ପିପିଲି ନିର୍ବାଚନୀ ହିଂସା ନେଇ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଲା ବିଜେଡ଼ି

ଭୁବନେଶ୍ବର: ପିପିଲି ନିର୍ବାଚନୀ ହିଂସାକୁ ନେଇ ସୋମବାର ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଛନ୍ତି ବିଜେଡିର ୫ ଜଣିଆ ଟିମ୍। ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ବିଜେପି ବିରୋଧରେ ଆକ୍ରମଣ ଅଭିଯୋଗ ଆଣିଛନ୍ତି ବିଜେଡି ସାଂସଦ ସସ୍ମିତ ପାତ୍ର।

ଗତକାଲି ବିଜେପି କର୍ମୀମାନେ ବିଜେଡି କର୍ମୀଙ୍କୁ ଆକ୍ରମଣ କରିଛନ୍ତି ବୋଲି ଦଳ ପକ୍ଷରୁ ଅଭିଯୋଗ ହୋଇଛି। ଏଥିରେ ୨ଜଣ କର୍ମୀ ଗୁରୁତର ଆହତ ହୋଇଛନ୍ତି। ଦୁଇ ଜଣଙ୍କ ମଧ୍ୟରୁ ଜଣେ ଡେଲାଙ୍ଗ ଡାକ୍ତରଖାନାରେ ଓ ଜଣେ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଜଣେ ମହିଳା କର୍ମୀଙ୍କୁ ଆକ୍ରମଣ କରାଯିବା ସହ ତାଙ୍କୁ ଅସଦାଚରଣ ମଧ୍ୟ କରାଯାଇଛି। ବିଜେଡ଼ିର ବରିଷ୍ଠ ନେତା ତଥା ମନ୍ତ୍ରୀ ସୁଶାନ୍ତ ସିଂହ ଓ ତାଙ୍କ ଗାଡ଼ିକୁ ଆକ୍ରମଣ କରାଯାଇଛି। ବିଜେପି ନିର୍ବାଚନ ହାରିବା ଭୟରେ ଏମିତି ହିଂସା ଆଚରଣ କରୁଛି ବୋଲି ଶ୍ରୀ ପାତ୍ର କହିଛନ୍ତି। ଏଭଳି ହିଂସାତ୍ମକ କାର୍ଯ୍ୟକଳାପ ବିଜେପି ପାଇଁ କିଛି ନୂଆ ନୁହେଁ ବୋଲି ସେ କହିଛନ୍ତି। ଏହାସହିତ ଏହି ନିର୍ବାଚନୀ ହିଂସାରେ ସାମିଲ ଥିବା ବିଜେପି ନେତା ଓ କର୍ମୀମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦଳ ପକ୍ଷରୁ ଦାବି ହୋଇଛି।

ସୂଚନାଯୋଗ୍ୟ, ବିଜେଡିର ଏହି ୫ ଜଣିଆ ଟିମରେ ସୁଲତା ଦେଓ, ଶ୍ରୀମୟୀ ମିଶ୍ର, ସାଂସଦ ସୁଜିତ କୁମାର, ଲେନିନ ମହାନ୍ତି ଓ ସସ୍ମିତ ପାତ୍ର ସାମିଲ ଥିଲେ।

Comments are closed.