ଗୃହ ପ୍ରବେଶ ଭୋଜିରେ ଚଢ଼ଉ; ୭ ହଜାର ଟଙ୍କା ଜୋରିମାନା

ରାଜଧାନୀର ୩ ଶୋ’ରୁମ୍‍କୁ ଅର୍ଥତଣ୍ଡ

ଭୁବନେଶ୍ୱର : କୋଭିଡ୍‍ ନିୟମାବଳୀ ଉଲ୍ଲଙ୍ଘନକାରୀ ସାବଧାନ। ବିଏମ୍‌ସି ବୁଧବାରଠାରୁ ପୂରା ଦମ୍‌ରେ ଅଭିଯାନ ଚଳାଇଛି। ଏହିକ୍ରମରେ ରାଜଧାନୀର ୩ ଶୋ’ ରୁମ୍‍ ମାଲିକଙ୍କୁ ବୁଧବାର ବିଏମ୍‍ସି ଜୋରିମାନା କରିଛି। ଏହା ସହ ସୁନ୍ଦରପଦା ଆଜାଦନଗରରେ ଅନୁଷ୍ଠିତ ଗୃହ ପ୍ରବେଶ କାର୍ଯ୍ୟକ୍ରମରେ ବିଏମ୍‍ସି ଚଢ଼ଉ କରି ମଧ୍ୟାହ୍ନ ଭୋଜନ ପାର୍ଟି ବନ୍ଦ କରିବା ସହିତ ମାଲିକଙ୍କୁ ୭ ହଜାର ଟଙ୍କା ଜୋରିମାନା କରି ଏକାଠି ନ ହେବାକୁ ତାଗିଦ୍‌ କରିଛି।
ବିଏମ୍‍ସି, ସ୍ମାର୍ଟସିଟି ଏବଂ କମିସନରେଟ ପୁଲିସର ମିଳିତ ସ୍କ୍ୱାଡ୍‌ ତିନି ମଣ୍ଡଳରେ ଥିବା ବିଭିନ୍ନ ଶୋ’ରୁମ୍‍, ଦୋକାନ ବଜାରରେ କୋଭିଡ୍‍ ନିୟମାବଳୀ ଅନୁପାଳନ ହେଉଛି ନା ନାହିଁ ଯାଞ୍ଚ କରିଥିଲେ। ଅଶୋକନଗରସ୍ଥିତ ମାକ୍ସ ଶୋ’ ରୁମ୍‍, ଶ୍ରୀ ଲେଦର ଏବଂ ଇଜି ବାୟ ଶୋ’ରୁମ୍‍ରେ ସ୍କ୍ୱାଡ୍‌ କୋଭିଡ୍‍ ନିୟମାବଳୀ କଡ଼ାକଡ଼ି ଅନୁପାଳନ ହେଉଛି ନାହିଁ ଯାଞ୍ଚ କରିଥିଲା। ଏଗୁଡ଼ିକରେ ସାମାଜିକ ଦୂରତା ରହୁ ନଥିବା ସହିତ ମାସ୍କ ପିନ୍ଧୁ ନ ଥିବାରୁ ଯଥାକ୍ରମେ ୧୦ ହଜାର, ଏକ ହଜାର ଏବଂ ତିନି ହଜାର ଲେଖାଏଁ ଜୋରିମାନା କରାଯାଇଛି।
ସେହିପରି ଉତ୍ତର ମଣ୍ଡଳରୁ ୨୦ ହଜାର ୨୦୦ ଏବଂ ଦକ୍ଷିଣ-ପଶ୍ଚିମ ମଣ୍ଡଳରୁ ୩ ହଜାର ଟଙ୍କା ଜୋରିମାନା ଆଦାୟ କରାଯାଇଥିବା ବିଏମ୍‍ସି ସୂଚନା ଦେଇଛି।

Comments
Loading...