ପିଏନବି ଦୁର୍ନୀତି: ନୀରବ ମୋଦୀଙ୍କ ବିରୋଧରେ ସପ୍ଲିମେଣ୍ଟାରୀ ଚାର୍ଜଶିଟ୍‌ ଦାଖଲ କଲା ସିବିଆଇ

ମୁମ୍ବଇ: ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନବି) ଦୁର୍ନୀତି ମାମଲାରେ ସିବିଆଇ ପକ୍ଷରୁ ମୁମ୍ବଇର ସ୍ବତନ୍ତ୍ର କୋର୍ଟରେ ସପ୍ଲିମେଣ୍ଟାରୀ ଚାର୍ଜଶିଟ୍‌ ଦାଖଲ କରାଯାଇଛି। ସିବିଆଇ ପକ୍ଷରୁ କୋର୍ଟରେ ଦାଖଲ ହୋଇଥିବା ଚାର୍ଜଶିଟ୍‌ରେ ଦର୍ଶାଯାଇଛି ଯେ, ମୁଖ୍ୟ ଅଭିଯୁକ୍ତ ହୀରା ବ୍ୟବସାୟୀ ନୀରବ ମୋଦୀଙ୍କ କମ୍ପାନୀର ଜଣେ ନିର୍ଦେଶକଙ୍କ କହିବା ଅନୁସାରେ, ସେ ଯଦି ଭାରତ ଫେରିବେ ତେବେ ତାଙ୍କୁ ହତ୍ୟା କରାଯିବ ବୋଲି ଧମକ ମିଳିଚି। ତେଣୁ ନୀରବ ମୋଦୀଙ୍କ ବିରୋଧରେ ପ୍ରମାଣ ନଷ୍ଟ କରିବା ଏବଂ ସାକ୍ଷୀଙ୍କୁ ଧମକ ଦେବାର ଅଭିଯୋଗକୁ ନୂଆ ଚାର୍ଜଶିଟ୍‌ରେ ଯୋଡ଼ା ଯାଇଛି।

ନୂଆ ଚାର୍ଜଶିଟ୍‌ରେ ପଳାତକ ହୀରା ବ୍ୟବସାୟୀ ନୀରବ ମୋଦୀଙ୍କ ଭାଇ ନେହଲ ମୋଦୀ ଏବଂ ଅନ୍ୟ ୪ ଜଣଙ୍କ ନାମକୁ ମଧ୍ୟ ଅଭିଯୁକ୍ତ ଭାବେ ସାମିଲ କରାଯାଇଛି। ଏହି ୪ ଅଭିଯୁକ୍ତ ହେଲେ ପିଏନବିର ଡେପୁଟି ଜେନେରାଲ ମ୍ୟାନେଜର ସଞ୍ଜୟ ପ୍ରସାଦ, ନୀରବ ମୋଦୀଙ୍କ ସହଯୋଗୀ ଅମିତ ମଗିୟା, ସନ୍ଦୀପ ମିସ୍ତ୍ରି ଏବଂ ମିହିର ଭଂସାଲୀ ରହିଛନ୍ତି। ସିବିଆଇ ବିଚାରପତି ବି.ସି. ବର୍ଦେଙ୍କ କୋର୍ଟରେ ଚାର୍ଜଶିଟ୍‌ ଦାଖଲ କରି କହିଛି ଯେ, ଭଂସାଲୀ, ମିସ୍ତ୍ରି ଏବଂ ନେହଲ ମୋଦୀ ଦେଶ ବାହାରେ ଅଛନ୍ତି ଏବଂ ସେମାନଙ୍କ ବିରୋଧରେ ସମନ ଜାରି କରାଯିବା ଆବଶ୍ୟକ।

Comments are closed.