ଭୁବନେଶ୍ବର : ଗାଁ ହେଉଛି ବିକାଶ କାର୍ଯ୍ୟକ୍ରମର ମୁଖ୍ୟସ୍ଥଳୀ। ଗାଁର ବିକାଶମୂଳକ କାର୍ଯ୍ୟ ସହିତ ବିଭିନ୍ନ ଦାରିଦ୍ର୍ୟ ଦୂରୀକରଣ କାର୍ଯ୍ୟକ୍ରମ ଓ ସାମାଜ ସେବା ଯୋଜନାର ସଫଳତା କ୍ଷେତ୍ରରେ ପଞ୍ଚାୟତ ନିର୍ବାହୀ ଅଧିକାରୀଙ୍କ ଗୁରୁଦାୟିତ୍ବ ରହିଛି। ଏଥିପାଇଁ କରାଯାଉଥିବା କାର୍ଯ୍ୟଗୁଡ଼ିକୁ ଅଧିକ ସ୍ବଚ୍ଛତାର ସହ କରିବା ଉପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁତ୍ବ ଦେଇଛନ୍ତି।
ରାଜଧାନୀରେ ଶନିବାର ଆୟୋଜିତ ଉତ୍କଳ ଗ୍ରାମ ସେବକ/ସେବିକା (ପଞ୍ଚାୟତ ନିର୍ବାହୀ ଅଧିକାରୀ)ଙ୍କ ବାର୍ଷିକ ଉତ୍ସବରେ ଯୋଗ ଦେଇ ମୁଖ୍ୟମନ୍ତ୍ରୀ ସେମାନଙ୍କୁ ଭଲ କାମ କରନ୍ତୁ ଏବଂ ଲୋକଙ୍କ ବିଶ୍ବାସ ଜିତନ୍ତୁ ବୋଲି ପରାମର୍ଶ ଦେଇଛନ୍ତି।
ପଞ୍ଚାୟତ ନିର୍ବାହୀ ଅଧିକାରୀଙ୍କ ଏହି ସୁନ୍ଦର କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ଖୁସି ବ୍ୟକ୍ତ କରିଥିଲେ। ଏହି ଅବସରରେ ସେ ସମସ୍ତଙ୍କୁ ଶୁଭେଚ୍ଛା ଜଣାଇଥିଲେ।
ମୁଖ୍ୟମନ୍ତ୍ରୀ କହିଥିଲେ, ହକ୍ ପାଇବାରେ ଲୋକଙ୍କର ଯେପରି ଅସୁବିଧା ନହୁଏ ସେଥିପ୍ରତି ଧ୍ୟାନ ଦେବା ଆବଶ୍ୟକ।
‘ଆମ ଗାଁ ଆମ ବିକାଶ’ ଏକ ଲୋକପ୍ରିୟ କାର୍ଯ୍ୟକ୍ରମ। ସେହିପରି ସରକାର ‘ପିଠା’ କାର୍ଯ୍ୟକ୍ରମ ମଧ୍ୟ ଆରମ୍ଭ କରିଛନ୍ତି। ବିଭିନ୍ନ ସରକାରୀ ସେବା ଓ ସରକାରୀ ଯୋଜନାର ସୂଚନା ଲୋକଙ୍କ ପାଖରେ ଠିକ ଭାବେ ପହଞ୍ଚାଇବା ଏହି ସବୁ କାର୍ଯ୍ୟକ୍ରମର ଲକ୍ଷ୍ୟ। ଚାଷୀଙ୍କ ପାଇଁ ‘କାଳିଆ’ ଯୋଜନା ଆରମ୍ଭ ହେବାକୁ ଯାଉଛି। ଏହା ଏକ ଗୁରୁତ୍ବପୂର୍ଣ୍ଣ କାର୍ଯ୍ୟକ୍ରମ। ଏଥିରେ ପଞ୍ଚାୟତର ବିଶେଷ ଦାୟିତ୍ବ ରହିଛି।
ତୃଣମୂଳସ୍ତରରେ ଥ୍ରୀ ଟି(ବୈଷୟିକ ବିଦ୍ୟାର ପ୍ରୟୋଗ, ସାମୁହିକ କାର୍ଯ୍ୟାନ୍ବୟନ ଓ ସ୍ବଚ୍ଛ ପ୍ରଶାସନର ସଫଳତା ଆପଣମାନଙ୍କ ଉପରେ ନିର୍ଭର କରେ ବୋଲି ମୁଖ୍ୟମନ୍ତ୍ରୀ ସେମାନଙ୍କୁ କହିଥିଲେ।
ପଞ୍ଚାୟତ ନିର୍ବାହୀ ଅଧିକାରୀ ସଂଘ ପକ୍ଷରୁ ଏହି ପଦ ପାଇଁ ଶିକ୍ଷାଗତ ଯୋଗ୍ୟତା ଯୁକ୍ତ ୩କୁ ବୃଦ୍ଧି କରିବା ଏବଂ ଗ୍ରାମ ପଞ୍ଚାୟତ ସଂପ୍ରସାରଣ ଅଧିକାରୀ ଓ ପ୍ରଗତି ସହାୟକ ପଦକୁ ଶତପ୍ରତିଶତ ପଦୋନ୍ନତି ପ୍ରଦାନ ବ୍ୟବସ୍ଥା କରାଯିବା ନେଇ ଦାବି ଉପସ୍ଥାପନ କରାଯାଇଥିଲା।
ମୁଖ୍ୟମନ୍ତ୍ରୀଙ୍କ ସହ କୃଷିମନ୍ତ୍ରୀ ପ୍ରଦୀପ ମହାରଥୀ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ସଂଘ ସଭାପତି ଦେବବ୍ରତ ଦାସ, ସାଧାରଣ ସମ୍ପାଦକ ସୁବ୍ରତକୁମାର ନାୟକ, ଷ୍ଟିୟରିଂ କମିଟି ଅଧ୍ୟକ୍ଷ ସୁବାସଚନ୍ଦ୍ର କରଙ୍କ ସମେତ ବିଭିନ୍ନ ସ୍ଥାନରୁ ଆସିଥିବା ପଞ୍ଚାୟତ ନିର୍ବାହୀ ଅଧିକାରୀମାନେ ଉପସ୍ଥିତ ଥିଲେ।
