ନୂଆଦିଲ୍ଲୀ: ଫଡନବିସଙ୍କୁ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରାଇବା ନେଇ ରାଜ୍ୟପାଳ ଭଗତ ସିଂହ କୋଶିୟାରୀଙ୍କ ନିଷ୍ପତ୍ତିକୁ ବିରୋଧ କରି ଶିବସେନା-ଏନସିପି-କଂଗ୍ରେସର ମୂଳ ଆବେଦନ ଉପରେ ଆଗାମୀ ୮ ସପ୍ତାହ ମଧ୍ୟରେ ବିଚାର ହେବ ବୋଲି ସୁପ୍ରିମକୋର୍ଟ ମଙ୍ଗଳବାର କହିଛନ୍ତି। ଫଡ଼ନବିସଙ୍କୁ ଆସ୍ଥା ଭୋଟର ସମ୍ମୁଖୀନ ହେବାକୁ ନିର୍ଦ୍ଦେଶ ଦେବା ବେଳେ ବିଚାରପତି ଏନ.ଭି ରମନା, ଅଶୋକ ଭୂଷଣ ଏବଂ ସଞ୍ଜୀବ ଖାନ୍ନାଙ୍କ ପୀଠ କହିଛନ୍ତି ସାମ୍ବିଧାନିକ ବ୍ୟବସ୍ଥା ଓ ନ୍ୟାୟପାଳିକା ଭଳି ପୃଥକ କ୍ଷେତ୍ରର ସମ୍ମାନ କରାଯିବା ଦରକାର। ଅଦାଲତଙ୍କୁ ସର୍ବଶେଷ ବିକଳ୍ପ ଭାବେ ବିଚାର କରାଯିବା ଉଚିତ। ମହାରାଷ୍ଟ୍ର ମାମଲାରେ ଏହା ହିଁ କରାଯାଇଛି। ସଂସଦୀୟ ପ୍ରସଙ୍ଗରେ ଅଦାଲତ ହସ୍ତକ୍ଷେପ କରିପାରିବେ କି ନାହିଁ ତାହା ଏକ ବୃହତ ପ୍ରଶ୍ନବାଚୀ ସୃଷ୍ଟି କରିଛି। କିନ୍ତୁ ଅଦାଲତଙ୍କ କ୍ଷେତ୍ରାଧିକାର ଓ ସଂସଦୀୟ ସ୍ବାଧୀନତାର ସୀମା ସମ୍ବନ୍ଧୀୟ ଅନ୍ୟ ଆଇନଗତ ଓ ସାମ୍ବିଧାନିକ ପ୍ରସଙ୍ଗ ଉପରେ ପରେ ବିଚାର କରାଯିବ। କିନ୍ତୁ ବର୍ତ୍ତମାନ ସ୍ଥିତିରେ ଆସ୍ଥା ଭୋଟ କରାଇବା ନିହାତି ଜରୁରୀ।
Comments are closed.