ଦରମା ନେବେ ନାହିଁ ଆନ୍ଧ୍ର ମୁଖ୍ୟମନ୍ତ୍ରୀ ଓ ମନ୍ତ୍ରୀ ସମୂହ

ହାଇଦ୍ରାବାଦ : କରୋନା ପରିସ୍ଥିତି ଯୋଗୁଁ ବିଭିନ୍ନ ରାଜ୍ୟ ତଥା ଦେଶର ଆର୍ଥିକ ସ୍ଥିତି ଗୁରୁତର । ଏପରି ସ୍ଥିତିରେ ବିଭିନ୍ନ ରାଜ୍ୟ ସରକାର ସରକାରୀ କର୍ମଚାରୀଙ୍କ ଦରମାର କିଛି ଅଂଶ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି । ଓଡ଼ିଶା, ମହାରାଷ୍ଟ୍ର, ତେଲଙ୍ଗାନା, ଉତ୍ତରପ୍ରଦେଶ ସରକାର ଏଥିନେଇ ବିଧିବଦ୍ଧ ଘୋଷଣା କରିଛନ୍ତି। ଆନ୍ଧ୍ରପ୍ରଦେଶରେ ଜଗନ୍ ସରକାର ମଧ୍ୟ କରୋନାଜନିତ ଆର୍ଥିକ ସ୍ଥିତିର ମୁକାବିଲା ନିମନ୍ତେ ଗ୍ରହଣ କରିଛନ୍ତି ପଦକ୍ଷେପ। ମୁଖ୍ୟମନ୍ତ୍ରୀ, ରାଜ୍ୟର ମନ୍ତ୍ରୀ ସମୂହ, ବିଧାୟକ, ବିଭିନ୍ନ ନିଗମର ସଦସ୍ୟ ଓ ଅଧ୍ୟକ୍ଷ, ବିଭିନ୍ନ ପୌରାଞ୍ଚଳରେ ନିର୍ବାଚିତ ପ୍ରତିନିଧି ବର୍ତ୍ତମାନ ପରିସ୍ଥିତିରେ ଦରମା ନେବେ ନାହିଁ। ପରବର୍ତ୍ତୀକାଳରେ ଏହି ଦରମା ପ୍ରଦାନ କରାଯିବ ବୋଲି କୁହାଯାଇଛି।
ସେହିପରି ସର୍ବଭାରତୀୟ ସେବା ଅଧିକାରୀ (ଆଇଏଏସ୍, ଆଇପିଏସ୍, ଆଇଏଫ୍ଏସ୍)ମାନଙ୍କ ଦରମାର ୬୦ % ଓ ରାଜ୍ୟର ଅନ୍ୟ ବର୍ଗର କର୍ମଚାରୀଙ୍କ ଦରମା ୫୦% ବକେୟା ରଖାଯିବାକୁ ନିଷ୍ପତ୍ତି ହୋଇଛି । କେବଳ ୪ର୍ଥ ଶ୍ରେଣୀ କର୍ମଚାରୀଙ୍କ ଦରମା ମାତ୍ର ୧୦% ବକେୟା ରହିବ ।

Comments are closed.