ଜନ୍ମର ୧୨ ଘଣ୍ଟା ମଧ୍ୟରେ ୬ ନବଜାତ କରୋନା ସଂକ୍ରମିତ

ଲଣ୍ଡନ : କରୋନା ସଂକ୍ରମିତ ମାତାଠାରୁ ଜନ୍ମିତ ଶିଶୁ ସଂକ୍ରମିତ ହୋଇ ଜନ୍ମ ହୋଇଥାଏ ନା ଜନ୍ମ ପରେ ସଂକ୍ରମିତ ହୁଏ ତାହାକୁ ନେଇ ଏକମତ ହୋଇ ପାରୁନାହାନ୍ତି ଡ଼ାକ୍ତର । ଗବେଷକମାନେ ଏହାକୁ ନେଇ ଅଧ୍ୟୟନ ଜାରି ରଖିଛନ୍ତି । ମାତ୍ର ଏ ସମ୍ପର୍କରେ କୌଣସି ନିଷ୍କର୍ଷ ବାହାରି ପାରିନାହିଁ । ବ୍ରିଟେନରେ କରୋନା ସଂକ୍ରମିତ ୬ ଜଣ ମହିଳାଙ୍କଠାରୁ ଜନ୍ମିତ ଶିଶୁମାନେ ୧୨ ଘଣ୍ଟା ମଧ୍ୟରେ କରୋନା ସଂକ୍ରମିତ ହୋଇଥିବା ସୂଚନା ମିଳିବା ପରେ ଡ଼ାକ୍ତରମାନଙ୍କ ପାଇଁ ଏକ ବଡ଼ ଆହ୍ବାନ ହୋଇଛି । ଅନୁସନ୍ଧାନ ଅନୁଯାୟୀ, ଏହା ବୋଧହୁଏ ଦୁନିଆର ପ୍ରଥମ ଘଟଣା ଯେଉଁଠାରେ ଜନ୍ମର ମାତ୍ର ୧୨ ଘଣ୍ଟା ମଧ୍ୟରେ ଶିଶୁମାନଙ୍କଠାରେ କରୋନା ଭାଇରସ ଚିହ୍ନଟ ହୋଇଛି।

ସମସ୍ତ ଶିଶୁଙ୍କୁ ନବଜାତକ ୟୁନିଟରେ ଚିକିତ୍ସା କରାଯାଉଛି। ବ୍ରିଟେନର ପ୍ରସୂତି ସର୍ବେକ୍ଷଣ ସିଷ୍ଟମ ଦ୍ୱାରା କରାଯାଇଥିବା ଏକ ଅଧ୍ୟୟନରୁ ଜଣାପଡିଛି ଯେ, ମାର୍ଚ୍ଚ ୧ ରୁ ଏପ୍ରିଲ ୧୪ ମଧ୍ୟରେ ମୋଟ୍ ୪୨୭ ମହିଳା ମେଡିକାଲରେ ଭର୍ତ୍ତି ହୋଇଥିଲେ। ସେମାନଙ୍କ ମଧ୍ୟରୁ ୨୪୭ ଜଣ ଗର୍ଭବତୀ ଥିଲେ।

ଅକ୍ସଫୋର୍ଡ ୟୁନିଭର୍ସିଟିର ପ୍ରମୁଖ ଗବେଷକ ପ୍ରଫେସର ମାରିଆନ୍ ନାଇଟ୍ କହିଛନ୍ତି ଯେ, ସମସ୍ତ ଶିଶୁ ଜନ୍ମ ହେବା ପରେ ସଂକ୍ରମିତ ହୋଇଛନ୍ତି; କିନ୍ତୁ ଏହା ସାବ୍ୟସ୍ତ କରିବା ସମ୍ଭବ ନୁହେଁ। ସେ କହିଛନ୍ତି ଯେ, ଶିଶୁମାନେ କରୋନା ସଂକ୍ରମିତ କିପରି ହେଲେ ତାହା ଜାଣିବା ପାଇଁ ଚେଷ୍ଟା ଜାରି ରହିଛି। କାରଣ ସ୍ୱାସ୍ଥ୍ୟ କର୍ମୀମାନେ ପ୍ରସବ ସମୟରେ ସମସ୍ତ ଆବଶ୍ୟକୀୟ ନିୟମ ପାଳନ କରିଥିଲେ।  ସବୁଠାରୁ ଭଲ କଥା ହେଉଛି ଶିଶୁମାନେ ସ୍ତନ୍ୟପାନରୁ ସଂକ୍ରମଣ ପାଇନାହାନ୍ତି। ସେହିପରି ଶିଶୁମାନଙ୍କୁ ସ୍ତନ୍ୟ ପାନରୁ ବଞ୍ଚିତ କରାଯାଇ ପାରିବ ନାହିଁ। ଏହା କରିବା ଦ୍ୱାରା ଶିଶୁମାନେ ଅନ୍ୟାନ୍ୟ ସ୍ୱାସ୍ଥ୍ୟ ସମସ୍ୟା ଭୋଗି ପାରନ୍ତି।

 

Comments
Loading...