ଭୁବନେଶ୍ବର : ଅଙ୍ଗନବାଡି କର୍ମୀଙ୍କର ବକେୟା ବିଲ୍ ମଞ୍ଜୁର ପାଇଁ ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଧରାପଡିଥିବା ବାଣପୁର ପୂର୍ବତନ ସିଡିପିଓ ରାଜକୁମାରୀ ଦେଈଙ୍କୁ ସ୍ଥାନୀୟ ସ୍ବତନ୍ତ୍ର ଭିଜିଲାନ୍ସ ଜଜ୍ ସଞ୍ଜୀବ ଦୁେବ ୩ ବର୍ଷ ସଶ୍ରମ କାରାଦଣ୍ଡ ଦେବା ସହିତ ୧୫୦୦୦ ଟଙ୍କା ଜୋରିମାନା କରିଛନ୍ତି। ଜୋରିମାନା ଅନାଦାୟ ତାଙ୍କୁ ଅଧିକ ୩ ମାସ ଜେଲ ଦଣ୍ଡ ଭୋଗିବାକୁ ପଡ଼ିବ।
ମାମଲାରୁ ପ୍ରକାଶ, ବାଣପୁର ବ୍ଲକର ଚମ୍ପାଦେଇପୁର ଗ୍ରାମର ଅଙ୍ଗନବାଡ଼ି କର୍ମୀ ବନ୍ଦନା ଷଡଙ୍ଗୀଙ୍କଠାରୁ ୨୦୧୨ ଏପ୍ରିଲ୍ ୧୯ରେ ଭୁବନେଶ୍ବର ଭିଜିଲାନ୍ସ ଏସ୍ପିଙ୍କୁ ଭେଟି ତାଙ୍କର ବକେୟା ଅର୍ଥକୁ ପୈଠ କରିବା ଲାଗି ବାଣପୁର ସିଡିପିଓ ୮୭୪୦ ଟଙ୍କା ଲାଞ୍ଚ ମାଗୁଛନ୍ତି। ତେବେ ଅଙ୍ଗନବାଡି କର୍ମୀଙ୍କଠାରୁ ଲାଞ୍ଚ ନେବା ବେଳେ ଇନ୍ସପେକ୍ଟର ହରିପ୍ରିୟା ନାୟକଙ୍କ ନେତୃତ୍ବରେ ଏକ ଭିଜିଲାନ୍ସ ଟିମ୍ ଚଢ଼ଉ କରି ସିଡିପିଓ ରାଜକୁମାରୀ ଦେଈଙ୍କୁ କାବୁ କରିଥିଲା। ଏହି ମାମଲାରେ ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତିକରି ବିଚାରପତି ସିଡିପିଓ ରାଜକୁମାରୀଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଭିଜିଲାନ୍ସ ପକ୍ଷରୁ ଏହି ମାମଲାକୁ ପିପି ହେମନ୍ତ କୁମାର ସ୍ବାଇଁ ପରିଚାଳନା କରୁଥିଲେ।
Comments are closed.