ମୁମ୍ବଇ: ୧୯୯୩ରେ ମୁମ୍ବଇ ସିରିଜ ବୋମା ବିସ୍ଫୋରଣ ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ କୁଖ୍ୟାତ ଗ୍ୟାଙ୍ଗଷ୍ଟାର ଅବୁ ସାଲେମ ବିବାହ ପାଇଁ ଏକ ମାସ ପାରୋଲ ଆବେଦନକୁ ମୁମ୍ବଇ ଉଚ୍ଚ ନ୍ୟାୟାଳୟ ବାତିଲ କରିଦେଇଛି। କୌଶର ବାହାରଙ୍କୁ ବିବାହ କରିବା ଉଦ୍ଦେଶ୍ୟରେ ସାଲେମ ଏକ ମାସ ପାରୋଲ ଆବେଦନ କରିଥିଲେ। ଥାନେ ଜିଲା ମୁମବ୍ରା ଅଞ୍ଚଳ ନିବାସୀ କୌଶର ବାହାରଙ୍କ ସହ ଅବୁ ଦୀର୍ଘ ଦିନ ଧରି ବିବାହ କରିବାକୁ ଚାହୁଁଥିଲେ ମଧ୍ୟ କୋର୍ଟ ତାଙ୍କ ଆବେଦନକୁ ପୂର୍ବରୁ ମଧ୍ୟ ଖାରଜ କରିଥିଲା। ମୁମ୍ବଇ ଉଚ୍ଚ ନ୍ୟାୟାଳୟରେ ଏଥି ନିମନ୍ତେ ଗଠିତ ୨ଜଣିଆ ଖଣ୍ଡପିଠ ସାଲେମଙ୍କ ବିରୋଧରେ ପ୍ରମାଣିତ ହୋଇଥିବା ଅପରାଧର ଗମ୍ଭୀରତାକୁ ଦୃଷ୍ଟିରେ ରଖି ଦଣ୍ଡାଦେଶରେ କୋହଳତା ପ୍ରଦାନ କରିବାକୁ ସ୍ପଷ୍ଟ ମନା କରି ଦେଇଛନ୍ତି। ନଭେମ୍ବର ୨୦୦୫ରୁ ଅବୁ ଜେଲରେ ଦଣ୍ଡିତ ଥିବାବେଳେ ମାନବତା ଦୃଷ୍ଟିକୋଣରୁ ତାଙ୍କୁ ୧ମାସ ପାଇଁ ପାରୋଲ ପ୍ରଦାନ କରିବାକୁ ଗୁହାରି କରାଯାଇ ଥିଲା। କୌଶର ବାହାରଙ୍କୁ ବିବାହର ପ୍ରତିଶ୍ରୁତି ଦେଇଥିବାରୁ ସେ ତାଙ୍କ ପ୍ରତିଶୃତି ରକ୍ଷା କରିବାକୁ ଏଭଳି ପାରୋଲ ପାଇଁ ଆବେଦନ କରିଥିବା ଆବେଦନରେ ଦର୍ଶାଯାଇ ଥିଲା। ଅପରପକ୍ଷରେ କୌଶର ବାହାର ମଧ୍ୟ ଅବୁଙ୍କ ବ୍ୟତୀତ ଅନ୍ୟ କାହାକୁ ବିବାହ କରିବାକୁ ମନା କରିଦେଇଛନ୍ତି। ସାଲେମ ମଧ୍ୟ ସାମାଜିକ ପରମ୍ପରା ମଧ୍ୟରେ ଜୀବନ ଅତିବାହିତ କରିବାକୁ ଚାହୁଁଥିବାରୁ ତାଙ୍କୁ ଏହି ସୁଯୋଗ ପ୍ରଦାନ କରାଯାଉ ବୋଲି ଆବେଦନରେ ଉଲ୍ଲେଖ କରାଯାଇ ଥିଲା।
