ହାତ, ଗୋଡ ନ ଥିବା ଶିଶୁ ଜନ୍ମ

ଜୟପୁର: ଏକ ଶିଶୁ ପାଇଁ ମା’ବାପାଙ୍କ କେତେ ସ୍ୱପ୍ନ ଥାଏ। ପୁଅ କିମ୍ବା ଝିଅ ହେଉ ଆଦରରେ ତାକୁ ଲାଳନ ପାଳନ କରନ୍ତି। ଭିନ୍ନକ୍ଷମ ହେଲେ ବି ନିଜ ଛୁଆ ପ୍ରତି ଅବହେଳା କରନ୍ତି ନାହିଁ। ଏପରି କୋରାପୁଟ ଜିଲା ଜୟପୁର ଉପଖଣ୍ଡରେ ଏକ ଛୁଆ ଜନ୍ମ ​ହୋଇଛି ତାର ହାତଗୋଡ ନାହିଁ। କୋରାପୁଟ ଜିଲା ବୋରିଗୁମ୍ମା ବ୍ଳକ ଅନ୍ତର୍ଗତ ଚରାମୂଳା ଗାଁରେ ଜନ୍ମ ନେଇଛି ଏପରି ଏକ ଶିଶୁ ପୁତ୍ର। ଆଜି ସକାଳୁ ଚରାମୂଳା ଗ୍ରାମର ଜଣେ ଦମ୍ପତିଙ୍କ ହାତଗୋଡ ନ ଥିବା ଛୁଆ ଜନ୍ମ ନେଇଛି। ନବଜାତ ଶିଶୁକୁ ଦେଖି ବାପାମା’ ଚିନ୍ତିତ ହୋଇପଡ଼ିଥିଲେ। ଛୁଆଟି ବଞ୍ଚିଥିବାରୁ ତାର ଉତ୍ତମ ସ୍ୱାସ୍ଥ୍ୟ ପାଇଁ ଡାକ୍ତରମାନେ ତତ୍ପରତା ଦେଖାଇ ଚିକିତ୍ସା କରିଛନ୍ତି।

ଗତକାଲି ଉକ୍ତ ଗାଁର ଜଣେ ମହିଳାଙ୍କ ଗର୍ଭ ବେଦନା ହେବାରୁ ଆଶା କର୍ମୀ ସହାୟତାରେ କୁମଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣାଯାଇଥିଲା। ସେଠାରେ ଛୁଆ ଜନ୍ମ ପରେ ତୁରନ୍ତ ତାର ପ୍ରାଥମିକ ଚିକିତ୍ସା କରି କୋରାପୁଟକୁ ସ୍ଥାନାନ୍ତରିତ କରାଯାଇଥିଲା ବୋଲି ବୋରିଗୁମ୍ମା ଗୋଷ୍ଠୀ ସ୍ୱାସ୍ଥ୍ୟ ଅଧିକାରୀ ରାଜାରାମ ସ୍ୱାଇଁ କହିଛନ୍ତି। କୋରାପୁଟ ମେଡିକାଲ କଲେଜରେ ଛୁଆର ଚିକିତ୍ସା କରି ଦମ୍ପତିଙ୍କୁ ଚରାମୂଳା ଗ୍ରାମକୁ ପଠାଇ ଦିଆଯାଇଛି। ଶିଶୁର ସ୍ୱାସ୍ଥ୍ୟ ଅବସ୍ଥା ଠିକ ଥିବା ବାପାମା’ ସୂଚନା ଦେଇଛନ୍ତି।

Comments
Loading...