ନୂଆଦିଲ୍ଲୀ : ଜବାହାରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ)ର ଛାତ୍ର ନଜୀବ ଅହମ୍ମଦଙ୍କ ନିଖୋଜ ଘଟଣା ଉପରେ ସିବିଆଇ ସୋମବାର କ୍ଲୋଜର ରିପୋର୍ଟ (ମାମଲା ବନ୍ଦ) ଦାଖଲ କରିଛି। ୨୦୧୬ ଅକ୍ଟୋବର ୧୫ରୁ ନଜୀବ ଜେଏନୟୁର ମାହି-ମାଣ୍ଡବ ହଷ୍ଟେଲରୁ ନିଖୋଜ ହୋଇଯାଇଥିଲେ। ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ଛାତ୍ରଙ୍କ ସହିତ ତାଙ୍କର ସଂଘର୍ଷ ହେବା ପରେ ସେ ନିଖୋଜ ହୋଇଯାଇଥିଲେ। ନଜୀବଙ୍କୁ ଖୋଜିବା ଲାଗି ଦିଲ୍ଲୀ ପୁଲିସ ପ୍ରଥମେ ଉଦ୍ୟମ କରି ବିଫଳ ହୋଇଥିଲା। ନଜୀବଙ୍କ ମା’ ଫତିମାଙ୍କ ଆବେଦନକ୍ରମେ ଦିଲ୍ଲୀ ହାଇକୋର୍ଟ ଏହି ଘଟଣାର ତଦନ୍ତ ଦାୟିତ୍ୱ ସିବିଆଇକୁ ଦେଇଥିଲେ। ୨୦୧୭ ମେ ୧୬ରୁ ସିବିଆଇ ନଜୀବଙ୍କ ନିଖୋଜ ହେବା ସମ୍ପର୍କରେ ତଦନ୍ତ କରିଥିଲା। ମାତ୍ର ସିବିଆଇ ମଧ୍ୟ ଏହି ମାମଲାରେ ବିଫଳ ହୋଇଥିଲା। ଫଳରେ ସିବିଆଇ କ୍ଲୋଜର ରିପୋର୍ଟ ଦାଖଲ କରିବାକୁ କହିଥିଲା। ସିବିଆଇର ଏହି ଆବେଦନକୁ ଅଦାଲତ ଅନୁମୋଦନ କରିଥିଲେ। ତେବେ ସିବିଆଇର ଏହି କ୍ଲୋଜର ରିପୋର୍ଟକୁ ଫତିମାଙ୍କ ଓକିଲ ବିରୋଧ କରିଛନ୍ତି।
