କରୋନା କଟକଣା ଉଲ୍ଲଙ୍ଘନ, ୭୬ ଜଣଙ୍କ ଠାରୁ ୧୦ ହଜାର ୪ ଶହ ଜୋରିମାନା

ଆଠଗଡ: ଆଠଗଡରେ ତଥା ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ଉଦ୍‍ବେଗଜନକ ହୋଇଥିବା ବେଳେ ଲୋକେ ସତର୍କ ଓ ସଚେତନ ହେଉନାହାଁନ୍ତି। କଟକ ଜିଲ୍ଲା ଓ ଖୋର୍ଦ୍ଧା ଜିଲ୍ଲାରେ କୋଭିଡ କଟକଣା ଉଲ୍ଲଙ୍ଘନକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ପୁଲିସ ତତ୍ପର ହୋଇ ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଆଠଗଡ ପୁଲିସ ମଧ୍ୟ ଗତ ୭ ଦିନ ହେବ ସହରାଞ୍ଚଳ ଓ ଗ୍ରାମାଞ୍ଚଳର ମାସ୍କ ପରିଧାନ କରିନଥିବା ଲୋକମାନଙ୍କୁ ଧରି ଜୋରିମାନା ଆଦାୟ କରିଛି।

ଏସଡିପିଓ ଆଲୋକ ରଞ୍ଜନ ରାୟ, ଆଇଆଇସି ଜ୍ଞାନରଞ୍ଜନ ମିଶ୍ରଙ୍କ ନେତୃତ୍ୱରେ ସହରର ମୁଖ୍ୟ ବଜାର, ମୁଖ୍ୟ ରାସ୍ତା ଓ ଅନ୍ୟ ଜନଗହଳି ପୂର୍ଣ୍ଣ ସ୍ଥାନରେ ଗତ ୩ଦିନରେ ଯାଞ୍ଚ କରାଯାଇ ମାସ୍କ ଆଦୌ ପିନ୍ଧିନଥିବା କିମ୍ବା ସଠିକ ଭାବେ ପିନ୍ଧିନଥିବା ୭୬ ଜଣଙ୍କଠାରୁ ୧୦୪୦୦ ଟଙ୍କା ଜୋରିମାନା ଆଦାୟ କରାଯାଇଛି। ଏସଆଇ ସନ୍ତୋଷ ପ୍ରଧାନ, ଶକୁନ୍ତଳା ଦାସ, ପୁଲିନ ପ୍ରଧାନ, ଏଏସଆଇ ମମତା ଦେଇ, ଲିଙ୍ଗରାଜ ସିଠ ମୁଖ୍ୟତଃ ଏହି ଚଢାଉରେ ଅଂଶ ଗ୍ରହଣ କରିଥିଲେ।

Comments
Loading...