କରୋନାରେ ସଂକ୍ରମଣ ଭୟ : କମୁଛି ଏଟିଏମ୍ କାରବାର, ବ୍ୟାଙ୍କ ସଂସ୍ଥାପିତ କରିବେ କଣ୍ଟାକ୍ଟଲେସ୍ ଏଟିଏମ୍
ମୁମ୍ବଇ: ସମ୍ପ୍ରତି କରୋନା ସଂକ୍ରମଣ ଭୟ ଦେଶରେ କମିବାରେ ଲାଗିଛି ଏଟିଏମ୍ କାରବାର । କୋଭିଡ-୧୯କୁ ଦୃଷ୍ଟିରେ ରଖି ଯଦିବା ଏଟିଏମ୍ କାଉଣ୍ଟରଗୁଡିକରେ ସଂକ୍ରମଣ ରୋକିବାକୁ ବ୍ୟାଙ୍କଗୁଡିକ ସାନିଟାଇଜର ସହ ଅନ୍ୟାନ୍ୟ ବ୍ୟବସ୍ଥା କରିଛନ୍ତି ତଥାପି ସେଠାରେ କାରବାର କଲେ ସଂକ୍ରମିତ ହେବାର ଭୟ ଲୋକଙ୍କ ମନରେ ରହିଛି । ଫଳସ୍ବରୂପ ଚଳିତବର୍ଷ ଜାନୁଆରୀ ତୁଳନାରେ ମାର୍ଚ୍ଚରେ ଏଟିଏମ୍ କାଉଣ୍ଟରରେ କାରବାର ଏବଂ ଅର୍ଥ ଉଠାଣ ପରିମାଣ ଯଥେଷ୍ଟ କମିଯାଇଛି । ଏଭଳି ପରିସ୍ଥିତିରେ ଗ୍ରାହକଙ୍କୁ ଏକ ସମ୍ପର୍କ ରହିତ ବା କଣ୍ଟାକ୍ଟଲେସ୍ ଏଟିଏମ୍ କାରବାର ସୁବିଧା ଯୋଗାଇଦେବା ଲକ୍ଷ୍ୟ ନେଇ ବ୍ୟାଙ୍କଗୁଡିକ ନୂଆ ଏଟିଏମ୍ ବ୍ୟବସ୍ଥା ସଂସ୍ଥାପିତ କରିବାକୁ ଯୋଜନା କରିଛନ୍ତି ।
ଚଳିତବର୍ଷ ଜାନୁଆରୀରେ ଦେଶରେ ୩.୨ ଲକ୍ଷ କୋଟି ଏଟିଏମ୍ କାରବାର ସମ୍ପନ୍ନ ହୋଇଥିବା ବେଳେ ମାର୍ଚ୍ଚରେ ଏହା ୨.୭ ଲକ୍ଷ କୋଟିକୁ ହ୍ରାସ ଘଟିଛି । ସେହିଭଳି ଜାନୁଆରୀରେ ଏଟିଏମ୍ ଜରିଆରେ ଦେଶରେ ୬୭ କୋଟି ଟଙ୍କାର କାରବାର ହୋଇଥିବାେବଳେ ମାର୍ଚ୍ଚରେ ଏହି କାରବାର ୫୬ କୋଟି ଟଙ୍କାକୁ ହ୍ରାସ ଘଟିଥିବା ଜଣାଯାଇଛି । ଏହା ପ୍ରମାଣିତ କରୁଛି ଯେ, ଗ୍ରାହକ କରୋନାକୁ ନେଇ ଏଟିଏମ୍ ଜରିଆରେ କାରବାର କରିବାକୁ ପଛାଉଛନ୍ତି । ଏଟିଏମ୍ କାରବାର ସମୟରେ ଏହାର ଟିଭି ସ୍କ୍ରିନ୍ ଏବଂ କି ବୋର୍ଡକୁ ଟଚ୍ କରିବାର ସମ୍ଭାବନା ରହିଥିବାଯୋଗୁ ଏହା ଜରିଆରେ ସଂକ୍ରମଣ ଆଶଙ୍କାକୁ ଏଡାଇ ଦିଆଯାଇ ନ ପାରେ । ଏଥିପାଇଁ ଗ୍ରାହକଙ୍କୁ ଏକ ସମ୍ପର୍କ ରହିତ ଏଟିଏମ୍ କାରବାର ସୁବିଧା ଯୋଗାଇବା ପାଇଁ ବ୍ୟାଙ୍କଗୁଡିକ ଏକ କଣ୍ଟାକ୍ଟଲେସ୍ ଏଟିଏମ୍ ବ୍ୟବସ୍ଥା ଆରମ୍ଭ କରିବା ପାଇଁ ପେମେଣ୍ଟ କମ୍ପାନୀ ଏଜିଏସ୍ ଟ୍ରାଞ୍ଜାକ୍ଟ ଟେକ୍ନୋଲୋଜିଜ୍ ଏକ ପ୍ରୋଟୋଟାଇପ୍ର ବିକାଶ କରିଛି । ଏହି ଅନୁଯାୟୀ, ଗ୍ରାହକ ଏଟିଏମ୍ ମେସିନ୍ ସହ ଇଣ୍ଟରେଫସ୍ ହେବା ନିମନ୍ତେ ସ୍କ୍ରିନ୍ରେ ଦେଖାଯାଉଥିବା ଏକ କ୍ୟୁଆର୍ କୋଡକୁ ସ୍କାନ୍ କରିବେ । ପୂର୍ବ ବ୍ୟବସ୍ଥାରେ ଆକାଉଣ୍ଟଧାରୀଙ୍କୁ ଚିହ୍ନିବା ପାଇଁ ଏଟିଏମ୍ରେ ଏକ ମ୍ୟାଗ୍ନେଟିକ୍ ଷ୍ଟ୍ରିପ୍ କାର୍ଡର ବ୍ୟବହାର କରାଯାଉଥିବାବେଳେ ଏବେ ସମ୍ପର୍କ ରହିତ ଏଟିଏମ୍ କାରବାର ପାଇଁ ଗ୍ରାହକଙ୍କୁ ବ୍ୟାଙ୍କର ସ୍ମାର୍ଟଫୋନ୍ ଆପ୍କୁ ବ୍ୟବହାର କରି ସ୍କ୍ରିନ୍ରେ ଦେଖାଯାଉଥିବା ଏକ କ୍ୟୁଆର୍ କୋଡକୁ ସ୍କାନ୍ କରିବାକୁ ହେବ । ଏହାପରେ ଗ୍ରାହକ ନିଜ ମୋବାଇଲରେ ଉଠାଣ କରିବାକୁ ଚାହୁଁଥିବା ଅର୍ଥ ରାଶି ଏବଂ ଏଟିଏମ୍ ପିନ୍ ଏଣ୍ଟର କରିବା ପରେ ମେସିନ୍କୁ ସ୍ପର୍ଶ ନ କରି ସେଥିରୁ ଅର୍ଥ ସଂଗ୍ରହ କରିପାରିବେ ।
ଦେଶରେ ବ୍ୟାଙ୍କଗୁଡିକ ନିମନ୍ତେ ୭୦,୦୦୦ ଏଟିଏମ୍କୁ ପରିଚାଳନା କରୁଥିବା ଏଜିଏସ୍ ଏବେ ଦୁଇଟି ବ୍ୟାଙ୍କ ପାଇଁ ଏଭଳି କଣ୍ଟାକ୍ଟଲେସ୍ ସଲ୍ୟୁସନ୍ ବିକାଶ କରିବା ପ୍ରକ୍ରିୟାରେ ରହିଛି । ଏହାଛଡା ଏ ନେଇ ଆଉ ୪ ବ୍ୟାଙ୍କ ସହ ସଂସ୍ଥା ଯୋଗାଯୋଗରେ ରହିଥିବା ଜଣାଯାଇଛି । ଏ କ୍ଷେତ୍ରରେ କେବଳ ସଫ୍ଟୱେରରେ ପରିବର୍ତ୍ତନ ହେବାକୁ ଥିବାରୁ ନୂଆ ବ୍ୟବସ୍ଥାର କାର୍ଯ୍ୟକାରୀ ପାଇଁ ଆଠ ସପ୍ତାହ ସମୟ ଲାଗିପାରେ ବୋଲି କୁହାଯାଉଛି ।
Comments are closed.