ବୌଦ୍ଧ: ଶିଳ୍ପ ବିହିନ ବୌଦ୍ଧଜିଲାରେ ପ୍ରାୟ ୮୦ ପ୍ରତିଶତ ଲୋକ ଚାଷ ଉପରେ ନିର୍ଭର କରିଥାନ୍ତି। ଜିଲ୍ଲାର ଚାଷୀ ଧାନ ଚାଷ ସହିତ ଅନ୍ୟାନ୍ୟ ଡାଲି ଜାତୀୟ ଫସଲ, ଫଳ ପନିପରିବା.ରାଶି, ଶୋରିଷ ଆଦି ଚାଷ କରିଥିବା ବେଳେ ଧାନ ଚାଷ ହେଉଛି ସେମାନଙ୍କ ମୁଖ୍ୟ ଚାଷ। ଜିଲ୍ଲାରେ ଗତ କିଛି ଦିନ ହେବ ଅଦିନିଆ ବର୍ଷ ହେବା ଫଳରେ ପ୍ରାୟ ୩୦ ହେକ୍ଟର ଚାଷ ଜମିରେ ଧାନ ଫସଲ ନଷ୍ଟ ହୋଇଯାଇଥିବା ଜଣାପଡିଛି। ଜିଲାରେ ଚଳିତ ରବି ଧାନ ଚାଷ ୨୫ ଶହ ୮୦ ହେକ୍ଟର ଚାଷ ଜମିରେ କରାଯାଇଥିଲା। ସେଥିମଧ୍ୟରୁ କଣ୍ଟାମାଳ ବ୍ଲକରେ ସର୍ବାଧିକ ୧୯ ଶହ ହେକ୍ଟର ଚାଷ ଜମିରେ ରବିଚାଷ କରାଯାଇଥିବା ବେଳେ ବୌଦ୍ଧ ବ୍ଲକରେ ୫ ଶହ ୫୦ ହେକ୍ଟର ଓ ହରଭଙ୍ଗା ବ୍ଲକରେ ଶହେ ୩୦ ହେକ୍ଟର ଚାଷ ଜମିରେ ରବି ଧାନ ଚାଷ କରାଯାଇଥିଲା। ହେଲେ ଜିଲାରେ ଅଦିନିଆ ବର୍ଷା ହେବା ଫଳରେ ପ୍ରାୟ ୩୦ ହେକ୍ଟର ଜମିରେ ହୋଇଥିବା ରବି ଫସଲ ନଷ୍ଟ ହୋଇଯାଇଥିବା ଜିଲା ମୁଖ୍ୟ କୃଷି ଅଧିକାରୀ ସାରଦା ପ୍ରସାଦ ମିଶ୍ର ପ୍ରକାଶ କରିଛନ୍ତି।
ଜିଲାର ପ୍ରାୟ ସମସ୍ତ ଚାଷୀମାନେ ସେମାନଙ୍କ ରବି ଧାନ ସବୁ ଜମିରୁ କାଟି ଅମଳ କରିନେଇଥିବାବେଳେ ଅଳ୍ପ କେତେକ ସ୍ଥାନରେ ଚାଷ ଜମିରେ ଧାନ ରହିଯାଇଥିଲା। ବର୍ଷା ହେବା ଯୋଗୁଁ ଧାନ ଫସଲ ଗୁଡିକ ପାଣିରେ ପଡିଯାଇଛି। ପାଣି ଶୁଖିଲେ ଧାନ ସବୁ ଅମଳ ହୋଇ ପାରିବ। ବିଶେଷ କରି ଜିଲାର କଂଟାମାଳ ବ୍ଲକର ଖଟଖଟିଆ ଓ ପୋଲସାଗୋରା ଅଂଚଳରେ ଅଦିନିଆ ବର୍ଷା ଯୋଗୁଁ ରବି ଧାନ ଫସଲ ଅଧିକ ନଷ୍ଟ ହୋଇଥିବା ଜିଲା ମୁଖ୍ୟ କୃଷି ଅଧିକାରୀ ଶ୍ରୀ ମିଶ୍ର ପ୍ରକାଶ କରିଛନ୍ତି। ଜିଲାର ଭୌଗଳିକ ସ୍ଥିତିକୁ ଦେଖିଲେ ୩ଲକ୍ଷ ୫୮ ହଜାର ୨୯୨ ହେକ୍ଟର ଜମି ରହିଛି। ସେଥିମଧ୍ୟରୁ ୮୫ ହଜାର ୧୮୦ ହେକ୍ଟର ଜମିରେ ଚାଷ କରାଯାଇଥାଏ। ଚଳିତ ବର୍ଷ ଜିଲାରେ ୨୫ ଶହ ୮୦ ହେକ୍ଟର ଚାଷ ଜମିରେ ରବି ଧାନ ଚାଷ କରାଯାଇଥିଲା।
Comments are closed.