ଅନସ୍ଥା ପ୍ରସ୍ତାବ : ନବୀନଙ୍କ ଆଦେଶ ପ୍ରତୀକ୍ଷାରେ ବିଜେଡି ସାଂସଦ 

ଭୁବନେଶ୍ୱର : ମୋଦୀ ସରକାରଙ୍କ ବିରୁଦ୍ଧରେ ଆସିଥିବା ଅନାସ୍ଥା ପ୍ରସ୍ତାବ ଉପରେ ଶୁକ୍ରବାର ଲୋକସଭାରେ ବିତର୍କ ହେବ। ଏହି ସମୟରେ ବିଜୁ ଜନତା ଦଳ (ବିଜେଡି)ର ସମସ୍ତ ସାଂସଦ ଲୋକସଭାରେ ଉପସ୍ଥିତ ରହିବେ। ତେବେ ସେମାନେ ଅନାସ୍ଥା ପ୍ରସ୍ତାବ ସପକ୍ଷରେ ରହିବେ ଅଥବା ବିରୋଧରେ ରହିବେ ତାହା ସ୍ଥିର ହୋଇ ନାହିଁ। ହୋଇପାରେ ବିଜେଡି ସାଂସଦମାନେ କକ୍ଷ ତ୍ୟାଗ କରିପାରନ୍ତି। ଦଳର ସାଂସଦ ତଥାଗତ ଶତପଥୀ କହିଛନ୍ତି ବିଳମ୍ବିତ ରାତି ଅଥବା ଶୁକ୍ରବାର ଗୃହର ଅଧିବେଶନ ଆରମ୍ଭ ହେବା ପୂର୍ବରୁ  ଏ ନେଇ ନିଷ୍ପତ୍ତି ନିଆଯାଇ ପାରେ। ଶ୍ରୀ ଶତପଥୀ କହିଛନ୍ତି ଯେ ସେମାନେ ଦଳର ଅଧ୍ୟକ୍ଷ ନବୀନ ପଟ୍ଟନାୟକଙ୍କ ଆଦେଶକୁ ପ୍ରତୀକ୍ଷା କରିଛନ୍ତି। ତା’ପରେ ଯାଇ କୌଣସି ନିଷ୍ପତ୍ତି ନିଆଯିବ।

ଯଦିଓ ରାଜନୈତିକ ମହଲରେ ଗୃହରେ ବିଜେଡି ସାଂସଦଙ୍କ ଉପସ୍ଥିତି ନେଇ ହ୍ୱିପ୍‍ ଜାରି କରାଯିବାର  ଅପପ୍ରଚାର କରାଯାଉଥିଲା ତେବେ ସାଂସଦମାନେ ଏହାକୁ ଅସ୍ୱୀକାର କରିଛନ୍ତି। ସେମାନଙ୍କ କହିବା କଥା ହେଲା ଦଳର ଭୂମିକା ସଂପର୍କରେ ସଂସଦରେ ହିଁ ସ୍ଥିର କରାଯିବ। ବର୍ତ୍ତମାନ ସୁଦ୍ଧା କେବଳ ଏତିକି ସ୍ଥିର ହୋଇଛି ଯେ, ଦଳର ଅଧ୍ୟକ୍ଷ ନବୀନ ପଟ୍ଟନାୟକ ସାଂସଦମାନଙ୍କୁ ଶୁକ୍ରବାର ଳୋକସଭାରେ ଉପସ୍ଥିତ ରହିବାକୁ କହିଛନ୍ତି। ଅନାସ୍ଥା ପ୍ରସ୍ତାବ ସମୟରେ ଗୃହରେ ଦଳର ଭୂମିକା କ’ଣ ରହିବ ? ତାହା ସଂସଦରେ ଅନାସ୍ଥା ପ୍ରସ୍ତାବ ଆଗତ ହେବା ପରେ ବିଜେଡି ସଂସଦୀୟ ଦଳ ସ୍ଥିର କରିବ।
ଯଦିଓ ବିଜେଡି ଅଧ୍ୟକ୍ଷ ବାରମ୍ବାର କହି ଆସିଛନ୍ତି ଯେ, ତାଙ୍କ ଦଳ ବିଜେପି ଏବଂ କଂଗ୍ରେସ ଠାରୁ ସମ ଦୂରତା ବଜାୟ ରଖିଛି, ହେଲେ ଆସନ୍ତାକାଲି ହେଉଛି ତାହାର ଅଗ୍ନି ପରୀକ୍ଷା। ଯଦି ଦଳ ଅନାସ୍ଥା ପ୍ରସ୍ତାବରେ ବିରୋଧୀ ଦଳଙ୍କ ସହିତ ସାମିଲ ହୁଏ, ତେବେ କଂଗ୍ରେସ ପ୍ରତି ଦଳର ସଂପର୍କ ବୃଦ୍ଧି ପାଉଛି ତାହା ପ୍ରମାଣିତ ହେବ। ଯଦି କ୍ଷମତାସୀନ ଦଳ ସପକ୍ଷରେ ଯାଏ ତେବେ ଓଡ଼ିଶାରେ ବିଜେପି ପ୍ରତି ନରମ ମନୋଭାବ ଏବଂ କେନ୍ଦ୍ର ସରକାରଙ୍କ ସହିତ ‘ଡ଼ିଲ୍’ ହୋଇଥିବା ନେଇ ଚର୍ଚ୍ଚା ହେବ।
ତେବେ ବିଜେଡି ସୂତ୍ରରୁ ପ୍ରକାଶ ଯେ ଗୁରୁବାର ରାତି ସୁଦ୍ଧା ହ୍ୱିପ୍‍ ଜାରି ହେବା ନେଇ ନିଷ୍ପତ୍ତି ହୋଇଯିବ। ଏହା ପରେ ସ୍ଥିର ହେବ ଅନାସ୍ଥା ପ୍ରସ୍ତାବ ସମୟରେ ଦଳର ଆଭିମୁଖ୍ୟ କ’ଣ ହେବ ଏବଂ ଦଳ କାହା ସପକ୍ଷରେ ରହିବ। ବିଜେଡି ସଂସଦୀୟ ଦଳର ପ୍ରବକ୍ତା କଳିକେଶ ନାରାୟଣ ସିଂହ ଦେଓ କହିଛନ୍ତି ଯେ, ବିଜେଡି ସାଂସଦମାନେ ମୋଦୀ ସରକାରଙ୍କୁ ପ୍ରଥମରୁ କୃଷକମାନଙ୍କର ଆୟ ଦୁଇଗୁଣ କରିବା ବିଷୟ ସମେତ ସର୍ବନିମ୍ନ ସହାୟକ ମୂଲ୍ୟ, ମହାନଦୀ, ପୋଲାଭରମ୍‍ ଭଳି ସମ୍ବେଦନଶୀଳ ପ୍ରସଙ୍ଗରେ ଘେରିବାକୁ ନିଷ୍ପତ୍ତି ନେଇସାରିଛନ୍ତି।
ଅନ୍ୟପକ୍ଷରେ ଲୋକସଭା ବାଚସ୍ପତି ସୁମିତ୍ରା ମହାଜନ ବୈଜୟନ୍ତ ପଣ୍ଡାଙ୍କ ଇସ୍ତଫା ଗ୍ରହଣ କରିଛନ୍ତି। ସେ ବିଜୁ ଜନତା ଦଳର ସାଂସଦ ଥିଲେ। ଏବେ ଲୋକସଭାରେ ବିଜେଡିର ସାଂସଦଙ୍କ ସଂଖ୍ୟା ହ୍ରାସ ପାଇ ୧୯ ହୋଇଯାଇଛି। ଓଡ଼ିଶାର ମୋଟ ୨୧ଟି ଲୋକସଭା ଆସନ ମଧ୍ୟରୁ ଜୁଏଲ ଓରାମ ବିଜେପିରୁ ଜିତିଥିବା ବେଳେ ବାକି ୨୦ଟି ଆସନ ବିଜେଡି ଜିତିଥିଲା।