ପୁରୀ: ଜୁଲାଇ ୪ରେ ପବିତ୍ର ଶ୍ରୀଗୁଣ୍ଡିଚା ଯାତ୍ରା ପାଇଁ ପ୍ରସ୍ତୁତି କାର୍ଯ୍ୟ ଜୋରସୋରରେ ଆଗେଇ ଥିଲା ବେଳେ, ରଥ ଉପରେ କନା ଛାଉଁଣି ପାଇଁ ଦରଜି ସେବକଙ୍କ ଦ୍ୱାରା ରଥ କନା ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ଧୂପ, ଦୀପ, ମାଳ, ମାହାର୍ଦ୍ଦ ରଖି ପୂଜାର୍ଚ୍ଚନା କରିବା ପରେ ରଥ କନା କଟା ଶୁଭାରମ୍ଭ ହୋଇଛି। ଦରଜି ସର୍ଦ୍ଦାର ପ୍ରକାଶ ମହାପାତ୍ରଙ୍କ ନେତୃତ୍ୱରେ ୧୨ଜଣ କାରିଗର ତିନିରଥର ରଥକନା ନିର୍ମାଣରେ ନିୟୋଜିତ ହୋଇଛନ୍ତି।
ପ୍ରଥମେ ବଳଭଦ୍ରଙ୍କ ରଥକନା କଟା ଆରମ୍ଭ ହୋଇଛି। ଜଗନ୍ନାଥଙ୍କ ନନ୍ଦିଘୋଷ ରଥ ଓ ବଳଭଦ୍ରଙ୍କ ତାଳଧ୍ୱଜ ରଥରେ ୪୨୫ମିଟର ଲେଖାଏଁ କନା ଓ ମା ସୁଭଦ୍ରାଙ୍କ ଦର୍ପଦଳନ ରଥରେ ୪ଶହ ମିଟର କନା ବ୍ୟବହୃତ ହେବ। ଏହି ପରି ସମୁଦାୟ ୧୨୫୦ ମିଟର କନା ବ୍ୟବହାରରେ ଲାଗିବ। ନନ୍ଦିଘୋଷ ରଥରେ ନାଲି ଓ ହଳଦିଆ ରଙ୍ଗର କନା, ତାଳଧ୍ୱଜ ରଥରେ ନାଲି ଓ ନେଳି କନା ଓ ଦର୍ପଦଳନ ରଥରେ ନାଲି ଓ କଳା କନା ବ୍ୟବହାର କରାଯିବ। ଏହି କାମ ପାଇଁ ଦରଜି ସର୍ଦ୍ଦାରଙ୍କ ନେତୃତ୍ୱରେ ୬ଟି ସିଲାଇ ମେସିନ ବ୍ୟବହୃତ ହୋଇଛି।
Comments are closed.