ସମ୍ପତ୍ତି ତାଲିକା ପ୍ରଦାନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

୨୦୧୯-୨୦ ଆର୍ଥିକ ବର୍ଷ ପାଇଁ ନିଜ ସମ୍ପତ୍ତି ତାଲିକା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସମ୍ପତ୍ତି ତାଲିକା ମୁଖ୍ୟମନ୍ତ୍ରୀଙ୍କ ୱେବସାଇଟରେ ପ୍ରକାଶ ପାଇଛି। ଏହି ତାଲିକା ଅନୁଯାୟୀ ମୁଖ୍ୟମନ୍ତ୍ରୀଙ୍କ ଦିଲ୍ଲୀର ଜନପଥ ବ୍ୟାଙ୍କ ଅଫ ଇଣ୍ଡିଆରେ ୧୬ ଲକ୍ଷ ୭୬ ହଜାର ୧୮ ଟଙ୍କା ୬୩ ପଇସା, ସେହି ବ୍ୟାଙ୍କରେ ଏକ ଟର୍ମ ଡିପୋଜିଟ ସ୍କିମରେ ୧ କୋଟି ୩ ଲକ୍ଷ ୧୩ ହଜାର ୪୯୯ ଟଙ୍କା ଓ ଦିଲ୍ଲୀର ପାର୍ଲାମେଂଟ ହାଉସ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଶାଖାରେ ୧ ହଜାର ୮ଶହ ୧୮ ଟଙ୍କା ରହିଛି।

ଅନ୍ୟ ପକ୍ଷରେ ଭୁବନେଶ୍ୱର ଏସବିଆଇ ଶାଖାରେ ୧୦ ଲକ୍ଷ ୫୬ ହଜାର ୮ଶହ ୮୮ ଟଙ୍କା, ହିଞ୍ଜିଳି ଷ୍ଟେଟବ୍ୟାଙ୍କ ଶାଖାରେ ୬ ହଜାର ୭୪୬ ଟଙ୍କା ଜମା ଅଛି। ହିଞ୍ଜିଳି ଷ୍ଟେଟବ୍ୟାଙ୍କ ଶାଖାରେ ଅନ୍ୟ ଏକ ଆକାଉଣ୍ଟରେ ୧୩ ହଜାର ୮୧୮ ଟଙ୍କା ରହିଛି। ଉଭୟ ଆକାଉଣ୍ଟ ୨୦୧୪ ଓ ୨୦୧୯ ନିର୍ବାଚନ ପାଇଁ ଖୋଲା ଯାଇଥିଲା। ବରଗଡ଼ ଏସବିଆଇ ଶାଖାରେ ଅନ୍ୟ ଏକ ଆକାଉଣ୍ଟରେ ୩୭ ହଜାର ଟଙ୍କା ଜମା ରହିଛି। ସେହିପରି ମୁଖ୍ୟମନ୍ତ୍ରୀଙ୍କ ପାଖରେ ୨ ଲକ୍ଷ ୮୯ ହଜାର ୫୮୭ ଟଙ୍କାର ସୁନାଗହଣା ରହିଥିବା ବେଳେ ୮ ହଜାର ୯ଶହ ୫ଟଙ୍କା ମୂଲ୍ୟର ଏକ ୧୯୮୦ ମସିହାର ଆମ୍ବାସଡର କାର ରହିଛି।

NAVEEN-PATNAIK

ମୁଖ୍ୟମନ୍ତ୍ରୀ ଦେଇଥିବା ସୂଚନା ଅନୁଯାୟୀ, ସେ ଦିଲ୍ଲୀ ଫରିଦବାଦରେ ଥିବା ଜମି ବିକ୍ରି ଲାଗି ୧ କୋଟି ୨୫ ଲକ୍ଷ ଟଙ୍କା ଅଗ୍ରୀମ ଆଣିଛନ୍ତି। ମୁଖ୍ୟମନ୍ତ୍ରୀଙ୍କ ସ୍ଥାବର ସମ୍ପତ୍ତି ମଧ୍ୟରେ ଭୁବନେଶ୍ୱର, ଦିଲ୍ଲୀ ଓ ହରିଆଣାରେ ଜମି ଓ କୋଠା ରହିଥିବା ବେଳେ ଫରିଦାବାଦରେ ଥିବା ଜମି ଓ କୋଠାର ମୂଲ୍ୟ ୧୦ କୋଟି ୭୫ ଲକ୍ଷ ୫୧ ହଜାର ୭୧ ଟଙ୍କା, ନବୀନ ନିବାସରେ ଦୁଇ-ତୃତୀୟାଂଶ ଭାଗ ଯାହାର ମୂଲ୍ୟ ୯ କୋଟି ୫୨ ଲକ୍ଷ ୪୬ ହଜାର ୧୯୦ ଟଙ୍କା ଏବଂ ଦିଲ୍ଲୀର ଏପିଜେ ଅବଦୁଲ କଲାମ ରୋଡରେ ଥିବା ସମ୍ପତ୍ତିରେ ୫୦ ପ୍ରତିଶତ ଭାଗ ଯାହାର ମୂଲ୍ୟ ୪୩ କୋଟି, ୩୬ ଲକ୍ଷ, ୧୮ ହଜାର ଟଙ୍କା ଆକଳନ କରାଯାଇଛି।

Comments
Loading...