ବଲାଙ୍ଗିର: ବଲାଙ୍ଗିର ଦୈନିକ ବଜାରରେ ଗଲା ଶନିବାର ବିଳମ୍ବିତ ରାତିରେ ଅଭାବନୀୟ ଘଟଣା ଘଟିଥିଲା। ହେଲେ ଘଟଣାକୁ ଟାଉନ ଥାନା ପୁଲିସ ହାଲୁକା ଭାବେ ନେଇଛି। ଯାହାକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏ ନେଇ ଏସପିଙ୍କ ଠାରେ ଫେରାଦ ହୋଇଛନ୍ତି ସହରର କିଛି ଓକିଲ। ବଲାଙ୍ଗିରର ବରିଷ୍ଠ ଓକିଲ ପ୍ରବୀଣ ମିଶ୍ରଙ୍କ ନେତୃତ୍ୱରେ ଏସପି ନୀତିନ କୁଶଲକରଙ୍କୁ ଭେଟି ଦାବିପତ୍ର ଦେବା ସହ ଦୋଷୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ।
ପ୍ରତିନିଧି ମଣ୍ଡଳୀ ଗଣମାଧ୍ୟମ ସମ୍ମୁଖରେ ପ୍ରତିକ୍ରିୟା ରଖି କହିଛନ୍ତି ଯେ, ଦୈନିକ ବଜାରରେ ପାର୍ଥ ପ୍ରତୀମ ମିଶ୍ର ନାମକ ବ୍ୟକ୍ତି ଟାଙ୍ଗିଆ ଧରି ବ୍ୟବସାୟୀ ତଥା ଶ୍ରମିକମାନଙ୍କୁ ଆକ୍ରମଣ କରିଥିଲେ। ଏପରିକି ଗୋଦାମରେ ଟାଙ୍ଗିଆ ଚୋଟ ମାରି ଭଙ୍ଗାରୁଜା କରିଥିଲେ। ଉକ୍ତ ବ୍ୟକ୍ତିଙ୍କ ନାଁରେ ଟାଉନ ଥାନାରେ ମାମଲା ରୁଜୁ ହେଲା। ହେଲେ ଦଫା ୩୦୭ ଲଗେଇବା ପରିବର୍ତ୍ତେ କୋହଳ ଦଫା ଲଗାଯାଇଛି। ଏହି ଘଟଣାର ତଦନ୍ତକାରୀ ଅଧିକାରୀଙ୍କୁ ଉଚିତ୍ ତଦନ୍ତ ପାଇଁ ନିର୍ଦ୍ଦେଶ ଦେବାକୁ ଦାବି କରିଥିଲେ। ଅପରାଧୀଙ୍କ ବିରୋଧରେ ଉଚିତ୍ କାର୍ଯ୍ୟାନୁଷ୍ଠାନ ନହେଲେ ସହରରେ ଅପରାଧ ବଢିବ ବୋଲି କହିଥିଲେ।
ଆଲୋଚନା ପରେ ଏସପି ଏ ଦିଗରେ ଉଚିତ୍ ପଦକ୍ଷେପ ଗ୍ରହଣ କରାଯିବ ବୋଲି କହିଥିଲେ। ଏହି ପ୍ରତିନିଧି ମଣ୍ଡଳୀରେ ଓକିଲ ଓଁକାର ନାୟକ, ସଞ୍ଜୀବ କୁମାର ନାଥ, ନିଲାଦ୍ରୀ ବିହାରୀ ସିଂ, ସତ୍ୟ ନାରାୟଣ ନାୟକ, ଶୁଭ୍ରାଂଶୁ ପଣ୍ଡା, ମହେନ୍ଦ୍ର ବାଗଙ୍କ ସମେତ ଓକିଲମାନେ ଉପସ୍ଥିତ ଥିଲେ। ଅନ୍ୟପକ୍ଷରେ ସିଆରପିସି ୪୧ରେ ଅଭିଯୁକ୍ତଙ୍କୁ ଛାଡି ଦେଇଥିବା ବେଳେ ଟାଣୁଆ ନେତାଙ୍କ ନିଜ ପରିବାରର ଲୋକ ବୋଲି ଟାଉନ ଥାନା ପୁଲିସ ଉଚିତ୍ ଦଫା ଲଗେଇବା ପାଇଁ ଭୟ କରୁଥିବା ଚର୍ଚ୍ଚା ଯୋର ଧରିଛି। ଟାଉନ ଥାନା ଅଧିକାରୀ ସଂଗ୍ରାମ କେଶରୀ ପଟ୍ଟନାୟକଙ୍କ ଏତାଦୃଶ୍ୟ କାର୍ଯ୍ୟକୁ ନେଇ ବିଭାଗୀୟ ସ୍ତରରେ ମଧ୍ୟ ନେତାଙ୍କ ନିଜ ଲୋକ ବୋଲି ଅଲୋଚନା ହେଉଛି।
Comments are closed.