ଦିନକ ପାଇଁ ବ୍ରିଟିଶ ଡେପୁଟି ହାଇକମିଶନର ହେଲେ ବେଙ୍ଗାଲୁରୁର ସାମ୍ବାଦିକତା ଛାତ୍ରୀ

ବେଙ୍ଗାଲୁରୁ: ବେଙ୍ଗାଲୁରୁର ଜଣେ ସାମ୍ବାଦିକତା ଛାତ୍ରୀଙ୍କୁ ଦିନକ ପାଇଁ ବ୍ରିଟିଶ ଡେପୁଟି ହାଇକମିଶନର ହେବାର ସୁଯୋଗ ମିଳିଛି। ଅନ୍ତର୍ଜାତୀୟ ବାଳିକା ଦିବସ ଅବସରରେ ଏହି ସୁଯୋଗ ପାଇଥିବା ଛାତ୍ରୀ ଜଣକ ହେଉଛନ୍ତି ୨୪ ବର୍ଷୀୟା ଅମ୍ବିକା ବାନାର୍ଜୀ। ଏହି ସମୟରେ ଅମ୍ବିକା ଭାରତ ଏବଂ ବ୍ରିଟେନ ମଧ୍ୟରେ ରହିଥିବା କୁଟନୈତିକ ସମ୍ପର୍କ ବିଷୟରେ ଜ୍ଞାନ ଆହରଣ କରିଥିଲେ।

ଗତ ଶୁକ୍ରବାର ଅମ୍ବିକା ଭାରତର ବେଙ୍ଗାଲୁରୁରେ ଅବସ୍ଥାପିତ ବ୍ରିଟିଶ ଡେପୁଟି ହାଇକମିଶନର ଜେରେମୀ ପିଲ୍‌ମୋର ବେଡ୍‌ଫୋର୍ଡଙ୍କଠାରୁ ଦାୟିତ୍ଵ ଗ୍ରହଣ କରିଥିଲେ। ଭାରତରେ ବ୍ରିଟେନର ଏହା ୩ୟ ସର୍ବୋଚ୍ଚ ପଦବୀ। ଅମ୍ବିକା ଏହି ସମୟରେ ବେଙ୍ଗାଲୁରୁସ୍ଥିତ ବ୍ରିଟିଶ ଡେପୁଟି ହାଇକମିଶନରଙ୍କ କାର୍ଯ୍ୟାଳୟରେ ସରକାର ଏବଂ ଉଦ୍ୟୋଗପତିମାନଙ୍କ ସହିତ ଅନୁଷ୍ଠିତ ଏକ ବୈଠକରେ ଅଧ୍ୟକ୍ଷତା ମଧ୍ୟ କରିଥିଲେ। ଅମ୍ବିକା କହିଛନ୍ତି ଯେ, ମୋତେ ବେଙ୍ଗାଲୁରୁସ୍ଥିତ ବ୍ରିଟିଶ ଡେପୁଟି ହାଇକମିଶନରଙ୍କ କାର୍ଯ୍ୟାଳୟର ସମସ୍ତ ଅଧିକାରୀଙ୍କ ସହିତ ମିଶିବାର ସୁଯୋଗ ମିଳିଲା। ପୂରା ଦିନଟି ମୋର ଆନନ୍ଦ ଉତ୍ସାହରେ ଭରିଯାଇଥିଲା। ଆମ ନିକଟରେ ପୂରା ଦିନର ଯୋଜନା ଥିଲା। ଅଧିକାରୀଙ୍କ ସହିତ ମୁଁ ହ୍ବାଇଟଫିଲ୍ଡରେ ଥିବା ଟେସ୍କୋ ଯିବା ସହିତ ସେଠାରେ କିପରି କାର୍ଯ୍ୟ ହେଉଛି ତାହା ବୁଲି ଦେଖିଥିଲି। ଏହି ଗୋଟିଏ ଦିନ ମୋ ଜୀବନ ସବୁଠୁ ବଡ଼ ଅନୁଭୂତି ଥିଲା। ଭାରତ ଏବଂ ବ୍ରିଟେନ ମଧ୍ୟରେ କୁଟନୈତିକ ସମ୍ପର୍କ ବିଷୟରେ ବହୁତ କିଛି ଜାଣିବାକୁ ମିଳିଲା ବୋଲି ସେ କହିଛନ୍ତି।

Comments are closed.