କେରଳ: ଡ଼ାକ୍ତରୀ ଚିଠା ଦେଖାଇ ଲୋକ ମାଗୁଛନ୍ତି ମଦ-ପାସ୍

ଥିରୁବନନ୍ତପୁରମ୍‌ : କରୋନା ସମୂହ ସଂକ୍ରମଣ ଭୟରେ ଏବେ ସବୁଆଡ଼େ ଲକ୍ଡ଼ାଉନ୍ । କେନ୍ଦ୍ର ସରକାରଙ୍କ ନିର୍ଦେଶ ଅନୁସାରେ ଏହି ଲକ୍ଡ଼ାଉନ ୧୫ ଏପ୍ରିଲ ପର୍ଯ୍ୟନ୍ତ ବଳବତ୍ତର ରହିବ । ହେଲେ କିଛି ଲୋକଙ୍କୁ ଏବେ ଘାରିଛି ମଦ ଚିନ୍ତା । କେରଳରେ ମଦ କିଣିବାକୁ ଯିବା ପାଇଁ ଲୋକମାନେ ପୁଲିସକୁ ପାସ୍ ମାଗୁଥିବା ଦେଖିବାକୁ ମିଳିଛି । ଏପରିକି ଡ଼ାକ୍ତରୀ ଚିଠା ସହ ସେମାନଙ୍କୁ ମଦ ଦିଆଯିବାକୁ ୪୦ ଜଣ ଆବେଦନକାରୀ କେରଳ ସରକାରଙ୍କୁ ଦରଖାସ୍ତ ପଠାଇଛନ୍ତି ।
ଲକ୍ଡ଼ାଉନ ସମୟରେ ମଦ ଦୋକାନ ଖୋଲିବାକୁ କିଛିଦିନ ତଳେ ସୋସିଆଲ ମିଡ଼ିଆରେ ଯୁକ୍ତି ବାଢ଼ିଥିଲେ ବରିଷ୍ଠ ବଲିଉଡ଼ ଅଭିନେତା ଋଷି କପୁର । ଘରେ ବସିବସି ଲୋକମାନେ ବିଷାଦ (ଫ୍ରଷ୍ଟେସନ)ର ଶିକାର ହେଉଥିବାରୁ ସେମାନଙ୍କ ପାଇଁ ମଦ ଦୋକାନ ଖୋଲିବାର ଆବଶ୍ୟକତା ଥିବା ସେ କହିଥିଲେ । ଏହାକୁ ନେଇ ସୋସିଆଲ ମିଡ଼ିଆରେ ଅନେକ ତାଙ୍କୁ ଟ୍ରୋଲ କରିଥିଲେ ।
ମାତ୍ର କେରଳରେ ମଦ ପିଇବା ନିମନ୍ତେ ସରକାରଙ୍କୁ ଆବେଦନ କରିବା ପରି ଘଟଣା ଅନ୍ୟ ରାଜ୍ୟରେ ଦେଖିବାକୁ ମିଳିନାହିଁ । କେରଳ ଅବକାରୀ ବିଭାଗର ଜଣେ ବରିଷ୍ଠ ଅଧିକାରୀଙ୍କ ସୂଚନା ଅନୁସାରେ ଏର୍ଣ୍ଣାକୁଲମ୍ ଜିଲାରୁ ୮, କୋଟ୍ଟାୟାମ ଜିଲାରୁ ୪, ଥିରୁବନନ୍ତପୁରମରୁ ୩ଟି ସମେତ ମୋଟ ୪୦ଟି ଆବେଦନ ସରକାରଙ୍କ ନିକଟରେ ପହଞ୍ଚିଛି । ଏଗୁଡ଼ିକୁ ରାଜ୍ୟ ପାନୀୟ ନିଗମକୁ ପଠାଯାଇଛି; ସେମାନେ ଆବଶ୍ୟକ ଅନୁସାରେ ସମ୍ପୃକ୍ତ ବ୍ୟକ୍ତିଙ୍କ ଘରେ ମଦ ପହଞ୍ଚାଇ ଦେବେ । ତେବେ ସରକାରୀ ନିର୍ଦେଶ ଅନୁସାରେ ଜଣେ ବ୍ୟକ୍ତିଙ୍କୁ ସାପ୍ତାହିକ ସର୍ବାଧିକ ୩ ଲିଟର ପର୍ଯ୍ୟନ୍ତ ମଦ ଯୋଗାଇ ଦିଆଯିବ । ପରବର୍ତ୍ତୀ ସପ୍ତାହ ପାଇଁ ସେମାନଙ୍କୁ ନିର୍ଦ୍ଧାରିତ ଫର୍ମରେ ସାନି ଆବେଦନ କରିବାକୁ ପଡ଼ିବ ବୋଲି ଅଧିକାରୀ ଜଣକ କହିଛନ୍ତି ।
ତେବେ କେରଳ ସରକାରୀ ଡ଼ାକ୍ତରୀ ସଂଘ (କେଜିଏମ୍ଓଏ) ଏପରି ବ୍ୟବସ୍ଥାକୁ ବିରୋଧ କରିଛି । କୌଣସି ଡ଼ାକ୍ତର କେବେ ବି ପ୍ରେସକ୍ରିପ୍ସନରେ ମଦ ପ୍ରେସକ୍ରାଇବ କରି ନ ଥାନ୍ତି ବୋଲି ସଂଘ ପକ୍ଷରୁ କୁହାଯାଇଛି । ଏହାର ପ୍ରତିବାଦରେ ସେମାନେ କଳାଦିବସ ପାଳନ କରିବାକୁ ଧମକ ଦେଇଛନ୍ତି । ଅନ୍ୟପକ୍ଷରେ ଡ଼ାକ୍ତରୀ ଚିଠାରେ ମଦ ଯୋଗାଣ ନିଷ୍ପତ୍ତିକୁ ଭାରତୀୟ ମେଡ଼ିକାଲ ଆସୋସିଏସନ (ଆଇଏମଏ) ଅଯୌକ୍ତିକ ଓ ଅବୈଜ୍ଞାନିକ ବୋଲି ଅଭିହିତ କରିଛି ।
ଲକ୍ଡ଼ାଉନ ସମୟରେ ମଦ ଦୋକାନ ବନ୍ଦକୁ ନେଇ କେରଳରେ ବିରୋଧ କରାଯାଇଥିଲା। କିଛି ଲୋକ ମଦ ଦୋକାନ ବନ୍ଦ ଯୋଗୁଁ ଆତ୍ମହତ୍ୟା ମଧ୍ୟ କରିଥିଲେ।

Comments are closed.