ଅଦାଲତ ଅବମାନନା ପ୍ରସଙ୍ଗ; ମାମଲା ବନ୍ଦ କରିବାକୁ ରାହୁଲଙ୍କ ନିବେଦନ

ନୂଆଦିଲ୍ଲୀ : ନିଜ ବିରୋଧରେ ଥିବା ଅଦାଲତ ଅବମାନନା ମାମଲା ବନ୍ଦ କରିବା ଲାଗି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ସୋମବାର ସୁପ୍ରିମକୋର୍ଟଙ୍କୁ ନିବେଦନ କରିଛନ୍ତି। ବ୍ୟକ୍ତିଗତ ତଥା ରାଜନୈତିକ ଫାଇଦା ନିମନ୍ତେ ବିଜେପି ଏକ ରାଜନୈତିକ ବିବାଦ ମଧ୍ୟକୁ କୋର୍ଟଙ୍କୁ ଟାଣିବାକୁ ଉଦ୍ୟମ କରୁଛି ବୋଲି ସେ ଦର୍ଶାଇଛନ୍ତି। ନିର୍ବାଚନ ପ୍ରଚାର ବେଳେ ଦିଆଯାଇଥିବା ଏକ ମନ୍ତବ୍ୟକୁ ନେଇ ଅଦାଲତ ଅବମାନନା ମାମଲା କରିଥିବାରୁ ବିଚାର ବିଭାଗୀୟ ପ୍ରକ୍ରିୟାକୁ ବିଭ୍ରାନ୍ତ କରିଥିବାରୁ ବିଜେପି ନେତ୍ରୀ ମୀନାକ୍ଷୀ ଲେଖିଙ୍କୁ କୋର୍ଟ ଜୋରିମାନା କରିବା ଉଚିତ ବୋଲି ସେ ଯୁକ୍ତି ବାଢିଛନ୍ତି।
ରାଫେଲ ସମୀକ୍ଷା ଆବେଦନ ଉପରେ ଶୁଣାଣି ବେଳେ ପ୍ରଘଟ ପ୍ରତିରକ୍ଷା ଦସ୍ତାବିଜକୁ ବିଚାରକୁ ନିଆଯିବ ବୋଲି ଏପ୍ରିଲ ୧୦ରେ ସୁପ୍ରିମକୋର୍ଟ ରାୟ ଦେଇଥିଲେ। ଏହା ଉପରେ ନିଜର ପ୍ରତିକ୍ରିୟା ପ୍ରକାଶ କରି ରାହୁଲ କହିଥିଲେ ଏହି ରାୟ ଦ୍ବାରା ଚୌକିଦାର ଚୋର ହୈ ବୋଲି ସୁପ୍ରିମକୋର୍ଟ ସ୍ବୀକାର କରିଛନ୍ତି। ତାଙ୍କର ଏହି ମନ୍ତବ୍ୟ ଉପରେ ଆପତ୍ତି ଉଠାଇ ଏହା ଅଦାଲତଙ୍କ ଅବମାନନା ଦର୍ଶାଇ ମିନାକ୍ଷୀ ଆବେଦନ କରିଥିଲେ। ଗତ ସପ୍ତାହରେ ମଧ୍ୟ ରାହୁଲ ତାଙ୍କ ମନ୍ତବ୍ୟ ପାଇଁ ଦୁଃଖ ପ୍ରକାଶ ପୂର୍ବକ ଏକ ସତ୍ୟପାଠ କୋର୍ଟରେ ଦାଖଲ କରିଥିଲେ। ମୋଦୀଙ୍କୁ ସମାଲୋଚନା କରିବା ଲାଗି ଉଦ୍ଦିଷ୍ଟ ଏକ ସ୍ଲୋଗାନ ଦର୍ଶାଇ ସେ ଉକ୍ତ ମନ୍ତବ୍ୟ ଦେଇଛନ୍ତି। କୋର୍ଟଙ୍କ ଅବମାନନା କରିବା ତାଙ୍କ ଉଦ୍ଦେଶ୍ୟ ନୁହେଁ; ବରଂ ତାହା ପ୍ରଚାର ଉନ୍ମାଦନା ମଧ୍ୟରେ ଦିଆଯାଇଥିବା ଏକ ମନ୍ତବ୍ୟ ବୋଲି ସେ ଦର୍ଶାଇଥିଲେ। ରାହୁଲଙ୍କ ସତ୍ୟପାଠ ଉପରେ ପ୍ରଧାନ ବିଚାରପତି ରଞ୍ଜନ ଗୋଗଇ, ବିଚାରପତି ଦୀପକ ଗୁପ୍ତା ଏବଂ ବିଚାରପତି ସଞ୍ଜୀବ ଖାନ୍ନା ମଙ୍ଗଳବାର ବିଚାର କରିବେ। ବ୍ୟକ୍ତିଗତ ହାଜରରୁ ରାହୁଲଙ୍କୁ ପୀଠ ଆଶ୍ବସ୍ତି ପ୍ରଦାନ କରିଛନ୍ତି।

Comments
Loading...