ବ୍ରିଟେନରେ କରୋନା ସଂକ୍ରମଣର ଏକ ନୂତନ ଧାରକୁ ନେଇ ଆଶଙ୍କା ପ୍ରକାଶ ପାଇଛି। ସେଠାରୁ ଆସିଥିବା କିଛି ବିମାନରେ ଏପର୍ଯ୍ୟନ୍ତ ୧୧ ଜଣ ଲୋକ ପଜିଟିଭ ଥିବା ଜଣାପଡିଛି। ଏହି ବିମାନ ମଧ୍ୟରୁ ଗୋଟିଏ ଗତକାଲି ରାତିରେ ଦିଲ୍ଲୀରେ ପହଞ୍ଚିଥିଲା। ସେଥିରେ ଆସିଥିବା ୨୬୬ ଜଣଙ୍କ ମଧ୍ୟରୁ ପାଞ୍ଚ ଜଣ ସଂକ୍ରମିତ ହୋଇଥିବା ଜଣାପଡିଛି। ଏଥିସହିତ କୋଲକାତାରେ ଦୁଇ ଜଣ ପଜିଟିଭ୍ ଚିହ୍ନଟ ହୋଇଛନ୍ତି। ସେମାନେ ରବିବାର ଦିନ ଲଣ୍ଡନରୁ କୋଲକାତା ଆସିଥିଲେ।
ସେହିଭଳି ଅହମ୍ମଦାବାଦକୁ ଆସିଥିବା ବିମାନରେ ୪ ଜଣ ଯାତ୍ରୀ ସଂକ୍ରମିତ ହୋଇଥିବା ଜଣାପଡିଛି। ସେମାନଙ୍କ ମଧ୍ୟରେ ଜଣେ ବ୍ରିଟିଶ ନାଗରିକ ଥିବା ଜଣାପଡିଛି। ସଂକ୍ରମିତ ବ୍ୟକ୍ତିଙ୍କ ନମୁନାର ଅଧିକ ଅନୁସନ୍ଧାନ ପାଇଁ ଦିଲ୍ଲୀସ୍ଥିତ ଜାତୀୟ ରୋଗ ନିୟନ୍ତ୍ରଣ କେନ୍ଦ୍ରକୁ ପଠାଯାଇଛି। ସମସ୍ତ ଯାତ୍ରୀ ଏବଂ ବିମାନ ପରିଚାଳନା ସଦସ୍ୟଙ୍କୁ ଅଲଗା ଅଲଗା ରଖାଯାଇଛି।
ଏହି ସମୟରେ ଲଣ୍ଡନରୁ ମୁମ୍ବାଇକୁ ଫେରିଥିବା ଦୁଇ ବିମାନ ଯାତ୍ରୀଙ୍କୁ ମଧ୍ୟ ବିମାନ ବନ୍ଦରରୁ ହୋଟେଲକୁ ନିଆଯାଇଥିଲା। ସେମାନଙ୍କୁ ପୃଥକ ଭାବରେ ରଖାଯାଇଛି। ତେବେ କିଛି ଯାତ୍ରୀ ଏଥିରେ ଅସନ୍ତୋଷ ବ୍ୟକ୍ତ କରି କହିଛନ୍ତି ଯେ ଏହା ପୂର୍ବରୁ ସେମାନଙ୍କୁ କୌଣସି ସୂଚନା ଦିଆଯାଇନଥିଲା। ସୂଚନା ଅନୁଯାୟୀ କିଛି ଦିନ ପୂର୍ବରୁ ବ୍ରିଟେନରେ କରୋନାର ଏକ ନୂଆ ଧାରା ଦେଖିବାକୁ ମିଳିଛି ଯାହା ପୂର୍ବ କରୋନା ଭୁତାଣୁ ଅପେକ୍ଷା ୭୦ ପ୍ରତିଶତ ଅଧିକ ବେଗରେ ବ୍ୟାପିବା କ୍ଷମତା ରଖିଥାଏ।
ବ୍ରିଟେନରେ ଏକ ନୂତନ କରୋନା ଧାରା ଚିହ୍ନଟ ପରେ ମହାରାଷ୍ଟ୍ର ସରକାର ମଧ୍ୟ ପୂର୍ବ ଏବଂ ୟୁରୋପରୁ ଆସୁଥିବା ସମସ୍ତ ଯାତ୍ରୀଙ୍କୁ ୧୪ ଦିନ ପାଇଁ କ୍ୱାରେଣ୍ଟିନରେ ରଖିବାକୁ ନିର୍ଦ୍ଦେଶ ଦେଇଛନ୍ତି। ଆଜି ରାତି ୧୧ଟା ୫୯ ସୁଦ୍ଧା ବ୍ରିଟେନରୁ ଯାତ୍ରୀମାନେ ଭାରତ ଆସିପାରିବେ। ଏହା ପରେ ସେଠାରୁ ଡିସେମ୍ବର ୩୧ ପର୍ଯ୍ୟନ୍ତ ବିମାନ ଉଡ଼ାଣ ଉପରେ ଅସ୍ଥାୟୀ ପ୍ରତିବନ୍ଧକ ଜାରି କରାଯାଇଛି। ୟୁରୋପରୁ ମୁମ୍ବାଇକୁ ଆସୁଥିବା ଯାତ୍ରୀମାନଙ୍କୁ କ୍ୱାରେଣ୍ଟିନ କେନ୍ଦ୍ର ଏବଂ ହୋଟେଲକୁ ନେବା ପାଇଁ ୫୦ରୁ ଅଧିକ ବସ୍ ବ୍ୟବସ୍ଥା କରାଯାଇଛି। ପ୍ରତ୍ୟେକ ଯାତ୍ରା ପରେ ବସ୍ ଗୁଡିକୁ ସାନିଟାଇଜ୍ କରାଯାଉଥିବା ଜଣାପଡିଛି।
Comments are closed.