୋଟିଏ ଜେସିବିକୁ ଜବତ କରିଛନ୍ତି। ଜବତ ଗାଡିଗୁଡିକୁ ଚୌଦ୍ୱାର ପୁଲିସକୁ ହସ୍ତାନ୍ତର କରିଛନ୍ତି।


ପ୍ରକାଶଯୋଗ୍ୟ ଅଟକ ଥିବା ମାଷ୍ଟରମାଇଣ୍ଡ କୋଇଲା ଓ ହାଡ୍‌କୋକ୍‌ ବୋଝେଇ ଟ୍ରକ ଚାଳକମାନଙ୍କୁ ପ୍ରଲୋଭିତ କରି ଅତି ଚତୁରତାର ସହିତ ପ୍ରତ୍ୟେକ ଟ୍ରକ ଗୁଡିକରୁ ଦୁଇଟନ ଲେଖାଏଁ ହାଡ୍‌କୋକ୍‌ ଓ କୋଇଲା ଖାଲି କରିବା ପରେ ଟ୍ରକ ଭିତରେ କୋଇଲାଗୁଣ୍ଡ ଭରିକରିଥାଏ। ଯଦ୍ୱାରା କି କୋଇଲାର ପୂର୍ବ ଓଜନ ବଜାୟ ରହିଥାଏ। ଅତି କୌଶଳରେ ଟ୍ରକମାନଙ୍କରୁ ଖାଲି କରୁଥିବା ବେଳେ ଟ୍ରକର ସିଲକୁ ମଧ୍ୟ ଫିଟାଯାଇନଥାଏ। ଏହି ଚୋରା କାରବାର ୫୫ ନଂ ଜାତୀୟ ରାଜପଥ ପାଶ୍ୱରେ ରୀତିମତ କରାଯାଉଥିଲା। କିଭଳି ଭାବରେ ଏହି ଚୋରା କାରବାରକୁ ଚୌଦ୍ୱାର ଓ ଗୁରୁଡିଝାଟିଆ ପୋଲିସ ଜାଣିପାରୁନଥିଲେ ତାହା ପ୍ରଶ୍ନବାଚୀ ସୃଷ୍ଟି କରିଛି। ଅଟକ ଅଭିଯୁକ୍ତ ସ୍ଥାନୀୟ ଅଞ୍ଚଳରେ ନିଜର ପ୍ରଭାବ ବିସ୍ତାର କରି ଏହି କାରବାର କରିଚାଲିଥିଲା। ଭୟରେ କେହି ମୁହଁ ଖୋଲୁନଥିଲେ। ଆଜିର ଚଢାଉରେ ଭାଗ ନେଇଥିବା ଏସଟିଏଫ ଟିମର ବରିଷ୍ଠ ଅଧିକାରୀଙ୍କ ଠାରୁ ପ୍ରକାଶ ଝାଡଖଣ୍ଡର ଧାନବାଦରୁ ହାଡ୍‌କୋକ୍‌ ବିଭିନ୍ନ ଶିଳ୍ପ ପ୍ରତିଷ୍ଠାନକୁ ଗଲାବେଳେ ବାଟରେ ଚାଳକମାନେ ଲୋଭର ବଶବର୍ତ୍ତି ହୋଇ ରାଜପଥ ପାଶ୍ୱର୍ରେ ବେଆଇନ ହାଡ୍‌କୋକ୍‌ ଓ କୋଇଲା ଡିପୋ ମାନଙ୍କରେ ଖାଲି କରିବା ସହିତ ମୋଟା ଅଙ୍କର ଟଙ୍କା ପାଇଥାନ୍ତି।
ଚୋରା କୋଇଲା ଓ ହାଡ୍‌କୋକ୍‌ ଡିପୋ କରିଥିବା ବେପାରୀମାନେ କଳାଟଙ୍କାର ମାଲିକ ହୋଇ ଲାଲେଲାଲ୍ ହେବାରେ ଲାଗିଛନ୍ତି। ଏହି ଚଢାଉ ସମୟରେ ଏସଟିଏଫ ଟିମକୁ ନିଧିପୁର ଆରଆଇ ସୁଚନ୍ଦ୍ର ମହାନ୍ତି, ଖୁଣ୍ଟୁଣୀ ଆରଆଇ ପ୍ରଭାତ କୁମାର ଖୁଣ୍ଟିଆ ଓ ଇନ୍ଦ୍ରାଣୀ ପାଟଣା ଆରଆଇ ଆଶିଷ କୁମାର ସାହୁ ସହଯୋଗ କରିଥିବା ବେଳେ ଚୌଦ୍ୱାର ଟିପିଏମ ପୁଲିସ ଉପସ୍ଥିତ ଥିଲେ।

Comments are closed.