ବିରଜା ପୀଠରେ ପିତୃପକ୍ଷଙ୍କୁ ପିଣ୍ଡଦାନ କରୁଛନ୍ତି ଶ୍ରଦ୍ଧାଳୁ

0

ଯାଜପୁର: ମା’ବିରଜା କ୍ଷେତ୍ର ଯାଜପୁର ସର୍ବଭାରତୀୟ ସ୍ତରରେ ପ୍ରଚୀନ ଶକ୍ତିପୀଠ । ମନ୍ଦିରରେ ଥିବା ନାଭିଗୟାରେ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡ ପ୍ରଦାନ କରାଯାଇଥାଏ । ପବିତ୍ର ମହାଳୟା ତିଥିରେ ଜିଲାର ବିଭିନ୍ନ ଅଂଚଳ ଓ ରାଜ୍ୟରୁ ରାଜ୍ୟ ବାହାରୁ ଶ୍ରଦ୍ଧାଳୁ ମାନେ ସମାବେଶ ହୋଇ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡ ପ୍ରଦାନ କରୁଛନ୍ତି ।ଏହି ପବିତ୍ର ତିଥିରେ ପିଣ୍ଡ ପ୍ରଦାନ କଲେ ୨୧ପୁରୁଷ ପର୍ଯ୍ୟନ୍ତ ଉଦ୍ଧାର ପାଇଥାନ୍ତି ବୋଲି କପିଳ ସଂହିତାରେ ଉଲ୍ଲେଖ ରହିଛି । ଏହି ନାଭିଗୟାରେ ଭଗବାନ ନାରାୟଣ ଗଦାଧର ରୂପ ଧାରଣ କରି ପିଣ୍ଡଦାନର ସାକ୍ଷୀ ରୂପେ ରହିଛନ୍ତି । ଏଠାରେ ପିଣ୍ଡଦାନ କଲେ ପିତୃପୁରୁଷ ସନ୍ତୁଷ୍ଟ ହୁଅନ୍ତି ବୋଲି ଶାସ୍ତ୍ରୀୟ ମତ ରହିଛି । ଆଶ୍ୱିନ ମାସ କୃଷ୍ଣ ପକ୍ଷକୁ ପିତୃପକ୍ଷ ମହାଳୟା କୁହାଯାଏ । ଏହି ମାସର ଅମାବାସ୍ୟା ତିଥିରେ ମହାଳୟା ପିତୃତର୍ପଣ ଓ ମଉଳା ଶ୍ରାଦ୍ଧ ଭାବେ ବେଶ୍ ପ୍ରସିଦ୍ଧ । ତୀର୍ଥ କ୍ଷେତ୍ର ପୂଣ୍ୟତୋୟା ବୈତରଣୀରେ ସ୍ନାନ ତର୍ପଣାଦି କରାଯାଇ ପିତା, ପିତାମହ, ପ୍ରମାତାମୟୀ ପ୍ରଭୂତିଙ୍କ ଉଦ୍ଦେଶ୍ୟରେ ଏହି ନାଭିଗୟାରେ ପିଣ୍ଡ ପ୍ରଦାନ କଲେ ମୋକ୍ଷ ଲାଭ ହୁଏ । ଗୟାତୀର୍ଥ ଭଳି ଏହି ବିରଜା କ୍ଷେତ୍ରର ନାଭିଗୟା ତତୁଲ୍ୟ ବୋଲି ଶାସ୍ତ୍ରୀୟ ମତ ରହିଛି । ଆଜି ପୁର୍ବାହ୍ନରୁ ବହୁ ଶ୍ରଦ୍ଧାଳୁ ମାନେ ସେମାନଙ୍କ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ କର୍ମାଣୀ କରି କ୍ଷେତ୍ରେଶ୍ୱରୀ ମା’ବିରଜାଙ୍କ ମୁଖ ଦର୍ଶନ କରି ଆଶିଷ ଲାଭ କରିଛନ୍ତି । ଏହି ନାଭିଗୟାରେ ହଜାର ହଜାର ସଂଖ୍ୟକ ଶ୍ରଦ୍ଧାଳୁ ମାନେ ଆଜି ପିଣ୍ଡ ପ୍ରଦାନ କରି ଥିବା ପରିଲଖିତ ହୋଇଥିବା ବେଳେ ଟ୍ରଷ୍ଟ ବୋର୍ଡ଼ ପକ୍ଷରୁ ମଧ୍ୟ ଯାତ୍ରୀମାନଙ୍କ ପାଇଁ ସମସ୍ତ ସୁବ୍ୟବସ୍ଥା କରାଯାଇଥିବା ଟ୍ରଷ୍ଟି ତଥା ଉପଜିଲାପାଳ ନାରାୟଣ ଚନ୍ଦ୍ର ଧଳ ସୂଚନା ଦେଇଛନ୍ତି ।

Comments
Loading...