ଧର୍ମ ଆଧାରରେ ଲୋକଙ୍କୁ ବିଭାଜନ କରିବ ନାଗରିକତା ଆଇନ: ସୋନିଆ

ନୂଆଦିଲ୍ଲୀ: ନାଗରିକତା ସଂଶୋଧନ ଆଇନ(ସିଏଏ) ଦେଶରେ ଲୋକଙ୍କୁ ଭାଗ ଭାଗ କରିବ। ଏହା ଏକ ଭେଦଭାବପୂର୍ଣ୍ଣ ଏବଂ ବିଭାଜନକାରୀ ଆଇନ ବୋଲି କହିଛନ୍ତି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ। ଏହି ଆଇନ ଦେଶର ଲୋକମାନଙ୍କୁ ଧର୍ମ ଆଧାରରେ ବିଭାଜନ କରିବ ବୋଲି ଶନିବାର କଂଗ୍ରେସ ମୁଖ୍ୟାଳୟରେ ଅନୁଷ୍ଠିତ କଂଗ୍ରେସ କାର୍ଯ୍ୟକାରିଣୀ କମିଟି(ସିଡବ୍ଲ୍ୟୁସି) ବୈଠକରେ ସୋନିଆ କହିଛନ୍ତି।

ସୋନିଆ କହିଥିଲେ ଯେ, ସଂଘର୍ଷ, ଆର୍ଥିକ ସମସ୍ୟା ଏବଂ ଅପରାଧରୁ ନୂଆବର୍ଷର ଆରମ୍ଭ ହୋଇଛି। ସିଏଏ ଏବଂ ଅର୍ଥବ୍ୟବସ୍ଥାର ସ୍ଥିତିକୁ ନେଇ ସେ ସରକାରଙ୍କୁ ଟାର୍ଗେଟ କରି କହିଥିଲେ, ଜେଏନୟୁ ଏବଂ ଅନ୍ୟ ସ୍ଥାନରେ ଯୁବକ ଓ ଛାତ୍ରଙ୍କ ଉପରେ ହୋଇଥିବା ଆକ୍ରମଣ ଘଟଣାର ତଦନ୍ତ ପାଇଁ ଉଚ୍ଚ ସ୍ତରୀୟ କମିଟି ଗଠନ କରାଯିବା ଦରକାର। ଜେଏନୟୁ, ଜାମିଆ ମିଲିଆ ଇସଲାମିୟା ଏବଂ ଅନ୍ୟ ଶିକ୍ଷାନୁଷ୍ଠାନରେ ଛାତ୍ରଛାତ୍ରୀଙ୍କ ଉପରେ ହୋଇଥିବା ଆକ୍ରମଣର ତଦନ୍ତ ପାଇଁ ସ୍ବତନ୍ତ୍ର କମିଶନ ଗଠନ ହେବା ଜରୁରୀ।

ବୈଠକରେ ପ୍ରିୟଙ୍କା ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ଜ୍ୟୋତିରାଦିତ୍ୟ ସିନ୍ଧିଆ ଏବଂ ମଲିକାର୍ଜୁନ ଖାର୍ଗେଙ୍କ ସମେତ ବହୁ ବରିଷ୍ଠ ନେତା ଉପସ୍ଥିତ ଥିଲେ। ସିଏଏ, ଏନଆରସିକୁ ନେଇ ଦେଶରେ ବଢୁଥିବା ଉତ୍ତେଜନା, ଗମ୍ଭୀର ଆର୍ଥିକ ସ୍ଥିତି ଏବଂ ଅନ୍ୟ ପ୍ରସଙ୍ଗ ଉପରେ ଆଲୋଚନା ହୋଇଥିଲା।

Comments
Loading...