କୁର୍ନୁଲ :ଆନ୍ଧ୍ର ପ୍ରଦେଶର କୁର୍ନୁଲ ଜିଲ୍ଲାରେ ଏକ ଗ୍ରାନାଇଟ୍ ଖଣିରେ ବିସ୍ପୋରଣ ଯୋଗୁଁ ଅତିକମ୍ରେ ୧୦ଜଣ ଶ୍ରମିକଙ୍କର ମୃତ୍ୟୁ ହୋଇଥିବା ପ୍ରାଥମିକ ସୂଚନା ମିଳିଛି, ଏଥିରେ ଓଡିଶାର କିଛି ଶ୍ରମିକ ଥିବା କଥା କୁର୍ନିଲ ଏସ୍ପି ପ୍ରକାଶ କରିଛନ୍ତି । ଡେକାନ କ୍ରୋନିକିଲ୍ର ଖବର ଅନୁଯାୟୀ କୁର୍ନୁଲ ଜିଲାର ହାତୀବେଲଗାଲ ନିକଟରେ ପଥର ଖଣିରେ ଶୁକ୍ରବାର ବିଳମ୍ବିତ ରାତିରେ ବିସ୍ପୋରଣ ହୋଇଥିଲା । ଏଥିରେ ସେଠାରେ ଉପସ୍ଥିତ ଥିବା ୧୦ ଜଣ ଶ୍ରମିକଙ୍କର ମୃତ୍ୟୁ ହୋଇଥିଲା । ଅନ୍ୟ ୫ ଜଣ ଗୁରୁତର ହୋଇଥିଲେ । ସେମାନଙ୍କୁ ଚିକିତ୍ସାପାଇଁ ଆଲୁର ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଥିବାବେଳେ ୪ ଜଣ ବିପଦମୁକ୍ତ ଥିବା ଚିକିତ୍ସା କରୁଥିବା ଡାକ୍ତର ଜଣାଇଛନ୍ତି ।
ଗ୍ରାନାଇଟ ଖଣିରେ ବିସ୍ପୋରଣ ହେବା ପରେ ଏହା ଆଖ ପାଖ ଅଞ୍ଚଳକୁ ବ୍ୟାପୀ ଯାଇଥିଲା । ଏଥିଯୋଗୁଁ ନିକଟରେ ଥିବା ତିନୋଟି ଟ୍ରାକ୍ଟର, ଟ୍ରକ ଓ ଶ୍ରମିକ ରହୁଥିବା କଛି ଅସ୍ଥାୟୀ ଗୃହରେ ନିଆଁ ଲାଗିଯାଇଥିଲା । ଅଗ୍ନିଶମ ବିଭାଗର ଗାଡି ସେଠାରେପହଞ୍ଚି ନିଆଁକୁ ଆୟତ କରିଥିଲେ । ଏହି ଖଣି ମାଲିକଙ୍କ ନାମରେ ଭାରତୀୟ ପିଙ୍ଗଳଧାରା ୩୦୪ , ସେକ୍ସନ ୨, ଓ ବିସ୍ପୋରକ ଦ୍ରବ୍ୟ ଆଇନ ୩ ,୫ ଅନୁସାରେ ଏକ ମାମଲା ରୁଜୁ କରାଯାଇଛି । ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ର ବାବୁ ନାଇଡୁ ଏହି ଘଟଣାରେ ଶୋକ ପ୍ରକାଶ କରିବା ସହ ମୃତକମାନଙ୍କ ପରିବାର ଲୋକଙ୍କ ପାଇଁ ୫ ଲକ୍ଷ ଟଙ୍କା କ୍ଷତି ପୂରଣ ଘୋଷଣା କରିଛନ୍ତି ।