ଭିଡ଼ ହିଂସାକୁ ନେଇ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଥିବା ବିଶିଷ୍ଟ ବ୍ୟକ୍ତିମାନଙ୍କ ବିରୋଧରେ ମାମଲା

ମୁଜଫରପୁର: ଦେଶରେ ସୃଷ୍ଟି ହେଉଥିବା ଭିଡ଼ ହିଂସାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଖୋଲା ଚିଠି ଲେଖିଥିବା ୫୦ରୁ ଅଧିକ ବିଶିଷ୍ଟ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ହୋଇଛି। ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ସୂର୍ଯ୍ୟକାନ୍ତ ତିୱାରୀଙ୍କ ଆଦେଶ କ୍ରମେ ଏହି ମାମଲା ରୁଜୁ ହୋଇଥିବା ପୁଲିସ ପକ୍ଷରୁ କୁହାଯାଇଛି। ସୂଚନା ଅନୁସାରେ, ୨ମାସ ତଳେ ପ୍ରଧାନମନ୍ତ୍ରୀଙ୍କୁ ଖୋଲା ଚିଠି ପଠାଯିବା ପରେ ସ୍ଥାନୀୟ ଓକିଲ ସୁଧୀର କୁମାର ଓଝାଙ୍କ ପକ୍ଷରୁ କୋର୍ଟରେ ପିଟିଶନ ଦାଖଲ କରାଯାଇଥିଲା। ଏହାର ଶୁଣାଣି କରି କୋର୍ଟ ଥାନାରେ ଏଫଆଇଆର ଦେବାକୁ କହିଥିଲେ। ପରେ ଗତ ଅଗଷ୍ଟ ୨୦ରେ ଏତଲା ରୁଜୁ ହୋଇଥିଲା, ଯାହା ଉପରେ ଗୁରୁବାର ପୁଲିସ ମାମଲା ରୁଜୁ କରିଛି।
ଚିଠି ଲେଖିଥିବା ବ୍ୟକ୍ତିମାନେ ଜାଣିଶୁଣି ଦେଶର ଛବି ଖରାପ କରିବା ସହିତ ପ୍ରଧାନମନ୍ତ୍ରୀଙ୍କ ପ୍ରଭାବକୁ ହ୍ରାସ କରିବା ଲାଗି ଉଦ୍ୟମ କରିଥିବା ପିଟିଶନରେ ଅଭିଯୋଗ କରାଯାଇଛି। ଚିଠି ଲେଖିଥିବା ବ୍ୟକ୍ତିଙ୍କ ମଧ୍ୟରେ ଐତିହାସିକ ରାମଚନ୍ଦ୍ର ଗୁହା, ଚଳଚ୍ଚିତ୍ର ନିର୍ଦେଶକ ମଣିରତ୍ନମ, ଅନୁରାଗ କଶ୍ୟପ, ଶ୍ୟାମ ବେନେଗଲ, ଅଭିନେତା ସୌମିତ୍ର ଚାଟାର୍ଜୀ, ଅଭିନେତ୍ରୀ ଅପର୍ଣ୍ଣା ସେନ ଏବଂ ଗାୟିକା ସୁଧା ମୁଦଗଲ ପ୍ରମୁଖ ସାମିଲ ଥିଲେ।