ଭୁବନେଶ୍ବର : ମହାମାରୀ କରୋନାକୁ ମୁକାବିଲା କରିବା ପାଇଁ ସତର୍କତା ମୂଳକ ଭାବେ ରାଜ୍ୟ ସରକାର ରାଜ୍ୟର ସମସ୍ତ ଧର୍ମୀୟ ଅନୁଷ୍ଠାନ ଯଥା ମନ୍ଦିର, ମସଜିଦ୍ ଓ ଗୀର୍ଜାକୁ ବନ୍ଦ ରଖିବାକୁ ନିର୍ଦେଶ ଦିଆଯାଇଛି। ଏହି ଧର୍ମୀୟ ଅନୁଷ୍ଠାନ ବନ୍ଦ ରହୁଥିଲେ ମଧ୍ୟ ସେଠାରେ ଭଗବାନଙ୍କ ଯାହା ଦୈନିକ ରୀତିନୀତି ତାହା ବନ୍ଦ ହେବ ନାହିଁ। ଧର୍ମୀୟ ଅନୁଷ୍ଠାନ ଗୁଡିକରେ ଲୋକଙ୍କ ଭିଡ ରହୁଥିବାରୁ ଏବଂ ଏହି ସବୁସ୍ଥାନ ମାନଙ୍କରେ ସାମାଜିକ ଦୂରତ୍ବ ରହୁନଥିବାରୁ ଏହି ନିଷ୍ପତ୍ତି ନିଆଯାଇଥିବା କହିଛନ୍ତି ରାଜ୍ୟ ସରକାରଙ୍କ କୋଭିଡ-୧୯ ସଚେତନତା ଟିମର ମୁଖ୍ୟ ସୁବ୍ରତ ବାଗଚୀ। ଗୀତଗୋବିନ୍ଦ ସଦନରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୁବ୍ରତ ବାଗଚୀ କହିଛନ୍ତି ପୁରୀ ଜିଲାପ୍ରଶାସନ ପକ୍ଷରୁ କରୋନା ପାଇଁ ସତର୍କତା ମୂଳକଭାବେ ଆସନ୍ତାକାଲିଠୁ ଜଗନ୍ନାଥ ମନ୍ଦିରକୁ ଭକ୍ତ ମାନଙ୍କ ପାଇଁ ବନ୍ଦ କରାଯାଇଛି। ଧର୍ମୀୟ ଅନୁଷ୍ଠାନ ଗୁଡିକରେ ଲୋକମାନଙ୍କ ଭିଡ ଲାଗୁରହୁଥିବାରୁ ସରକାର ଏଥି ପ୍ରତି ବିଶେଷ ଦୃଷ୍ଟି ଦେଇଛନ୍ତି। ବର୍ତ୍ତମାନ ପରିସ୍ଥିତିରେ ରାଜ୍ୟର କୌଣସି ଧର୍ମୀୟ ସଭା ଏବଂ ପୂଜାପର୍ବାଣୀକୁ ବନ୍ଦ ରଖିବାକୁ ନିର୍ଦେଶ ଦିଆଯାଇଛି।
Comments are closed.