କୋଭିଡ ପରିଚାଳନା : ୧୦ ରାଜ୍ୟକୁ ଗଲେ କେନ୍ଦ୍ରୀୟ ଟିମ୍

ନୂଆଦିଲ୍ଲୀ :  କୋଭିଡ ପରିଚାଳନାରେ ସହାୟତା କରିବା ପାଇଁ  କେନ୍ଦ୍ର ସରକାର ୧୦ଟି ରାଜ୍ୟକୁ ଉଚ୍ଚସ୍ତରୀୟ ବିଶେଷଜ୍ଞ ଦଳ ପଠାଇଛନ୍ତି । ଏହି ଟିମରେ ବିଭିନ୍ନ କ୍ଷେତ୍ରର ବିଶେଷଜ୍ଞମାନେ ରହିଛନ୍ତି  । ଏହି ଟିମ୍‍ଗୁଡ଼ିକ କୋଭିଡ୍‍ ପରିଚାଳନାରେ ନିଆଯାଇଥିବା ସ୍ୱାସ୍ଥ୍ୟଗତ ବ୍ୟବସ୍ଥାଗୁଡ଼ିକର ସମୀକ୍ଷା କରିବେ ।ମହାରାଷ୍ଟ୍ର, କେରଳ, ଛତିଶଗଡ଼, ମଧ୍ୟପ୍ରଦେଶ, ଗୁଜରାଟ, ପଞ୍ଜାବ, କର୍ଣ୍ଣାଟକ,
ତାମିଲନାଡୁ, ପଶ୍ଚିମବଙ୍ଗ ଓ ଜାମ୍ମୁ କାଶ୍ମୀର କେନ୍ଦ୍ରଶାସିତ ଅଞ୍ଚଳକୁ ଏହି ଟିମ୍ ପଠାଯାଇଛି । ସେହି ଟିମ୍‍ଗୁଡ଼ିକ ରାଜ୍ୟଗୁଡ଼ିକର ସ୍ଥାନୀୟ ପ୍ରଶାସନ ସହ ମିଶି କୋବିଡ ଉପରେ କାର୍ଯ୍ୟ କରିବେ ।

କିଛି ରାଜ୍ୟରେ ପୁନର୍ବାର କୋଭିଡ ସଂକ୍ରମିତମାନଙ୍କ ସଂଖ୍ୟା ବୃଦ୍ଧି ପାଇଥିବାରୁ ଏଭଳି ପଦକ୍ଷେପ ନିଆଯାଇଛି ।କୋଭିଡ ସଂକ୍ରମଣ ବୃଦ୍ଧି ପାଇଥିବା ମହାରାଷ୍ଟ୍ର, କେରଳ, ଛତିଶଗଡ଼, ମଧ୍ୟପ୍ରଦେଶ, ଗୁଜରାଟ, ପଞ୍ଜାବ ଓ ଜାମ୍ମୁ କାଶ୍ମୀରକୁ କେନ୍ଦ୍ର ସରକାର ଚିଠି ଲେଖିଛନ୍ତି । ସେହି ରାଜ୍ୟଗୁଡ଼ିକରେ ଆରଟି-ପିସିଆର ଟେଷ୍ଟ ମାତ୍ରା କମ୍‍ ରହିଛି । କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଲେଖିଥିବା ଚିଠିରେ ସଂକ୍ରମଣର ଶୃଙ୍ଖଳ ଭାଙ୍ଗିବା ପାଇଁ ତୁରନ୍ତ ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ଗ୍ରହଣ କରିବାକୁ ରାଜ୍ୟଗୁଡ଼ିକୁ କହିଛନ୍ତି ।
ଆରଟି-ପିସିଆର ଟେଷ୍ଟ ମାଧ୍ୟମରେ ଖୁବ୍‍ ଶୀଘ୍ର ସଂକ୍ରମିତ ଳୋକଙ୍କୁ ଚିହ୍ନଟ କରାଯାଇ ପାରିବ । ସେହିସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନମୁନା ପରୀକ୍ଷା ବୃଦ୍ଧି କରିବା ପାଇଁ ପରାମର୍ଶ ଦିଆଯାଇଛି । ସଂକ୍ରମଣ ଯେଭଳି ବୃଦ୍ଧି ନ ପାଇବ, ସେଥିପାଇଁ କଡ଼ାକଡ଼ି ନିୟମ ଲାଗୁ କରିବାକୁ ମଧ୍ୟ ସେମାନଙ୍କୁ ନିର୍ଦ୍ଦେଶ ଦିଆଯାଇଛି । ଏହାଛଡ଼ା କେନ୍ଦ୍ର ସ୍ୱାସ୍ଥ୍ୟ ସଚିବ ବ୍ୟକ୍ତିଗତ ଭାବେ ସଂପୃକ୍ତ ରାଜ୍ୟ ସରକାରଗୁଡ଼ିକର ମୁଖ୍ୟସଚିବମାନଙ୍କୁ କେନ୍ଦ୍ରୀୟ ଟିମ୍‍ଗୁଡ଼ିକୁ ସହଯୋଗ କରିବା ପାଇଁ ଅନୁରୋଧ କରିଛନ୍ତି ।