ରାହୁଲ ଗାନ୍ଧୀଙ୍କ ନାଗରିକତ୍ୱ ନେଇ ପ୍ରଶ୍ନ ଉଠାଇଲା ବିଜେପି, ଜବାବ ରଖିବାକୁ ଦାବି

ନୂଆଦିଲ୍ଲୀ : ଲୋକସଭା ନିର୍ବାଚନରେ ଅମେଠି ଏବଂ ୱାୟନାଡ଼ରୁ ପ୍ରାର୍ଥୀ ହୋଇଥିବା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ନାଗରିକତ୍ୱ ନେଇ ବିଜେପି ପ୍ରଶ୍ନ ଉଠାଇଛି। ଅମେଠିରୁ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢୁଥିବା ଧ୍ରୁବ ଲାଲଙ୍କ ଓକିଲ ରବି ପ୍ରକାଶ ରିଟର୍ଣ୍ଣିଂ ଅଫିସରଙ୍କ ନିକଟରେ ଏନେଇ ଅଭିଯୋଗ କରିବା ପରେ ବିଜେପି ଏହାକୁ ପ୍ରସଙ୍ଗ କରିଛି। ବିଜେପି ଏହି ମାମଲାରେ କଂଗ୍ରେସ ଏବଂ ରାହୁଲ ଗାନ୍ଧୀଙ୍କୁ ଜବାବ ରଖିବାକୁ କହିଛି

ବିଜେପି ନେତା ଜେଭିଏଲ ନରସିହ୍ମା ରାଓ ଶନିବାର ଏକ ସାମ୍ବାଦିକ ସମ୍ମିଳନୀ ଆହୂତ କରି କହିଛନ୍ତି ଯେ ରିଟର୍ଣ୍ଣିଂ ଅଫିସର ରାହୁଲ ଗାନ୍ଧୀଙ୍କ ଓକିଲ ରାହୁଲ କୌଶିକଙ୍କୁ ଅଭିଯୋଗ ଉପରେ ଜବାବ ରଖିବାକୁ କହିଥିଲେ। ମାତ୍ର ରାହୁଲ କୌଶିକ ତାଙ୍କ ପାଖରେ ପ୍ରର୍ଯ୍ୟାପ୍ତ ସୂଚନା ନଥିବା ଦର୍ଶାଇ ଅଧିକ ସମୟ ମାଗିଛନ୍ତି। ରିଟର୍ଣ୍ଣିଂ ଅଫିସର ରାହୁଲ ଗାନ୍ଧୀଙ୍କ ସୋମବାର ସକାଳ ପର୍ଯ୍ୟନ୍ତ ସମୟ ଦେଇଛନ୍ତି। ନାଗରିକତ୍ୱ ନେଇ ଜବାବ ତଲବ ପରେ ବି କଂଗ୍ରେସ ଉତ୍ତର ନଦେବା ଘଟଣା ଆଶ୍ଚର୍ଯ୍ୟଜନକ ବୋଲି ଜେଭିଏଲ କହିଛନ୍ତି।
ସୂଚନା ଅନୁସାରେ ୨୦୦୪ ଲୋକସଭା ନିର୍ବାଚନ ସତ୍ୟପାଠରେ ରାହୁଲ ଗାନ୍ଧୀ ବ୍ରିଟେନରେ ବ୍ୟାକଅଫିସ୍‍ ଲିମିଟେଡ୍‍ ନାମକ ଏକ କମ୍ପାନୀରେ ନିବେଶ କରିଥିବା ଉଲ୍ଲେଖ କରିଥିଲେ। ୨୦୦୫ରେ ଏହି କମ୍ପାନୀର ବାର୍ଷିକ ରିଟର୍ଣ୍ଣ କାଗଜପତ୍ରରେ ରାହୁଲ ଗାନ୍ଧୀଙ୍କୁ ବ୍ରିଟେନ୍‍ ନାଗରିକ ଦର୍ଶାଯାଇଛି। ଯଦି ସେହି ସମୟରେ ରାହୁଲ ବ୍ରିଟେନ ନାଗରିକତ୍ୱ ଗ୍ରହଣ କରିଥିଲେ ତେବେ ଏହା ଆଇନ ଉଲ୍ଲଙ୍ଘନ। କେହି ଭାରତୀୟ ଅନ୍ୟ ଦେଶର ନାଗରିକତ୍ୱ ଗ୍ରହଣ କରିବା ମାତ୍ରେ ତାର ଭାରତୀୟ ନାଗରିତ୍ୱ ସମାପ୍ତ ହୋଇଯାଇଥାଏ। ନାଗରିକତ୍ୱ ସମାପ୍ତ ବା ଚାଲିଯିବା ପରେ ଆପଣ ଭାରତର କୌଣସି ବି ନିର୍ବାଚନରେ ଭାଗ ନେଇପାରିବେ ନାହିଁ।