ଆଇସିୟୁ ପାଇଁ ସାଂସଦ ପାଣ୍ଠିରୁ ୧ କୋଟି ଦେଲେ ଭର୍ତ୍ତୃହରି

ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ପ୍ରଦାନ କଲେ ୩ ମାସର ଦରମା

କଟକ : ବରିଷ୍ଠ ବିଜେଡ଼ି ନେତା ତଥା କଟକ ସାଂସଦ ଭର୍ତ୍ତୃହରି ମହତାବ ରାଜ୍ୟରେ ମହାମାରୀ ‘କରୋନା’ ମୁକାବିଲା ପାଇଁ ନିଜ ସାଂସଦ ପାଣ୍ଠିରୁ ୧ କୋଟି ଟଙ୍କା ଏବଂ ୩ ମାସର ଦରମା ପ୍ରଦାନ କରିଛନ୍ତି। କଟକ ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ ଆଠଗଡ଼ ମାଧପୁରଠାରେ ଥିବା ପ୍ରମୁଖ ସ୍ବାସ୍ଥ୍ୟ ପ୍ରତିଷ୍ଠାନ ‘ଗୋପବନ୍ଧୁ ଇନ୍‌ଷ୍ଟିଚ୍ୟୁଟ ଅଫ ମେଡ଼ିକାଲ ସାଇନ୍ସ ଆଣ୍ଡ ରିସର୍ଚ୍ଚ ସେଣ୍ଟର’ରେ ଏକ ପାଞ୍ଚଶଯ୍ୟା ବିଶିଷ୍ଟ ଆଇସିୟୁ ପ୍ରତିଷ୍ଠା ନିମନ୍ତେ ଶ୍ରୀ ମହତାବ କଟକ ଜିଲାପାଳଙ୍କ ମାଧ୍ୟମରେ ୧ କୋଟି ଟଙ୍କା ପ୍ରଦାନ କରିଥିବାବେଳେ ରାଜ୍ୟସ୍ତରରେ ‘କରୋନା’ ମୁକାବିଲା ନିମନ୍ତେ ନିଜ ୩ ମାସର ଦରମା ମୁଖ୍ୟମନ୍ତ୍ରୀ ରିଲିଫ ପାଣ୍ଠି (ସିଏମଆରଏଫ)କୁ ଦେଇଛନ୍ତି। ମାଧପୁର ମେଡ଼ିକାଲରେ ଆଇସିୟୁ ନଥିବାରୁ ଆଠଗଡ଼ ଅଞ୍ଚଳର ରୋଗୀ ଅନେକ ସମୟରେ ସଙ୍କଟଜନକ ପରିସ୍ଥିିତିର ସମ୍ମୁଖୀନ ହେଉଥିଲେ। ସାଂସଦ ଶ୍ରୀ ମହତାବ କଟକ ସହର ସମେତ ସମଗ୍ର ଲୋକସଭା ନିର୍ବାଚନମଣ୍ଡଳୀରେ କରୋନା ନିମନ୍ତେ ବ୍ୟାପକ ସଚେତନତାକୁ ଗୁରୁତ୍ବ ଦେଇଥିବାବେଳେ ଲକ୍‌ଡାଉନ ସମୟରେ ଲୋକେ ସରକାରଙ୍କ ନିର୍ଦେଶକୁ ପାଳନ କରିବାକୁ ନିବେଦନ କରିଛନ୍ତି।

Comments
Loading...