ନୂଆଦିଲ୍ଲୀ : ଜାତୀୟ ନାଗରିକ ପଞ୍ଜିକା (ଏନଆରସି) ଉପରେ ଆମ ଆଦମୀ ପାର୍ଟି (ଆପ)ର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ମନ୍ତବ୍ୟକୁ ନେଇ ବିବାଦ ଆରମ୍ଭ ହୋଇଛି। ଏହାକୁ ନେଇ ଗୁରୁବାର ବିଜେପିର ପୂର୍ବାଞ୍ଚଳ ମୋର୍ଚ୍ଚାର କର୍ମୀମାନେ କେଜରିୱାଲଙ୍କ ବାସଭବନ ଆଗରେ ବିରୋଧ ପ୍ରଦର୍ଶନ କରିଛନ୍ତି।
ବିଜେପି କାର୍ଯ୍ୟକର୍ତ୍ତାଙ୍କୁ ଘଉଡ଼ାଇବା ପାଇଁ ପୁଲିସ୍ ପାଣି ମାଡ଼ କରିଥିଲା। କେତେକ କାର୍ଯ୍ୟକର୍ତ୍ତାଙ୍କୁ ପୁଲିସ୍ ଉଠାଇ ନେଇ ଅଟକ ରଖିଥିଲା। ବିରୋଧ ପ୍ରଦର୍ଶନବେଳେ ବିଜେପି କାର୍ଯ୍ୟକର୍ତ୍ତାମାନେ କେଜରିୱାଲଙ୍କ ବିରୋଧରେ ସ୍ଲୋଗାନ ଦେଇଛନ୍ତି।
ଆସାମ ଭଳି ଦିଲ୍ଲୀରେ ଏନଆରସି ଲାଗୁ କରିବା ପାଇଁ ଦିଲ୍ଲୀ ବିଜେପି ଅଧ୍ୟକ୍ଷ ମନୋଜ ତିୱାରୀ ପ୍ରସ୍ତାବ ଦେଇଥିଲେ। ଏହାକୁ ନେଇ କେଜରିୱାଲ ବୁଧବାର ବିବାଦୀୟ ମନ୍ତବ୍ୟ ଦେଇଥିଲେ। ଦିଲ୍ଲୀରେ ଏନଆରସି ଲାଗୁ ହେଲେ ସର୍ବପ୍ରଥମେ ମନୋଜ ତିୱାରୀଙ୍କୁ ବାହାରକୁ ଯିବାକୁ ପଡ଼ିବ ବୋଲି କେଜରିୱାଲ କହିଥିଲେ। ଏହାକୁ ନେଇ ଗୁରୁବାର ବିଜେପି କାର୍ଯ୍ୟକର୍ତ୍ତାମାନେ ବିରୋଧ ପ୍ରଦର୍ଶନ କରିଛନ୍ତି ଓ କେଜରିୱାଲଙ୍କ ବିରୋଧରେ ସ୍ଲୋଗାନ ଦେଇଛନ୍ତି।
ପ୍ରକାଶଯୋଗ୍ୟ ଯେ ଚଳିତ ବର୍ଷ ଅଗଷ୍ଟ ୩୧ରେ ମନୋଜ ତିୱାରୀ କହିଥିଲେ ଯେ ଦିଲ୍ଲୀରେ ଏନଆରସିର ଆବଶ୍ୟକତା ରହିଛି। ଦିଲ୍ଲୀରେ ଆସି ରହୁଥିବା କେତେକ ବେଆଇନ ପ୍ରବାସୀ ଅତି ବିପଦଜନକ ଅଟନ୍ତି। ତେଣୁ ଆମେ ଏଠାରେ ଏନଆରସି ଲାଗୁ କରିବାକୁ କହୁଛୁ। ମନୋଜ ତିୱାରୀ ହେଉଛନ୍ତି ଉତ୍ତରପ୍ରଦେଶର ମୂଳନିବାସୀ। ଏହାକୁ ନେଇ କେଜରିୱାଲ ତାଙ୍କ ବିରୋଧରେ ମନ୍ତବ୍ୟ ଦେଇଥିଲେ । କେଜରିୱାଲଙ୍କ ମନ୍ତବ୍ୟକୁ ବିଜେପି ନେତା କପିଲ ମିଶ୍ରା ସମାଲୋଚନା କରିଛନ୍ତି। ଏନଆରସିରେ ଥିବା ‘ଏନ’ର ଅର୍ଥ ନ୍ୟାଶନାଲ ବା ଜାତୀୟ ତାହା କେଜରିୱାଲଙ୍କୁ ଜଣାନାହିଁ ବୋଲି କପିଲ ମିଶ୍ରା କହିଛନ୍ତି।
Comments are closed.