ରାଜ୍ୟର ୧୧୦ଟି ସ୍ଥାନରେ ଟିକାକରଣ ପ୍ରାକ-ଅଭ୍ୟାସ ସଫଳ

ଆଜି ପୂର୍ବ ଘୋଷଣା ମୁତାବକ ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପୌରାଞ୍ଚଳରେ ଆଜି ଦ୍ୱିତୀୟ ପର୍ଯ୍ୟାୟ ଟିକାକରଣ ପ୍ରାକ-ଅଭ୍ୟାସ ସଫଳ ଭାବେ ଅନୁଷ୍ଠିତ ହୋଇଛି। ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ନିର୍ଦ୍ଦେଶକ ଡାକ୍ତର ବିଜୟ ପାଣିଗ୍ରାହୀ କହିଛନ୍ତି ଯେ ୧୧୦ଟି ସ୍ଥାନରେ କୋଭିଡ୍‍ ଟିକାର ପ୍ରାକ-ଅଭ୍ୟାସ ହୋଇଛି।

ଏଥିରେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର, ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର, ମେଡିକାଲ କଲେଜ୍‍ ଏବଂ ୧୧ଟି ଘରୋଇ ଡାକ୍ତରଖାନା ସାମିଲ ହୋଇଥିଲେ। ପ୍ରତି ସ୍ଥାନରେ ୨୫ ଜଣଙ୍କୁ ଡମି ଟିକା ଦିଆଯିବାର ବ୍ୟବସ୍ଥା କରାଯାଇଥିଲା। ଟିକା ନେବାର ୩୦ ମିନିଟ୍‍ ଭିତରେ ଯଦି ପାର୍ଶ୍ବ ପ୍ରତିକ୍ରିୟା ଦେଖାଯିବ ତାହେଲେ ସେମାନଙ୍କୁ ତୁରନ୍ତ ଚିକିତ୍ସାପାଇଁ ନିରୀକ୍ଷଣ କକ୍ଷରେ ରଖାଯିବା ସହ ସେଥିରେ ସମସ୍ତ ଜୀବନରକ୍ଷା ଔଷଧ ରଖାଯାଇଥିଲା।

କେନ୍ଦ୍ରରୁ ଖୁବ୍‍ ଶୀଘ୍ର ଟିକା ଆସିବ ବୋଲି ଡାକ୍ତର ପାଣିଗ୍ରାହୀ କହିଥିବା ବେଳେ ଡିଏମ୍‍ଇଟି ନିର୍ଦ୍ଦେଶକ ଡାକ୍ତର ସି.ବି.କେ. ମହାନ୍ତି କହିଛନ୍ତି ଯେ କୋଭିଡ ଟିକାର କୌଣସି ପାର୍ଶ୍ବ ପ୍ରତିକ୍ରିୟା ନାହିଁ। ତେଣୁ ଏହି ଟିକା ନେବାରେ ସଙ୍କୋଚ ନ କରିବାକୁ ସେ ପରାମର୍ଶ ଦେଇଛନ୍ତି।

Comments
Loading...