କେନାଲକୁ ଖସିଲା କାର୍‍: ଗୋଟିଏ ପରିବାରର ୪ ମୃତ

ସୋନୀପତ: ହରିୟାଣାର ସୋନୀପତ ସ୍ଥିତ ମହଲାନା ଗାଁ ନିକଟରେ ଏକ ମର୍ମନ୍ତୁଦ ଦୁର୍ଘଟଣାରେ ଗୋଟିଏ ପରିବାରର ୪ ଜଣଙ୍କ ମୃତ୍ୟୁ ଘଟିଛି। ଏକ କାର୍‍ ଭାରସାମ୍ୟ ହରାଇ ସଡ଼କରୁ କେନାଲକୁ ଖସି ଦୁର୍ଘଟଣାଗ୍ରସ୍ତ ହୋଇଛି। ମୃତକଙ୍କ ମଧ୍ୟରେ ମହିଳା ଓ ଶିଶୁ ମଧ୍ୟ ରହିଛନ୍ତି।
ପ୍ରତକ୍ଷଦର୍ଶୀଙ୍କ କହିବାନୁସାରେ, ଗାଁ ନିକଟରେ ବହୁଥିବା ପଶ୍ଚିମ ଯମୁନା କେନାଲରେ ଏକ କାର୍‍ ପଡ଼ିଥିବା ଦେଖିବାକୁ ମିଳିଥିଲା। ଏ ବିଷୟରେ ପୁଲିସକୁ ସୂଚନା ଦିଆଗଲା। ଏହାପରେ ପୁଲିସ ଲୋକଙ୍କ ସାହାଯ୍ୟରେ ବହୁ ପ୍ରଚେଷ୍ଟା ପରେ କାର୍‍କୁ ବାହାରକୁ ଆଣିଲା ଏବଂ ତା’ ମଧ୍ୟରେ ଥିବା ମୃତଦେହକୁ ବାହାର କରାଯାଇଥିଲା। କାର୍‍ ମଧ୍ୟରୁ ୪ ଜଣଙ୍କ ମୃତଦେହ ମିଳିଥିଲା। ମୃତକଙ୍କ ପରିଚୟ ମଧ୍ୟ ମିଳିଛି। ସେମାନେ ହେଲେ ରାମ ନାରାୟଣଙ୍କ ପୁଅ ବିଜୟପାଲ(୫୦), ବିଜୟପାଲଙ୍କ ପତ୍ନୀ ସନ୍ଧ୍ୟା(୪୫), ପୁଅ ମୋନୁ ଓରଫ୍‍ ହର୍ଷ ଓ ଝିଅ ମୋନୀ ଓରଫ୍‍ ନିକିତା। ଏମାନେ ଗୋହାନାର ଚୋପ୍ରା କଲୋନୀରେ ବାସ କରନ୍ତି ବୋଲି ଜଣାପଡ଼ିଛି। ମିଳିଥିବା ଖବର ଅନୁସାରେ, ପୁରା ପରିବାର ଶୁକ୍ରବାର ରାତିରେ ଘରୁ ବାହାରିଥିଲେ। ପୁଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି।

Comments
Loading...