ୟୁରୋପୀୟ ସଂଘରୁ ଓହରିଲା ବ୍ରିଟେନ : ବନ୍ଧୁତ୍ୱପୂର୍ଣ୍ଣ ସହଯୋଗ ପାଇଁ ଜନ୍ସନ୍ଙ୍କ ପ୍ରତିଶ୍ରୁତି
ଲଣ୍ଡନ : ବ୍ରିଟେନ୍ ୟୁରୋପୀୟ ସଂଘରୁ ଆନୁଷ୍ଠାନିକ ଭାବେ ଓହରିଯାଇଛି । ବ୍ରେକ୍ଜିଟ୍ ସପକ୍ଷରେ ଜନମତ ମିଳିବାର ୩ ବର୍ଷରୁ ଅଧିକ ସମୟ ପରେ ବ୍ରିଟେନ୍ ୟୁରୋପୀୟ ସଂଘ ସଦସ୍ୟତାରୁ ଓହରିଯାଇଛି । ଶୁକ୍ରବାର ରାତି ଗ୍ରୀନିଚ୍ ସମୟ ୨୩ଟା ବେଳେ ଏହି ଐତିହାସିକ ଘଟଣା ଘଟିଥିଲା, ଯେଉଁଥିରେ ଉଭୟ ଉତ୍ସବ ପାଳନ ଓ ବିକ୍ଷୋଭ ପ୍ରଦର୍ଶନ ପରିଲକ୍ଷିତ ହୋଇଥିଲା । ୟୁରୋପୀୟ ସଂଘ ସହିତ ଯୋଡ଼ି ହୋଇ ରହିବାପାଇଁ ଇଚ୍ଛୁକ ସ୍କଟ୍ଲ୍ୟାଣ୍ଡରେ ମହମବତି ଶୋଭାଯାତ୍ରା ଅନୁଷ୍ଠିତ ହୋଇଥିବାବେଳେ ବ୍ରେକ୍ଜିଟ୍ ସପକ୍ଷବାଦୀମାନେ ଲଣ୍ଡନର ପାର୍ଲାମେଣ୍ଟ ସ୍କୋୟାର୍ଠାରେ ଉପସ୍ଥିତ ରହି ଉତ୍ସବ ପାଳନ କରିଥିଲେ ।
ଗତକାଲି ବ୍ରିଟେନ୍ ୟୁରୋପୀୟ ସଂଘରୁ ଓହରିଯିବାପାଇଁ ପ୍ରସ୍ତୁତ ହେଉଥିବାବେଳେ ପ୍ରଧାନମନ୍ତ୍ରୀ ବୋରିସ୍ ଜନ୍ସନ୍ ବନ୍ଧୁତ୍ୱପୂର୍ଣ୍ଣ ସହଯୋଗର ଏକ ନୂତନ ଯୁଗ ସୃଷ୍ଟି ପାଇଁ ପ୍ରତିଶ୍ରୁତି ଦେଇଛନ୍ତି । ବ୍ରେକ୍ଜିଟ୍ର ୧ ଘଣ୍ଟା ପୂର୍ବରୁ ଏକ ବେତାର ବାର୍ତ୍ତାରେ ଜନସାଧାରଣଙ୍କୁ ଉଦବୋଧନ ଦେଇ ଏହି ପଥରେ ଆଗକୁ ଅନେକ ପ୍ରତିବନ୍ଧକ ରହିଥିବାର ସ୍ୱୀକାର କରିଥିବାବେଳେ ଏହି ପ୍ରସ୍ଥାନ ଅଭୂତପୂର୍ବ ସଫଳତାର ସୁଯୋଗ ସୃଷ୍ଟି କରିବ ବୋଲି ପ୍ରଧାନମନ୍ତ୍ରୀ ଜନ୍ସନ୍ କହିଛନ୍ତି । ତେବେ ଜନସାଧାରଣଙ୍କର ଅବାଧ ଯାତାୟାତ ସମେତ ଅଧିକାଂଶ ୟୁରୋପୀୟ ସଂଘ ଆଇନ ଆସନ୍ତା ଡିସେମ୍ବର ୩୧ ପର୍ଯ୍ୟନ୍ତ ବଳବତ୍ତର ରହିବ ।
Comments are closed.