ଚୌଦ୍ୱାର : ଚୌଦ୍ୱାର ସହରାଞ୍ଚଳରେ କୋଭିଡ଼ ଟୀକାକରଣ କାର୍ଯ୍ୟ ଏବେ ଯୋର ଧରିଛି। ଗତ ସପ୍ତାହର ସୋମବାର ଦିନ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମରେ ପ୍ରଥମେ ପୌରପାଳିକାର କର୍ମଚାରୀ ମାନଙ୍କୁ ଟିକା ପ୍ରଦାନ କରା ଯାଇଥିବାବେଳେ ଚଳିତ ସପ୍ତାହର ସୋମବାର ଦିନ ସାଧାରଣଙ୍କୁ ଟୀକାଦାନ କାର୍ଯ୍ୟକ୍ରମ ଆରମ୍ଭ ହୋଇଛି। ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ତରଫରୁ ଆରମ୍ଭ କରାଯାଇଥିବା ଟୀକା କରଣ କାର୍ଯ୍ୟକ୍ରମରେ ଚୌଦ୍ୱାର ସହରାଞ୍ଚଳ ସ୍ୱାସ୍ଥ୍ୟ କେନ୍ଦ୍ରରେ ଟୀକା ନେବା ପାଇଁ ବରିଷ୍ଠ ନାଗରିକ ମାନଙ୍କର ଭିଡ଼ ଜମୁଛି। ଏଯାବତ୍ ଚୌଦ୍ୱାର ସହରର ୧୫୦୦ରୁ ଉର୍ଦ୍ଧ ବରିଷ୍ଠ ନାଗରିକ କୋଭିସିଲ୍ଡ ଟୀକାର ପ୍ରଥମ ଡୋଜ୍ ନେଇ ସାରିଥିବା ସ୍ୱାସ୍ଥ୍ୟକେନ୍ଦ୍ର ସୁତ୍ରରୁ ପ୍ରକାଶ। ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡିଇଓ ଜ୍ୟୋତି ରଞ୍ଜନ ସାହୁ, କୋଭିଡ଼ ଟୀକା ପ୍ରଦାନ ସମ୍ପର୍କିତ ବିଶେଷ ତାଲିମ୍ପ୍ରାପ୍ତ ସ୍ୱାସ୍ଥ୍ୟ କର୍ମୀ ଶୁଭଶ୍ରୀ ବାରିକ ଓ ଅନ୍ନପୂର୍ଣ୍ଣା ବେହେରା ଟୀକା କରଣ କରୁଛନ୍ତି। ଚୌଦ୍ୱାର ସହରାଞ୍ଚଳ ସ୍ୱାସ୍ଥ୍ୟକେନ୍ଦ୍ରରେ ପ୍ରତି ସୋମବାର, ବୁଧବାର ଓ ଶୁକ୍ରବାରରେ ୬୦ ବର୍ଷରୁ ଉର୍ଦ୍ଧ ନାଗରିକ ମାନଙ୍କୁ ଟିକା ପ୍ରଦାନ କରାଯିବ ବୋଲି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ତରଫରୁ କୁହାଯାଇଛି। ମହାମାରୀ କରୋନାକୁ ରୋକିବା ପାଇଁ ସରକାରଙ୍କ ଏହି ପଦକ୍ଷେପରେ ଲୋକମାନେ ଭୟଭୀତ ନହୋଇ ଟିକା ନେବାକୁ ଆଗେଇ ଆସିବାକୁ ଚୌଦ୍ୱାର ନିର୍ବାହୀ ଅଧିକାରୀ ପବିତ୍ର ବେହେରା ଅନୁରୋଧ କରିଛନ୍ତି।
Comments