ଦେଶର ୨୨ ଜିଲାରେ ୧୪ ଦିନରେ ଆସିନି କରୋନା କେସ : ଓଡିଶାର ୨ ଜିଲା ସାମିଲ

ନୂଆଦିଲୀ : ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇଥିବା ବେଳେ ସରକାରଙ୍କ କଡା ପଦକ୍ଷେପ ଯୋଗୁ କିଛି ଅଂଚଳରେ ଏହା ହ୍ରାସ ପାଇବାରେ ଲାଗିଛି। ଦେଶର ୧୨ଟି ରାଜ୍ୟର ୨୨ଟି ଜିଲାରେ କରୋନା ସ୍ଥିତିରେ ସୁଧାର ଆସିଛି। ଗତ ୧୪ ଦିନ ମଧ୍ୟରେ ଗୋଟିଏ ବି କରୋନା କେସ ଆସି ନଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ସୂଚନା ମୁତାବକ ଏହି ୨୨ଟି ଜିଲା ମଧ୍ୟରୁ ଓଡିଶାର ଦୁଇଟି ଜିଲା ରହିଛି। ସେ ଦୁଇଟି ହେଲା ଭଦ୍ରକ ଓ ପୁରୀ ଜିଲା। ଏହି ସବୁ ଜିଲାରେ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ। ସେମାନଙ୍କୁ କୋଭିଡ ହସ୍ପିଟାଲରେ ଭର୍ତ୍ତି କରାଯିବା ସହ ସେମାନଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କୁ ସଂଗରୋଧ କରାଯାଇଥିଲା। ଜିଲା ପ୍ରଶାସନ ପକ୍ଷରୁ ସଂପୃକ୍ତ ଅଂଚଳକୁ ସିଲ କରାଯାଇଥିଲା। ସେ ଅଂଚଳକୁ ବିଶୋଧନ କରାଯିବା ସହ ସ୍ବାସ୍ଥ୍ୟକର୍ମୀମାନେ ଘର ଘର ବୁଲି ଲୋକଙ୍କ ସ୍ବାସ୍ଥ୍ୟ ଯାଂଚ କରିଥିଲେ। ପ୍ରଶାସନ ପକ୍ଷରୁ କଡା ପଦକ୍ଷେପ ଯୋଗୁ ପରବର୍ତ୍ତୀ ସମୟରେ କୌଣସି ରୋଗୀ ଚିହ୍ନଟ ହୋଇ ନଥିବା କୁହାଯାଇଛି। କରୋନା ସଂକ୍ରମଣ କେସ ଆସିବା ପରେ ରାଜ୍ୟ ସରକାର ଆଗୁଆ ପଦକ୍ଷେପ ନେଇଛନ୍ତି। ଲକଡାଉନ ହେଉ ଅବା ସନ୍ଦେହରେ ଥିବା ଲୋକଙ୍କୁ ସଂଗରୋଧ, ଏସବୁ କ୍ଷେତ୍ରରେ ରାଜ୍ୟ ସରକାର, କେନ୍ଦ୍ର ସରକାରଙ୍କ ଗାଇଡଲାଇନକୁ କଡାକଡି ଭାବେ ପାଳନ କରିଥିବାରୁ ଏହାର ପ୍ରଭାବ ଦେଖାଯାଇଥିବା କେନ୍ଦ୍ର ସ୍ବାସ୍ଥ୍ୟ ବିଭାଗର ଅଧିକାରୀଙ୍କ ସୂଚନାରୁ ସ୍ପଷ୍ଟ ହୋଇଛି।

Comments
Loading...