ବର୍ଷା ପରେ ଲେଉଟିଲା ଶୀତ

ଭୁବନେଶ୍ବର : ସୋମବାର ଠାରୁ ପାଗରେ ପରିବର୍ତ୍ତନ ହେବ। ପାଗ ମୁଖ୍ୟତଃ ଶୁଖିଲା ରହିବ। ତେବେ ବର୍ଷା ପରେ ପରେ ପୁଣି ଲେଉଟିବ ଶୀତ । ଆଜି ଠାରୁ ପାରଦ ଖସିବା ସହ ଶୀତ ଓ କୁହୁଡ଼ି ବଢ଼ିବା ନେଇ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି। ତାପମାତ୍ରା ୩ରୁ ୪ ଡିଗ୍ରୀକୁ ଖସି ଆସିବ। ସେହିଭଳି ରାଜ୍ୟର ୪ ଜିଲ୍ଲାରେ ଶୀତର ଲହରି ପାଇଁ ସତର୍କତା ଜାରି କରିଛି ପାଣିପାଗ ବିଭାଗ । ସୋନପୁର, କେନ୍ଦୁଝର, ମୟୁରଭଂଜ, ବାଲେଶ୍ୱର ଏବଂ ଅନୁଗୁଳରେ ଆସନ୍ତାକାଲିଠାରୁ ଥଣ୍ଡାର ପରିମାଣ ବଢିବା ନେଇ ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ରବିବାର ସଂଧ୍ୟା ସୁଦ୍ଧା କୋରାପୁଟରେ ସର୍ବାଧିକ ୮.୬ ମିମି ବର୍ଷା ହୋଇଛି। ସେହିପରି ସକାଳ ସୁଦ୍ଧା କେନ୍ଦୁଝରରେ ସର୍ବାଧିକ ୨୨.୪ ମିମି, ବୌଦ୍ଧରେ ୧୫.୩ ମିମି, ଦାରିଙ୍ଗବାଡ଼ି ଓ ତାଳଚେରରେ ୧୩ ମିମି, ପାରଳାଖେମୁଣ୍ଡିରେ ୧୨.୫ ମିମି, ଫୁଲବାଣୀ ଓ ଟିଟିଲାଗଡ଼ରେ ୧୨ ମିମି, ଅନୁଗୋଳରେ ୧୦ ମିମି ବର୍ଷା ହୋଇଛି। ଆସନ୍ତାକାଲି ବଲାଙ୍ଗୀର, କଳାହାଣ୍ଡି, କନ୍ଧମାଳ, ରାୟଗଡ଼ା, କୋରାପୁଟ, ଅନୁଗୋଳରେ କୁହୁଡ଼ି ଦେଖାଦେବ। ସେହିପରି ସୁନ୍ଦରଗଡ଼, ବାଲେଶ୍ବର, ଅନୁଗୋଳ, କଟକ, ସୋନପୁର, ବଲାଙ୍ଗୀରରେ ଶୀତ ଲହରି ଆରମ୍ଭ ହେବ।

Comments
Loading...