ଭୁବନେଶ୍ୱର: ଗୋଟିଏ ଦିନରେ ଦୁଇ ଜଣ ବରିଷ୍ଠ ନେତା ଦଳରୁ ଇସ୍ତଫା ଦେବା ପରେ ବିଜେପି ପକ୍ଷରୁ ଏହାକୁ ସ୍ବାଗତ କରାଯାଇଛି । ଏକ ସାମ୍ବାଦିକ ସମ୍ମିଳନୀରେ ବିଜେପିର ଉପସଭାପତି ସମୀର ମହାନ୍ତି କହିଛନ୍ତି ଯେ, ଅନ୍ୟମାନଙ୍କ ସହ ମିଶି କରି କାମ କରିବାର ଅଭ୍ୟାସ ସେମାନଙ୍କର ନାହିଁ । ଉଭୟ ଦଳର ନେତୃତ୍ବରେ କାମ କରି ପାରିଲେ ନାହିଁ ଏବଂ ସେଥିପାଇଁ ଦଳ ଛାଡିଛନ୍ତି । ସମୀର ମହାନ୍ତି ଆହୁରି ମଧ୍ୟ କହିଛନ୍ତି ଯେ, ସେମାନେ ଯେଉଁ ଦଳକୁ ଯିବେ ଗୋଷ୍ଠୀ ସୃଷ୍ଟି କରିବେ । ହେଲେ ବିଜେପି ଦଳରେ ଗୋଷ୍ଠୀ କରିବାରେ ସଫଳ ନହେବାରୁ ସେମାନେ ଦଳ ଛାଡିଛନ୍ତି ।
ସୂଚନାଯୋଗ୍ୟ, ଶୁକ୍ରବାର ସକାଳ ୧୦ଟାରେ ପ୍ରଥମେ ରାଉରକେଲା ବିଧାୟକ ଦିଲୀପ ରାୟ ବିଧାନସଭା ଯାଇ ବାଚସ୍ପତିଙ୍କୁ ଇସ୍ତଫା ପତ୍ର ଦେଇଥିଲେ ଏବଂ ପରେ ଦଳ ଛାଡୁଛନ୍ତି ବୋଲି ଟ୍ବଇଟ୍ ମାଧ୍ୟମରେ ଜଣାଇଥିଲେ । ଦିଲୀପ ରାୟଙ୍କ ଇସ୍ତଫାର କିଛି ସମୟ ପରେ ବିଜୟ ମହାପାତ୍ର ଦଳ ଛାଡିଥିବା ନେଇ ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ ।