ଦେଶରେ ଫାଷ୍ଟ୍ ଜେନେରେସନ୍ ବା ପ୍ରଥମ ପିଢ଼ିର ଇଥାନଲ୍ ଉତ୍ପାଦନ ସଂକ୍ରାନ୍ତ ସଂଶୋଧିତ ଯୋଜନାକୁ ଆଜି ଆର୍ଥିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍ କମିଟି ମଞ୍ଜୁରି ପ୍ରଦାନ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କ୍ୟାବିନେଟ୍ ବୈଠକ ବସିଥିଲା। ବୈଠକ ପରେ ଗଣମାଧ୍ୟମକୁ ସୂଚନା ଦେଇ ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ପ୍ରାୟତଃ ଦେଶର ବଳକା ଚାଉଳ, ଗହମ, ବାର୍ଲି, ମକାରୁ, ବର୍ଜ୍ୟ ଏବଂ ଆଖୁଛେଦାରୁ ଇଥାନଲ୍ ଉତ୍ପାଦନ ହୋଇଥାଏ। ଆଜି କ୍ୟାବିନେଟ୍ର ଅନୁମୋଦନ ଦ୍ୱାରା ଏହି ଶସ୍ୟ ଉତ୍ପାଦନ କରୁଥିବା ଚାଷୀଙ୍କ ଆୟ ବୃଦ୍ଧି ପାଇବ।
ଅନେକ ଚାଷୀଙ୍କୁ ଲାଭ ଦେବା ପାଇଁ ସରକାର ଉପଲବ୍ଧ ମକା ଏବଂ ବଳକା ଚାଉଳରୁ ଇଥାନଲ ଉତ୍ପାଦନ କରିବା ପାଇଁ ଭାରତୀୟ ଖାଦ୍ୟ ନିଗମ (ଏଫ୍.ସି.ଆଇ.) ସହ ଡିଷ୍ଟିଲାରିଗୁଡ଼ିକୁ ପ୍ରୋତ୍ସାହନ ଦେଇଛନ୍ତି। ୨୦୨୨ ସୁଦ୍ଧା ପେଟ୍ରୋଲରେ ଇଥାନଲର ୧୦ ଭାଗ ମିଶାଇବା ପାଇଁ ଲକ୍ଷ୍ୟ ରଖାଯାଇଥିବା ବେଳେ ୨୦୨୬ ସୁଦ୍ଧା ୧୫ ପ୍ରତିଶତ ଇଥାନଲ ପେଟ୍ରୋଲରେ ମିଶାଇବାର ମଧ୍ୟ ଲକ୍ଷ୍ୟ ରଖାଯାଇଛି। ଏହି ଲକ୍ଷ୍ୟ ଚାଷୀଙ୍କ ଆୟକୁ ବୃଦ୍ଧି କରିବା ସହ ସେମାନଙ୍କ ଜୀବନରେ ପରିବର୍ତ୍ତନ ଆଣିବ। ବିଗତ ୬ ବର୍ଷ ମଧ୍ୟରେ ଆଖୁଚାଷୀମାନେ ଉପକୃତ ହୋଇଛନ୍ତି। କାରଣ ଡିଷ୍ଟିଲାରିର କ୍ଷମତା ବର୍ତ୍ତମାନ ଦ୍ୱିଗୁଣିତ ହୋଇ ୪୨୬ କୋଟି ଲିଟରରେ ରହିଛି ବୋଲି ଶ୍ରୀ ପ୍ରଧାନ କହିଛନ୍ତି।
Comments are closed.