ରାଜସ୍ଥାନରେ ସରକାର ଭାଙ୍ଗିବାକୁ ଷଡ଼ଯନ୍ତ୍ର, ୨ ବିଜେପି ନେତା ଗିରଫ

ଜୟପୁର: ରାଜସ୍ଥାନରେ ଅଶୋକ ଗେହଲଟଙ୍କ ନେତୃତ୍ଵାଧୀନ କଂଗ୍ରେସ ସରକାର ଭାଙ୍ଗିବାକୁ ଷଡ଼ଯନ୍ତ୍ର କରିଛନ୍ତି ବିଜେପି ନେତା। ତଦନ୍ତ ପରେ ଏହା ସାମ୍ନାକୁ ଆସିଥିବାବେଳେ ପୁଲିସ ୨ ବିଜେପି ନେତାଙ୍କୁ ଶନିବାର ଗିରଫ କରିଛି। ସେମାନଙ୍କ କଲ୍‌ ରେକର୍ଡରୁ ସରକାର ଭାଙ୍ଗିବା ଷଡ଼ଯନ୍ତ୍ର ପଦାକୁ ଆସିଛି।

ରିପୋର୍ଟ ମୁତାବକ, ରାଜସ୍ଥାନରେ ବିଧାୟକମାନଙ୍କର କିଣାବିକା ମାମଲାରେ ୨ ବିଜେପି ନେତାଙ୍କ ନାମ ସାମ୍ନାକୁ ଆସିଛି। ସେମାନେ ହେଲେ ଭରତ ମାଲାନୀ ଏବଂ ଅଶୋକ ସିଂହ। ଏମାନଙ୍କୁ ଉଦୟପୁରରୁ ସ୍ପେଶାଲ ଅପରେଶନ ଗ୍ରୁପ(ଏସଓଜି) ପୁଲିସ ଗିରଫ କରିଛି। ସରକାର ଭାଙ୍ଗିବା ଉଦ୍ଦେଶ୍ୟରେ ବିଧାୟକମାନଙ୍କୁ କିଣିବାକୁ ଉଦ୍ୟମ ହୋଇଥିବା ମାଲାନୀଙ୍କ କଲ୍‌ ରେକର୍ଡିଂରୁ ଜଣାପଡ଼ିଛି ବୋଲି ରାଜସ୍ଥାନ ଏସଓଜି ପକ୍ଷରୁ କୁହାଯାଇଛି।

ସୂଚନାଯୋଗ୍ୟ, ରାଜସ୍ଥାନରେ ସରକାର ଭାଙ୍ଗିବା ଉଦ୍ୟମକୁ ନେଇ ଏତଲା ଦିଆଯିବା ପରେ ଏସଓଜି ମାମଲା ରୁଜୁ କରି ତଦନ୍ତ ଚଳାଇଥିଲା। କିଛି ଫୋନ କଲ୍‌ ରେକର୍ଡ କରାଯିବା ସମୟରେ ଅଶୋକ ଗେହଲଟଙ୍କ ସରକାରକୁ ଭାଙ୍ଗିବାକୁ ଷଡ଼ଯନ୍ତ୍ର କରାଯାଉଥିବା ଏସଓଜିକୁ ତଥ୍ୟ ମିଳିଥିଲା। ଏହାକୁ ଆଧାର କରି ଏସଓଜି ଭରତ ମାଲାନୀଙ୍କୁ ଶୁକ୍ରବାର ରାତିରେ ଅଟକ ରଖି ପଚରାଉଚରା କରିଥିଲା। ପରେ ତାଙ୍କୁ ଗିରଫ କରିଥିଲା। ଜୟପୁରରେ ତାଙ୍କୁ ପଚରାଉଚରା ଜାରି ରହିଛି। ମାଲାନୀ ରାଜସ୍ଥାନ ବିଜେପିରେ ଅନେକ ପଦବୀରେ ରହିସାରିଛନ୍ତି।