ଚୀନ୍ ସେବିକାଙ୍କ ପ୍ରଶଂସନୀୟ ପଦକ୍ଷେପ

କରୋନା ଭାଇରସ୍‌‌ର ଭୟରେ ପୂରା ବିଶ୍ବବାସୀ ଥରହର। ଏପରିସ୍ଥଳେ ଚୀନ୍ ସ୍ଥିତି ଖୁବ୍ ଜଟିଳ। ସେଠା ଚିକିତ୍ସାଳୟରେ ଡାକ୍ତର ଓ ସେବିକା ଦିନରାତି ୨୪ଘଣ୍ଟା ନିରନ୍ତର ରୋଗୀଙ୍କ ସେବାରେ ଲାଗିପଡ଼ିଛନ୍ତି। କରୋନା ଭାଇରସ୍‌ ରୋଗୀଙ୍କ ସେବାରେ ସେମାନେ ସତର୍କତା ଅବଲମ୍ବନ କରୁଥିବାର ଦେଖାଯାଉଛି। ନିକଟରେ ଗଣମାଧ୍ୟମ ଚୀନ୍‌ ସେବିକାଙ୍କ ନିଃସ୍ବାର୍ଥପର ସେବାର ତଥ୍ୟ ଦେଇଛି। ୧୫ ଘଣ୍ଟାରୁ ଅଧିକ ସମୟ ଧରି ଏମାନେ ମାସ୍କ ପିନ୍ଧି ରହୁଥିବାରୁ ସେମାନଙ୍କ ମୁହଁରେ ଦାଗ, ଆଲର୍ଜି ହେବା ସହ କେତେଜଣଙ୍କ ମୁହଁରେ ଖଣ୍ଡିଆଖାବରା ହୋଇଗଲାଣି। ସେମାନେ କିନ୍ତୁ ଏସୁବୁକୁ ପରବାୟ ନ କରି ବରଂ ରୋଗୀ ସେବାରେ ଲାଗିପଡ଼ିଛନ୍ତି। ଜନୈକ ସେବିକା ନିଂ ଚାଉଙ୍କ ମତରେ ମୃତ୍ୟୁକୁ ତାଙ୍କର ଭୟ ନାହିଁ। ହେଲେ ସେବିକାମାନେ ମାସ୍କ ପିନ୍ଧି ସଚେତନ ରହିବାକୁ ବାଧ୍ୟ। ନଚେତ୍ କରୋନା ଭାଇରସ୍‌ରେ ସମସ୍ତେ ଆକ୍ରାନ୍ତ ହେଲେ ରୋଗୀଙ୍କ ସେବା କରିବ କିଏ ବୋଲି ତାଙ୍କ ଯୁକ୍ତି। ସେଠା ଡାକ୍ତରଙ୍କ ମତରେ ଗତ ଦେଢ଼ ସପ୍ତାହ ହେଲା, ସେମାନେ ଗୋଟିଏ ଓଳି ଭଲଭାବେ ଖାଇ ମଧ୍ୟ ପାରୁନାହାନ୍ତି। ପ୍ରତି ମୁହୂର୍ତ୍ତରେ ସତର୍କ ରହିବା ହିଁ ସେମାନଙ୍କ ପ୍ରଥମ କାମ ବୋଲି ପ୍ରକାଶ କରିଛନ୍ତି।