ଭୁବନେଶ୍ବର: ପଞ୍ଜାବ ନ୍ୟାସନାଲ୍ ବ୍ୟାଙ୍କ(ପିଏନ୍ବି)ର ୩୨ କୋଟି ଟଙ୍କାର ମହାଠକେଇ ଘଟଣାର ତଦନ୍ତ କରୁଥିବା ସିବିଆଇକୁ ପ୍ରଥମ ସଫଳତା ମିଳିଛି। ପିଏନ୍ବିରୁ ଋଣ ଠକେଇ କରିଥିବା ମେସର୍ସ ଗ୍ଲୋବାଲ୍ ଟ୍ରେଡିଂ ସଲ୍ୟୁସନ୍ ଲିମିଟେଡର ପୂର୍ବତନ ନିର୍ଦେଶକ କୌଶିକ ମହାନ୍ତିଙ୍କର ଏକ ବ୍ୟାଙ୍କ ଲକରରୁ ସିବିଆଇ ମଙ୍ଗଳବାର ୩୭.୯୦ ଲକ୍ଷ ଟଙ୍କା ଜବତ କରିଛି।
ସିବିଆଇ ଏହି ମାମଲାରେ ବର୍ତ୍ତମାନ କଲକାତା ଏବଂ ବିଶାଖାପାଟଣାରେ ଚଢ଼ଉ କରି ଗ୍ଲୋବାଲ୍ ଟ୍ରେଡିଂ ସଲ୍ୟୁସନ୍ର ଏକାଧିକ ବ୍ୟାଙ୍କ ଆକାଉଣ୍ଟ୍କୁ ଯାଞ୍ଚ କରିଛି। ହେଲେ ସେଠାରେ ଗ୍ଲୋବାଲ୍ ଟ୍ରେଡିଂର ଥିବା ବ୍ୟାଙ୍କ୍ ଆକାଉଣ୍ଟ ଖାଲି ପଡ଼ିଥବା ଜଣାପଡିଛି। ତଦନ୍ତକୁ ମାତ୍ର କିଛି ଦିନ ହୋଇଛି। ଆଗକୁ ଏହି ଠକେଇ ଘଟଣାରେ ପରୋକ୍ଷରେ ସମ୍ପୃକ୍ତ ଥିବା ଆଉ କିଛି ବ୍ୟବସାୟୀ ଏବଂ ବିଲ୍ଡରଙ୍କୁ ମଧ୍ୟ ଜେରାର ସମ୍ମୁଖୀନ ହେବେ। ଏପରିକି ପରବର୍ତ୍ତୀ ସମୟରେ ସେମାନଙ୍କ ଘରେ ଚଢ଼ଉ କରାଯାଇପାରେ ବୋଲି ସିବିଆଇ ସୂତ୍ରରୁ ଜଣାପଡିଛି।
ଏନେଇ ସିବିଆଇ ପକ୍ଷରୁ ସ୍ପଷ୍ଟ କରାଯାଇନାହିଁ। ତେବେ ସେମାନଙ୍କ ମଧ୍ୟରୁ ଚିଟ୍ଫଣ୍ଡ୍ ମାମଲାରେ ପୂର୍ବରୁ ଏକାଧିକ ବାର ଜେରାର ସମ୍ମୁଖୀନ ହୋଇଥିବା ଜଣେ ବିଲ୍ଡର ମଧ୍ୟ ଏହି ପିଏନ୍ବି ମହାଠକେଇରେ ସମ୍ପୃକ୍ତ ଥିବା ଜଣାପଡିଛି। ତାଙ୍କ କମ୍ପାନୀର ଆକାଉଣ୍ଟକୁ ଟଙ୍କା ଦେଣନେଣ ହୋଇଛି। ଏହି ମହାଠକେଇକୁ ପ୍ରବର୍ତ୍ତନ ନିିର୍ଦେଶାଳୟ ତଦନ୍ତ କରୁଛି। ତେଣୁ ଏହି ମହା ଠକେଇ ଘଟଣାରେ ଆଗକୁ ଅଧିକ ବ୍ୟକ୍ତିବିଶେଷଙ୍କର ସମ୍ପୃକ୍ତି ପଦାକୁ ଆସିବ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି।
Comments are closed.