କୋଭିଡ-୧୯ ଆରୋଗ୍ୟ ହାର ୮୫.୨୫ପ୍ରତିଶତକୁ ବୃଦ୍ଧି; ହ୍ରାସ ପାଉଛି ମୃତ୍ୟୁ ସଂଖ୍ୟା

ନୂଆଦଲ୍ଲୀ : ଦେଶରେ କୋଭିଡ-୧୯ ଆରୋଗ୍ୟ ହାର ୮୫.୨୫ ପ୍ରତିଶତରେ ପହଞ୍ଚିଛି। ଗତ ୨୪ ଘଣ୍ଟା ମଧ୍ୟରେ ୮୩ ହଜାର ଏବଂ ୧୧ ଜଣ ଆରୋଗ୍ୟ ଲାଭ କରିଛନ୍ତି। ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ମୋଟ ଆରୋଗ୍ୟଙ୍କ ସଂଖ୍ୟା ୫୮ ଲକ୍ଷ ୨୭ ହଜାର ୭୦୪କୁ ବୃଦ୍ଧି ପାଇଛି।

ସ୍ବାସ୍ଥ୍ୟ ମନ୍ତ୍ରଣାଳୟ କହିଛି, କ୍ରମାଗତ ଭାବେ ବୃଦ୍ଧି ପାଉଥିବା ଆରୋଗ୍ୟ ହାର ଏହା ସୁନିଶ୍ଚିତ କରିଛି ଯେ ଦେଶର ପ୍ରକୃତ ସଂକ୍ରମିତ ସଂଖ୍ୟା ହ୍ରାସ ପାଇଛି ଏବଂ ବର୍ତ୍ତମାନ ସମୁଦାୟ ଆକ୍ରାନ୍ତ ହାରର ମାତ୍ର ୧୩.୨୦ ପ୍ରତିଶତ ରହିଛି।

ବର୍ତ୍ତମାନ ଦେଶରେ ମୋଟ ସକ୍ରିୟ କାରାନା ସଂକ୍ରମିତଙ୍କ ସଂଖ୍ୟା ୯ ଲକ୍ଷ ୨ ହଜାର ୪୨୫ ରହିଛି। ମନ୍ତ୍ରଣାଳୟ କହିଛି ଯେ ସରକାରଙ୍କର ପ୍ରଭାବଶାଳୀ ରଣ କୌଶଳ ଯୋଗୁଁ ଅଧିକ ସଂକ୍ରମିତ ସୁସ୍ଥ ହେବା ସହ ମୃତ୍ୟୁହାର ହ୍ରାସ ପାଇଛି। ବର୍ତ୍ତମାନ ଭାରତର ମୃତ୍ୟୁ ହାର ୧.୫୪ ପ୍ରତିଶତ ରହିଛି। ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ବର୍ତ୍ତମାନ ୬୮ ଲକ୍ଷ ୩୫ ହଜାର ୬୫୫ ରେ ପହଞ୍ଚିଛି। ଗତ ୨୪ ଘଣ୍ଟା ମଧ୍ୟରେ ୯୭୧ ଜଣଙ୍କର ମୃତ୍ୟୁ ପରେ ମୃତ୍ୟୁ ସଂଖ୍ୟା ୧ ଲକ୍ଷ ୫ ହଜାର ଏବଂ ୫୨୬କୁ ବୃଦ୍ଧି ପାଇଛି।

ଆଇସିଏମଆର ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ୧୧ ଲକ୍ଷ ୯୪ ହଜାରରୁ ଅଧିକ ନମୁନା ପରୀକ୍ଷା କରାଯାଇଛି। ଏପର୍ଯ୍ୟନ୍ତ ମୋଟ ନମୁନା ପରୀକ୍ଷା ସଂଖ୍ୟା  ୮ କୋଟି ୩୪ ଲକ୍ଷରେ ପହଞ୍ଚିଛି।